އަދީބު 20 އަހަރަށް ޖަލަށް ލައި 2 މިލިއަން ރުފިޔާ އިން ޖޫރިމަނާކޮށްފި

މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ ބޮޑު ހިޔާނާތާ ގުޅިގެން ކުރީ ސަރުކާރުގެ ނައިބު ރައީސް އަހްމަދު އަދީބުގެ މައްޗަށް ކުރި ހަތް ދައުވާ ސާބިތުކޮށް 20 އަހަރަށް ޖަލަށް ލައި ދެ މިލިއަން ރުފިޔާ އިން ޖޫރިމަނާކުރުމަށް ކްރިމިނަކް ކޯޓުން މިރޭ ހުކުމް ކޮށްފިއެވެ.

އަދީބުގެ މައްޗަށް ދައުލަތުން އުފުލާފައި ވަނީ ހިޔާނާތުގެ ދެ ދައުވާއަކާއި މަނީ ލޯންޑަރިންގެ ދެ ދައުވާ އާއި މަގާމުގެ ނުފޫޒު ބޭނުންކޮށްގެން ނަޖާއިޒު ފައިދާ ހޯދުމުގެ ދައުވާ އާއި ނާޖައިޒް ފައިދާ ހޯދައިދިނުމުގެ ދައުވާއަކާއި ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ދައުވާއެކެވެ. އަދަބު ލުއިކޮށްދިނުމާ ގުޅޭ ގޮތުން އަދީބާއި ދައުލަތާ ދެމެދު ވެފައިވާ އިއުތިރާފުގެ އެއްބަސްވުމާ އެއްގޮތަށް އަދީބު މީގެ ކުރިން ވަނީ ދައުވާތަކަށް ޝަރީއަތުގައި އެއްބަސްވެ ވަޑައިގެންފައެވެ.

advertisement

އަދީބުގެ މައްޗަށް ދައުލަތުން ކުރިން ވެސް މި ހަތް ދައުވާ އުފުލިއެވެ. ނަމަވެސް އެ ފަހަރު އެއްބަސްވުމާ ގުޅޭ ގޮތުން ސުވާލު އުފެދޭ ފަދަ ގޮތަކަށް އަދީބު ވާހަކަ ދެއްކެވުމާ އެކު އޭރު ކްރިމިނަލް ކޯޓުން ވަނީ އެއީ ސައްހަ އެއްބަސްވުމެއް ނޫން ކަމަށް ބަލައި މައްސަލަ ކޯޓުން ބޭރުކޮށްލާފައެވެ. ނަމަވެސް ދައުލަތުން އެ މައްސަލަ ހައި ކޯޓުގައި އިސްތިއުނާފުކުރުމާ ގުޅިގެން އަދީބު ވިދާޅުވެފައި ވަނީ އެއީ އެއްވެސް މަޖުބޫރުކަމެއް ނެތި ދައުލަތާ އެކު ހެދި އެއްބަސްވުމެއް ކަމަށެވެ. ކްރިމިނަލް ކޯޓުގައި އަލުން މައްސަލަ ބަލައި އަވަސް ނިޔާގެ މައްސަލައެއްގެ ގޮތުގައި ހުކުމް އިއްވާފައި މި ވަނީ އެ ހަތް މައްސަލަ އަލުން ފަށައިގެން ބެލުމަށް ހައި ކޯޓުން ކުރި އަމުރާ ގުޅިގެންނެވެ.

ވިހި އަހަރުގެ ޖަލު ހުކުމުގެ އިތުރުން ކްރިމިނަކް ކޯޓުން މިރޭ ކުރި ހުކުމުގައި ބުނެފައި ވަނީ މިއަދުން ފެށިގެން އެއް މަސް ދުވަހުގެ ތެރޭގައި މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އަށް ދެ މިލިއަން ރުފިޔާ ދެއްކުމަށެވެ. އަދީބުގެ މައްޗަށް 20 އަހަރުގެ ޖަލު ހުކުމެއް އިއްވި ނަމަވެސް އަދީބު މީގެ ކުރިން ޖަލުގައި ހުންނެވި ދުވަސްތައް އެ ހުކުމުން އުނިވާތީ ޖަލުގައި ހުންނަވަންޖެހިވަޑައިގަންނަވާނީ 19 އަހަރުއެވެ.

އަދީބުގެ މައްޗަށް މީގެ ކުރިން ވެސް ކްރިމިނަލް ކޯޓުން ވަނީ އެކި ދައުވާތަކާ ގުޅިގެން 33 އަހަރަށް ވުރެ ގިނަ ދުވަހުގެ ޖަލު ހުކުމް އިއްވާފައެވެ. ނަމަވެސް މަތީ ކޯޓުތަކުން ވަނީ އެ ހުކުމްތައް ބާތިލްކޮށްފައެވެ.