ސިއްހީ ކުއްލި ނުރައްކަލުގެ ހާލަތު އަނެއްކާވެސް އިތުރުކޮށްފި

ކޯވިޑް19 ގެ ސަބަބުން ރާއްޖޭގައި އިއުލާންކޮށްފައިވާ ސިއްހީ ކުއްލި ނުރައްކަލުގެ ހާލަތު އަންނަ މަހުގެ 5 ވަނަ ދުވަހުގެ ނިޔަލަށް އިތުރުކޮށްފި އެވެ.

އެޗްޕީއޭ އިން ނެރުނު އިއުލާނެއްގައި ބުނެފައި ވަނީ ކޮވިޑް-19 އަދިވެސް ރާއްޖޭގައި ފެތުރިދާނެ ކަމުގެ ބިރު އޮތުމުން ސިއްހީ ކުއްލި ނުރައްކަލުގެ މުއްދަތު އިތުރުކުރަން ނިންމާފައިވާ ކަމަށެވެ. ހެލްތު މިނިސްޓްރީ ހިންގެވުމާ ހަވާލުވެ ހުންނެވި ނެޝަނަލް ޕްލޭނިން މިނިސްޓަރު މުހައްމަދު އަސްލަމް ސޮއި ކުރައްވައި ނެރުނު އިއުލާނުގައި ބުނެފައިވަނީ މިއީ ޑިރެކްޓާ ޖެނަރަލް އޮފް ޕަބްލިކް ހެލްތު މައިމޫނާ އަބޫބަކުރުގެ ލަފައާ އެއްގޮތަށް ނިންމެވި ނިންމެވުމެއް ކަމަށެވެ.

advertisement

ރާއްޖޭގައި ފުރަތަމަ ފަހަރަށް ސިއްހީ ކުއްލި ނުރައްކަލުގެ ހާލަތު އިއުލާނު ކުރީ މާޗު 12 އިން ފެށިގެން 30 ދުވަހަށެވެ. މިއީ އޭގެ ފަހުން އެ މުއްދަތު އިތުރުކުރި އަށް ވަނަ ފަހަރެވެ.

ކޯވިޑް-19 އިން ރައްކާތެރިވާން ސަރުކާރުން ގިނަ ފިޔަވަޅުތަކެއް ވަނީ އަޅުއްވާފައެވެ. މި ފިޔަވަޅުތަކާއިއެކު މިވަގުތު ރާއްޖޭގައި ކޯވިޑް19 ފެތުރުން ކޮންމެވެސް ވަރަކަށް ވަނީ ހިފެހެއްޓިފައެވެ.