ރާއްޖޭގެ މަސްވެރިކަން ވަރަށް ބޮޑަށް ރަނގަޅުވެފައިވާކަމަށް މިފްކޯއިން ބުނެފި

ރާއްޖޭގެ މަސްވެރިކަން ވަރަށް ބޮޑަށް ރަނގަޅުވެފައިވާ ކަމަށް ސަރުކާރުގެ މަސް ކުންފުނި، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ބުނެފި އެވެ.

މިފްކޯގެ މެނޭޖިން ޑިރެކްޓަރު އިސްމާއިލް ފައުޒީ ކުރެއްވި ޓްވިޓެއްގައި ވިދާޅުވެފައިވަނީ ރާއްޖޭގެ މަސްވެރިކަން ވަރަށް ބޮޑަށް ރަނގަޅުވެ މިފްކޯއަށް ކިރުވާ މަހުގެ އަދަދު އިތުރުވެފައިވާކަމަށެވެ.

advertisement

ފައުޒީގެ ޓްވިޓުގައި ވިދާޅުވެފައިވަނީ ފަރެސްމާތޮޑާގައި ދުއްވާ ބާޙިރާ ދޯނި އިއްޔެ 40.4 މެޓްރިކް ޓަނުގެ މަސް ކުރުވާފައިވާކަމަށެވެ. މަސްވެރިކަން ރަނގަޅުވެ މިހާރު އެވްރެޖު ގޮތެއްގައި ދުވާލެއްގެ މައްޗަށް 200 ޓަނުގެ މަސް ބާނަމުންދާ ކަމަށް މިފްކޯއިން ބުނެއެވެ.

މަސްވެރިކަން މިހާރު ރަނގަޅުވެ ގިނަ މަސްވެރިން މަސް ކިރުވަން ފެލިވަރަށް އަންނަކަމަށް މިފްކޯއިން ބުނެއެވެ. މަސްވެރިކަން ރަނގަޅުވެފައިވާއިރު މިފްކޯއިން މިހާރު ވަނީ މަސްވެރިންނަށް ނުދެވި ހުރި ގިނަ އަދަދެއްގެ ފައިސާތައްވެސް ދީފައެވެ.

މިފްކޯ އިން ވަނީ ހަތް އަހަރަށް ފަހު ރާއްޖޭގައި މަސް ގަންނަ ކޮންޓްރޯލް އަގު ދޫކޮށްލަން ނިންމާފަ އެވެ. މަސް ކިލޯއެއް 20ރ. އަށް ގަންނަތާ މިހާރު ހަތް އަހަރު ވަނީ ވެފަ އެވެ. ނަމަވެސް މިހާރު މަސް ގަންނަމުން ދާނީ ދުނިޔޭގެ ބާޒާރުގައި މަހުގެ އަގު ހުންނަ ގޮތެއް ބަލައި އެ ގޮތަށެވެ.