އިންޑިއާއިން ރާއްޖެ އަންނަ ފަތުރުވެރިން އިތުރުކުރުމަށް ކެންޕެއިންތަކެއް

އިންޑިއާއިން ރާއްޖެ އަންނަ ފަތުރުވެރިން އިތުރުކުރުމަށް އެމްއެމްޕީއާރުސީން ކެންޕެއިންތަކެއް ފަށައިފިއެވެ. މި ކެންޕެއިންތައް ކުރިއަށްގެންދަނީ އެ ގައުމުގެ ކުންފުނިތަކާ ގުޅިގެންނެވެ.

ފުރަތަމަ ކެމްޕޭނަކީ އިންޑިޔާގެ ވެޑިން ޕްލެޓްފޯމް ‘ވެޑިންސުތުރާ’ އާ ގުޅިގެން ހިންގާ ކެމްޕޭނެއްކަމަށް އެމްއެމްޕީޢާރުސީން ބުނެއެވެ. ހަ މަހަށް ކުރިއަށްގެންދާ ކެމްޕޭނުގައި، އަލަށް ކައިވެނި ކުރާ މީހުންނާއި އަދި ހަނީމޫނަށް ދާން ބޭނުންވާ މީހުންނަށް ރާއްޖޭގެ މައުލޫމާތު ވެޑިންސުތުރާ މެދުވެރިކޮށްދޭނެއެވެ.

advertisement

ދެވަނަ ކެމްޕޭނުގައި ރާއްޖެ އިސްތިހާރު ކުރަނީ، ރޭޑިޔޯ ޗެނަލްތަކާއި ގުޅިގެންނެވެ. މިމަހުގެ 16 ގެ ނިޔަލަށް ކުރިއަށްދާ މި ކެންޕެއިން މެދުވެރިކޮށް އިންޑިއާގެ ބޮޑެތި ސިޓީތަކުގައި ރާއްޖެ އިސްތިހާރު ކުރާނެއެވެ.
މީގެ އިތުރުން ސައުތު އޭޝިޔާގެ ގެ ފުރަތަމަ ވާޗުއަލް އެގްޒިބިޝަން، ސައުތު އޭޝިއާ ޓްރެވެލް އެންޑް ޓުއަރިޒަމް އެކްސްޗޭންޖް ގައި އެމްއެމްޕީޢާރުސީން ބައިވެރިވެ ވަނީ ރާއްޖެ އިޝްތިހާރުކޮށްފައެވެ. މިއީ އިންޑިއާގެ ފަތުރުވެރިކަމުގެ ހަރަކާތްތެރިވާ ގިނަ ފަރާތްތަކަކުން ބައިވެރިވާ އިވެންޓެކެވެ. އެމްއެމްޕީއާރުސީ އާއެކު ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ 11 ކުންފުންޏަކުން މި އިވެންޓުގައި ބައިވެރިވިއެވެ.

ކޯވިޑް19 ގެ ކުރިން އިންޑިއާއަކީ ރާއްޖެއަށް އެންމެ ގިނަ އަދަދަކަށް ފަތުރުވެރިން އަންނަ އެއް ޤައުމެވެ. ކޯވިޑް19 އަށްފަހު އަލުން އިންޑިއާ ފަތުރުވެރިން ރާއްޖެ އަންނަ މިންވަރު އިތުރުކުރުމަށް އެމްއެމްޕީއާރުސީން ދަނީ ގިނަ މަސައްކަތްތަކެއް ކުރަމުންނެވެ.