ޓޫރިޒަމް މިނިސްޓްރީން އައު އިންވެސްޓްމަންޓް ފުރުސަތެއް ހުޅުވާލައިފި

ސެޕްޓެމްބަރ މަހުގެ 29 ވަނަ ދުވަހު މިނިސްޓްރީ އޮފް ޓޫރިޒަމްއިން ވަނީ ރާއްޖޭގައި އައު އިންވެސްޓްމަންޓް ފުރުސަތެއް ހުޅުވާލާފައެވެ. މިކަމާއި ގުޅޭ އިތުރު މައުލޫމާތު ހިއްސާކުރާނީ މިމަހުގެ 4 ވަނަ ދުވަހުއެވެ.

މިނިސްޓްރީ އޮފް ޓޫރިޒަމްއިން މިހާތަނަށް ހާމަކޮށްފައިވާ މައުލޫމާތުތަކުން މި އިންވެސްޓްމަންޓް ފުރުސަތު ހުޅުވާލަނީ އިހަވަންދިއްޕޮޅުގައެވެ. އިހަވަންދިއްޕޮޅަކީ ހަނިމާދޫ އެއަރޕޯޓުން 50 މިނެޓުން އަދިހޯރަފުށީ އެއަރޕޯޓުން 10 ނުވަތަ 15 މިނެޓުން ދެވޭ ސަރަހައްދެކެވެ.

advertisement

މި މައުލޫމާތުގެ މައްޗަށް ބިނާކޮށް ދާއިރާގެ ތަޖުރިބާކާރުން ލަފާކުރަނީ އިންވެސްޓްމަންޓް ފުރުސަތު ހުޅުވާލާނީ އުލިގަމުގައިކަމަށެވެ.

ނަމަވެސް ބައެއް ފަރާތްތަކުން ބުނަނީ މި ޕްރޮޖެކްޓަކީ ކުރީގެ ރައީސް ޔާމީންގެ ސަރުކާރުގައި ހުޅުވާލި އައިހެވަން މަޝްރޫއާއި ގުޅުންހުރި ޕްރޮޖެކްޓެއްކަމަށެވެ. “އައި ހެވަން” ގެ މަޝްރޫއަކީ އިހަވަންދިއްޕޮޅުގައި ޓްރާންޝިޕްމަންޓް ބަނދަރަކާއެކު، ބަނދަރުގެ ވިޔަފާރިއަށް ބޭނުންވާ އިތުރު ދާއިރާތަކާއި، އެ ތަނުގައި މުދާ އުފެއްދުމާއި ބަންދު ކުރުމާއި ގުދަން ކުރުމުގެ އިތުރުން ބައިނަލްއަގްވާމީ ފެސިލިޓީއަކާއި އެއާޕޯޓަކާއި ރިއަލްއެސްޓޭޓްގެ ބައިތައް ހިމެނޭ ގޮތަށް އިއުލާން ކުރި މަޝްރޫއެކެވެ.