ހުޅުމާލޭ 2 ވަނަ ފިޔަވަހީގެ އެއް ބްރިޖް އާންމުންނަށް ހުޅުވާލައިފި

ހުޅުމާލޭ ދެވަނަ ފިޔަވަހީގައި އަޅާފައިވާ އެއް ބްރިޖް އެޗްޑީސީން އާންމުންނަށް ހުޅުވާލައިފިއެވެ. އާންމުންނަށް ހުޅުވާލާފައިވަނީ ހުޅުމާލޭ ފުރަތަމަ ފިޔަވަހީގެ ނިރޮޅުމަގާއި ގުޅިފައިވާ ބްރިޖެވެ.

އެޗް.ޑީ.ސީން ވިދާޅުވީ، ފުރަތަމަ ބްރިޖު ހުޅުވާލީ ހުޅުމާލޭ ދެވަނަ ފިޔަވަހިން ދޫކޮށްފައިވާ ގޯތިތަކުގައި އާއްމު ފަރާތްތަކުން ދިރިއުޅެން ފެށުމާއި ގުޅިގެން އެ ފަރާތްތަކަށް އެ ސަރަޙައްދަށް އަރައި ފޭބުމުގައި ދިމާވާ ދަތިތަކަށް ޙައްލެއް ހޯދައިދިނުމުގެ ގޮތުންކަމަށެވެ.

advertisement

މި ބްރިޖު ހުޅުވާލި ނަމަވެސް، ހުޅުމާލޭ ދެވަނަ ފިޔަވަހީގެ އެހެން ސަރަޙައްދުތަކަށް އެޗް.ޑީ.ސީގެ ހުއްދަ ނެތި އާއްމު ފަރާތްތަކުން ވަދެނިކުމެ އުޅުމާއި، އަރައިފޭބުމަކީ މަނާކަމެއް ކަމަށް އެ ކޯރޕަރޭޝަނުން ވިދާޅުވެއެވެ. އަދި ހުޅުމާލޭ ދެވަނަ ފިޔަވަހީގެ ބީޗް ސަރަޙައްދު ބޭނުންކުރާ ފަރާތްތަކުން، އެ ކޯރޕަރޭޝަނުން ކަނޑައަޅާފައިވާ އުޞޫލުތަކާއި ރާއްޖޭގެ ޤާނޫނުތަކާއި ޤަވާއިދުތަކާ އެއްގޮތްވާ ގޮތުގެ މަތން ޢަމަލުކުރުމަށްވެސް އެޗް.ޑީ.ސީން ވަނީ އިލްތިމާސްކުރައްވާފައެވެ.

ހުޅުމާލޭ ފޭސް2 އަކަށް ފަސޭހައިން އަރައި ފޭބުމަށް ކަނެކްޓިންގ 4 ބްރިޖެއް ތަރައްޤީކުރުމުގެ މަސައްކަތް އެޗްޑީސީން ދަނީ ކުރަމުންނެވެ. ސެކަންޑް ފޭސްގައި ދޫކޮށްފައިވާ ބިންތަކުގައި އަމިއްލަ މީހުން ބައެއް ގެތަށް ނިމި އެ ސަރަހައްދަށް މީހުން ބަދަލުވާން މިހާރު ވަނީ ފަށާފައެވެ. މީހުން ދިރިއުޅެން ފަށާފައިވަނީ ނިރޮޅު މަގާ ގުޅިގެން ފޭސް ދޭކަށްވާ މަގުތަކަށް ހުރި ގޯތިތަކުގަ އެވެ. އެހެންކަމުން މި ހުޅުވާލި ބްރިޖާއިއެކު އާންމުންނަށް ފޭސް2 އަށް ދިއުމަށް ފަސޭހަވެގެންދާނެއެވެ.