އިންޑިއާއިން ރާއްޖެއަށް ހަދިޔާކުރި މަތިންދާބޯޓުގެ ސަބަބުން ވަގަށް ޑްރަގް އެތެރެކުރާ މީހުން ބިރުގަންނާނެ – އަނދުން ހުސައިން

އިންޑިއާއިން ރާއްޖެއަށް ހަދިޔާކުރި ޑޯނިއާ މަތިންދާބޯޓުގެ ސަބަބުން ރާއްޖެއަށް ވަގަށް ޑްރަގް އެތެރެ ކުރާ މީހުން ޖެހިލުންވާނެކަމަށް ހެންވޭރު ދެކުނު ދާއިރާގެ މެމްބަރު ހުސައިން ޝަމީން(އަނދުން ހުސައިން) ވިދާޅުވެއްޖެއެވެ.

އަނދުން ހުސައިން ކުރެއްވި ޓްވިޓެއްގައި ވިދާޅުވެފައިވަނީ އިންޑިއާ ސަރުކާރުން ރާއްޖެއަށް ހަދިޔާކުރި ޑޯނިއާ މަތިންދާބޯޓު އެމްއެންޑީއެފް ކޯސްޓް ގާޑުގެ ނިޝާނާއި ކުލަޔާއިއެކު ރާއްޖެ އަތުވެއްޖެކަމަށެވެ. މި މަތިންދާބޯޓާއިއެކު ވަގަށް ޑްރަގް އެތެރެކުރާ މީހުންނާއި ބޭރުމީހުންނާއި ގުޅިގެން ރާއްޖޭގެ އިޤްތިޟާދީ ސަރަހައްދުން މަސް ފޭރޭ މީހުން ޖެހިލުންވެ ބިރު ގަންނާނެކަމަށް އޭނާ ވިދާޅުވިއެވެ.

advertisement

އަނދުން ހުސައިން މިހެން ވިދާޅުވީ 2016 ވަނަ އަހަރުން ފެށިގެން އިންޑިއާއިން ރާއްޖެއަށް ހޯދުމަށް މަސައްކަތް ކުރެވެމުންދިޔަ ޑޯނިއަރ މަތިންދާބޯޓު ރާއްޖެ އައުމާ ގުޅިގެންނެވެ.

މި މަތިންދާބޯޓު ބޭނުންކުރުމަށް ހަމަޖެހިފައިވަނީ އެމްއެންޑީއެފްގެ އެކި މަސައްކަތްތަކަށެވެ. އެގޮތުން ރާއްޖޭގެ ކަނޑުގެ ސަރަޙައްދު ބެލެހެއްޓުމަށާއި، ރާއްޖޭގެ މަސްކަނޑުތަކުން ޤަވާޢިދާ ޚިލާފަށް މަސްވެރިކަންކުރާ ފަރާތްތައް މޮނިޓަރކުރުމަށާއި، ރާއްޖޭގެ ކަނޑުގެ ސަރަޙައްދު ބޭނުންކޮށްގެން ކުރެވޭ ޑްރަގްސްއާއި މަނާ އެހެނިހެން ތަކެތީގެ ވިޔަފާރިއާއި އިންސާނީ ވަގުފާރި ހުއްޓުވުން ފަދަ މަސައްކަތްތައް ހިމެނެއެވެ. މީގެއިތުރުން ކަނޑުމަތީގައި ޙާލުގައި ޖެހޭ ފަރާތްތައް ހޯދުމަށާއި، އެއްތަނުން އަނެއްތަނަށް ބަލިމީހުން އުފުލުމަށާއި އަދި އެހެނިހެން އިންސާނީ އެހީ ފޯރުކޮށްދިނުމަށްވެސް މި މަތިންދާބޯޓު ބޭނުންކުރުމަށްވަނީ ހަމަޖެހިފައެވެ.

ދިވެހި ދިދައާއި ކުލަތައް އަދި އެމްއެންޑީއެފްގެ ނަން ބޭރުގައި ޖަހާފައިވާ މި މަތިންދާބޯޓުގައި ޕައިލެޓުންގެ ގޮތުގައި އެމްއެންޑީއެފްގެ އޮފިސަރުން ޙަރަކާތްތެރިވާނެ ކަމަށްވެސް އެމްއެންޑީއެފުން ވިދާޅުވެއެވެ.