ކޯވިޑް19 އަށް ސަރުކާރުން ކުރި ޙަރަދު 1 ބިލިއަނުން މައްޗަށް

ކޯވިޑް19 ގެ އެކި ކަންކަމަށް ސަރުކާރުން ކުރި ހަރަދުތައް 1 ބިލިއަން ރުފިޔާއިން މައްޗަށް އަރައިފިއެވެ.

ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާ ގޮތުން މިމަހުގެ 1 ވަނަ ދުވަހުގެ ނިޔަލަށް ކޯވިޑް19 ގެ ސިއްހީ އަދި އިޖުތިމާއީ ހަރަދުތަކަށް ދައުލަތުން ވަނީ 1.28 ބިލިއަން ރުފިޔާ ހަރަދުކޮށްފަ އެވެ.

advertisement

މި ދާއިރާއިން އެންމެ ބޮޑު ހަރަދެއް ކޮށްފައިވަނީ ނެޝަނަލް ޑިޒާސްޓާ މެނޭޖްމަންޓް އޮތޯރިޓީއަށެވެ. އެއީ ޖުމްލަ 778.1 މިލިއަން ރުފިޔާއެވެ. ދެވަނައަށް އެންމެ ގިނައިން ހަރަދުކުރީ ހެލްތު މިނިސްޓްރީގެ ކަންކަމަށެވެ. އެއީ 200.4 މިލިއަން ރުފިޔާއެވެ.

މި ދާއިރާއިން ހަރަދުކުރި ގޮތަށް ބަލާއިރު، އެންމެ ބޮޑު ހަރަދެއް ކޮށްފައިވަނީ ކޯވިޑް19 އިން ރައްކާތެރިވުމަށް ބޭނުންވާ އެކިއެކި ސާމާނު ހޯދުމަށެވެ. އެގޮތުން 525.7 މިލިއަން ރުފިޔާ ސިއްހީ އެކިއެކި ސާމާނު ހޯދުމަށް ހަރަދުކޮށްފައިވާކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައެވެ.

އޮކްޓޯބަރ މަހުގެ 1 ވަނަ ދުވަހާއި ހަމައަށް ކޯވިޑް19 އާއި ގުޅިގެން އާމްދަނީއަށް އަސަރުކޮށްފައިވާ މީހުންނަށާއި، ސަރުކާރުން ފޯރުކޮށްދޭ ލޯނު ސްކީމްފަދަ އިގްތިސާދީ ކަންކަމަށް ޖުމުލަ 1.03 ބިލިއަން ރުފިޔާ ވަނީ ހަރަދުކޮށްފަ އެވެ.