ރާއްޖޭގައި ކަނޑުއަޑީގެ ޑޭޓާ ސެންޓަރެއް ޤާއިމްކުރުމުގެ ފުރުސަތު އެބައޮތް – މިނިސްޓަރ މަލީހު

ރާއްޖޭގައި ކަނޑުއަޑީގެ ޑޭޓާ ސެންޓަރެއް ގާއިމުކުރުމުގެ ފުރުސަތު އެބައޮތް ކަމަށް މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީ މަލީހު ޖަމާލު ވިދާޅުވެއްޖެ އެވެ.

މިނިސްޓަރ މިހެން ވިދާޅުވީ، ޖަޕާނުން ބޭއްވި ސައިންސް އެންޑް ޓެކްނޮލޮޖީ ސޮސައިޓީ (އެސްޓީއެސް) ފޯރަމްގައި ވާހަކަ ދައްކަވަމުންނެވެ. މިނިސްޓަރ ވިދާޅުވީ، ރާއްޖޭގައި ކަނޑުއަޑީގެ ކޮޓަރިތައްވެސް އެބަހުރިކަމަށާއި އެހެންކަމުން ކަނޑުއަޑީގައި ޑޭޓާ ސެންޓަރެއް ގާއިމުކުރުމުގެ ދިރާސާއަށް އެންމެ ކަމުދާ ގައުމަކީވެސް ރާއްޖެ ކަމަށެވެ. މިކަން ކުރުމަށްޓަކައި ބައިނަލްއަގްވާމީ ޓެލެކޮމިއުނިކޭޝަން ކުންފުނިތަކާއި ޓެކްނޮލޮޖީ ކުންފުނިތަކަށް މިނިސްޓަރު ވަނީ ދައުވަތު އަރުވާފަ އެވެ.

advertisement

ކޯވިޑް-19އަކީ މިވަގުތު ދުނިޔެއަށް ކުރިމަތިވެފައިވާ އެންމެ ބޮޑު ކާރިސާއަށްވީ ނަމަވެސް ދިވެހިރާއްޖެއަށް ބަލާނަމަ މޫސުމަށް އަންނަ ބަދަލުތަކަކީ އެންމެ ބޮޑު މައްސަލަ ކަމަށް މި ފޯރަމްގައި މިނިސްޓަރ ވަނީ ވިދާޅުވެފައެވެ. އަދި ކާބޮތަކެތީގެ ރައްކާތެރިކަމާއި ތިމާވެއްޓާއި ރައްޓެހި ހަކަތަ އަކީ މި ކުދި ޖަޒިރާ ގައުމުގެ މުސްތަގުބަލަށް ވަރަށް މުހިއްމު ކަންކަން ކަމަށް ވިދާޅުވިއެވެ.

އެސްޓީއެސް ފޯރަމް 2004ވަނަ އަހަރުގެ ނޮވެމްބަރު މަހު އުފެއްދި ފަހުން ކޮންމެ އަހަރަކުވެސް ޖަޕާނުގެ ކިޔޯޓޯގައި އެ ފޯރަމްގެ ބައްދަލުވުމެއް އަންނަނީ ބާއްވަމުންނެވެ. މި ފޯރަމްގައި ކޮންމެ އަހަރަކުވެސް ދުނިޔޭގެ އެކި ކަންކޮޅުތަކުގެ ސައިންސް އާއި ޓެކްނޮލޮޖީގެ ދާއިރާގެ ލީޑަރުން ބައިވެރިވެއެވެ.