ދޫކޮށްލަން އަމުރުކުރީ އެކައުންޓްތައް، ކުރީގެ ރައީސް ޔާމީނެއް ނޫން

ބުރާސްފަތި ދުވަހު ސުޕްރީމް ކޯޓުން އިއްވި ހުކުމަކަށް ފަހު އިދިކޮޅު ފަރާތްތަކަށް ހީވަނީ އީދެއް އައިސްގެން އުޅޭހެންނެވެ. މަނީލޯންޑަރިންގެ ކުށުގައި ފަސް އަހަރުގެ ޖަލު ހުކުމެއް ތަންފީޒުކުރައްވަމުން ގެންދަވާ ކުރީގެ ރައީސް އަބްދުﷲ ޔާމީންގެ ކުށެއް ނެތް ކަމަށް ސުޕްރީމް ކޯޓުން ހުކުމް ކުރީއޭ ވެސް ހީވާ ކަހަލައެވެ. އަދި ސުޕްރީމް ކޯޓުގެ އެ ހުކުމުގެ ސަބަބުން ރައީސް ޔާމީންގެ ކުށެއް ނެތް ކަން ސާބިތުވެއްޖެ ކަަމަށް ވެސް ބައެއް ފަރާތްތަކުން ދަނީ ބުނަމުންނެވެ. އަދި އެމަނިކުފާނު ވަގުތުން ވަގުތަށް މިނިވަންކުރަން ވެސް ދަނީ ގޮވާލަމުންނެވެ. ނަމަވެސް ސުޕްރީމް ކޯޓުން ހުކުމެއް ކުރީ އެމަނިކުފާނުގެ މައްޗަށް ދަށު ކޯޓަކުން ކޮށްފައި އޮތް ހުކުމެއް ބާތިލްކުރާކަށް ނޫނެވެ. ހުކުމެއް ކުރީ އެމަނިކުފާނުގެ ބޭންކް އެކައުންޓްތަކާ މެދު ދައުލަތުގެ އިދާރާއަކުން އަމަލުކުރި ގޮތް ގޯސް ކަމަށެވެ. އެމަނިކުފާނު ކުށެއް ނުކުރައްވާ ކަމަށް ހުކުމް ކުރީއަކީ ނޫނެވެ. 

ސުޕްރީމް ކޯޓުން ބުރާސްފަތި ދުވަހު ނިޔާ ކަނޑައެޅީ އިސްލާމިކް ބޭންކްގައި އޮތް ރައީސް ޔާމީންގެ އެކައުންޓެއް ފްރީޒްކުރަން ކްރިމިނަކް ކޯޓުން ކުރިން ނެރުނު އަމުރެއް މިދިޔަ އަހަރުގެ މާޗް މަހުގެ ތެރޭގައި ހައި ކޯޓުން ބާތިލްކޮށް އެކައުންޓްތައް ދޫކޮށްލުމުން އެކަމާ ހިތްހަމަނުޖެހި ދައުލަތުން ސުޕްރީމް ކޯޓުގައި އެ އަމުރު އިސްތިއުނާފުކުރުމުންނެވެ. އެ އެކައުންޓް ފްރީޒްކުރަން ފުލުހުން ކްރިމިނަކް ކޯޓުގައި އޭރު އެދުނީ އެންޓި ކޮރަޕްޝަން ކޮމިޝަން (އޭސީސީ)އާ އެކު ރައީސް ޔާމީން ހެއްދެވި އެކްސްކްރޯ އެކައުންޓަށް ޖަމާކުރި އެއް މިލިއަން ޑޮލަރުގެ މައްސަލާގައި މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ފޮނުވި ސަސްޕިޝަސް ޓްރާންސެކްޝަން ރިޕޯޓަކާ ގުޅިގެންނެވެ. 

advertisement

ސުޕްރީމް ކޯޓުގެ ހުކުމުގައި ބުނެފައި ވަނީ ފުލުހުން ފްރީޒްކުރަން އެދުނީ ދައުލަތަށް ނެގިދާނެ ކަމަށް ގަބޫލުކުރެވޭ ފައިސާތަކެއް ކަމަށާއި ކުށުގެ ތުހުމަތަށް ވުރެ ގިނަ އަދަދެއްގެ ފައިސާ އެކައުންޓްގައި ހުރި ނަމަވެސް އެދެވޭނީ ތުހުމަތުކުރެވޭ މިންވަރު ފްރީޒްކުރުމަށް ކަމަށެވެ. މީހެއްގެ ހުރިހާ އެކައުންޓްތަކާއި ހުރިހާ ފައިސާއެއް ފްރީޒްކުރަން ވެސް އެދެވިދާނެ ކަމަށާއި ނަމަވެސް އެކަމަށް ވެސް ކޯޓަށް ހުށަހަޅަންޖެހޭނެ ކަމަށެވެ. ސުޕްރީމް ކޯޓުން ބުނެފައި ވަނީ ރައީސް ޔާމީނުގެ އެކައުންޓްތައް ފްރީޒްކޮށްފައި ވަނީ އެއާ ހިލާފަށް ކަމަށާއި ރައީސް ޔާމީނާއި އޭސީސީއާ ދެމެދު ހަދާފައިވާ އެކްސްކްރޯ އެކައުންޓަށް އެމަނިކުފާނުގެ އަމިއްލަފުޅު އެކައުންޓަކުން ޖަމާކުރއްވި އެއް މިލިއަން ޑޮލަރާ މެދު ޝައްކުކުރެވޭ އިރު އެ ފައިސާއާ އެކައުންޓްގައި ހުރި އެހެން ފައިސާއާ ގުޅޭ ގޮތެއް ދައުލަތުގެ ފަރާތުން ކްރިމިނަކް ކޯޓުގައި ވެސް އަދި ހައި ކޯޓުގައި ވެސް ބަޔާންކޮށްދީފައި ނުވާ ކަމަށެވެ. އަދި އެ އެކައުންޓްގައި ހުރި ފައިސާއާ އެމްއެމްޕީއާރުސީގެ ހިޔާނާތާ ގުޅޭ ގޮތެއް ވެސް އެ މައްސަލައިގެ ތެރޭގައި ދައުލަތުން ބަޔާންކޮށްދީފައި ނުވާ ކަމަށް ހުކުމުގައި ވެއެވެ. 

އެހެން ނަމަވެސް އެކައުންޓްތައް ދޫކޮށްލުން ސުޕްރީމް ކޯޓުން ދެމެހެއްޓި ހައި ކޯޓުގެ ހުކުމަށް ރިއާޔަތްކޮށްފައެއް ނޫނެވެ. ސުޕްރީމް ކޯޓުން މި މައްސަލާގައި ގޮތް ނިންމި އިރު ހައި ކޯޓުން މައްސަލައަށް ވާސިލްވުމަށް ބެލި ކަންކަން ވަނީ ބާތިލްކޮށްފައެވެ. އެ ގޮތުން ހައި ކޯޓުން ޖިނާއީ އިޖުރާއަތުގެ ގާނޫނު މާނަކުރި ގޮތް ރަނގަޅު ނޫން ކަމަށް ސުޕްރީމް ކޯޓުން ނިންމިއެވެ. ކްރިމިނަކް ކޯޓުގެ އަމުރު ހައި ކޯޓުން އޭރު ބާތިލުކުރީ ޖިނާއީ އިޖުރާއަތުގެ ގާނޫނާ ހިލާފަށް އަމުރު ހޯދާފައިވާ ކަމަށް ބުނެއެވެ. އެއީ ފްރީޒްކުރުމުގެ އަމުރަކަށް އެދުމުގެ ކުރިން އެކައުންޓް މޮނިޓާކުރަން އަމުރަކަށް އެދެންޖެހޭނެ ކަމަށް ބަލައެވެ. ނަމަވެސް ސުޕްރީމް ކޯޓުގެ ހުކުމުގައި ބުނެފައި ވަނީ އެކައުންޓް ފްރީޒްކުރަން އަމުރަކަށް އެދޭ އިރު މޮނީޓާކުރުމުގެ އަމުރަކަށް ކުރިން އެދިފައި އޮތުން ލާޒިމް ނޫން ކަމަށް ސުޕްރީމް ކޯޓުން ވަނީ މި މައްސަލާގައި ކަނޑާއަޅާފައެވެ. ޖިނާއީ އިޖުރާއަތުގެ ގާނޫނުގެ 72 ވަނަ މާއްދާގައިވާ ގޮތުން ކޯޓު އަމުރެއް މެދުވެރިކޮށް ނުވަތަ ލިޔުމަކުން ބޭންކްގައި އެދިގެން، ބޭންކުގެ ކަސްޓަމަރުންގެ އެކައުންޓްތަކާއި، ޑިޕޮސިޓްތަކާއި، ޓްރަސްޓްތަކާއި، ސޭފް ޑިޕޮސިޓް ބޮކްސްތަކުގެ މައުލޫމާތުތައް ހޯދިދާނެ ކަމަށް ބަޔާންކުރާ ކަމަށް ސުޕްރީމް ކޯޓުގެ ހުކުމުގައި ވެއެވެ. 

ކޮންމެއަކަސް ސުޕްރީމް ކޯޓުގައި ނިމިދިޔަ މައްސަލައަކީ ރައީސް ޔާމީންގެ އެކައުންޓްތަކަކާ މެދު ދައުލަތުގެ އިދާރާއަކުން އަމަލުކުރި ގޮތާ ގުޅިގެން ހިނގައިދިޔަ މައްސަލައެކެވެ. އެ އެކައުންޓްތަކުގައި ހުރި ފައިސާގެ ސައްހަކަމާއި އަދި އޭގެ ތެރޭގައި ހިޔާނާތުގެ ފައިސާ ހުރިތޯ ނެތްތޯ ވެސް ސުޕްރީމް ކޯޓަކުން ކަނޑައެއް ނާޅައެވެ. އަދި މަނީ ލޯންޑަރިންގެ މައްސަލައަކާ ގުޅިގެން ރައީސް ޔާމީނުގެ މައްޗަށް ކުރި ހުކުމާ ގުޅޭ ގޮތުން ވެސް ސުޕްރީމް ކޯޓުން މި މައްސަލާގައި ގޮތެއް ނިންމީއަކީ ނޫނެވެ. 

އަނެއްކޮޅުން މި ހުކުމުން ވަރަށް ގިނަ ކަންކަން ސާފު ވެއްޖެއެވެ. މިދިޔަ ސަރުކާރު އޮތް އިރު ސުޕްރީމް ކޯޓާއި ނުވަތަ މުޅި ޝަރުއީ ދާއިރާ އޮތް ގޮތް ވަރަށް ބޮޑަށް ބަދަލުވެއްޖެ ކަމުގެ ހެކި މި ހުކުމުން ވެސް ފެނިގެން ދިޔައެވެ. މީގެ ކުރިން ދައުލަތުން ނުރުހޭ ހުކުމެއް ނެރެފި ނަމަ ފަނޑިޔާރުންނާ މެދު އަމަލުކުރެވޭ ގޮތް އޮތީ ތާރީހުގައި ލިޔެވިފައެވެ. ހާއްސަކޮށް ސުޕްރީމް ކޯޓުން ހުކުމްތައް ނެރުނު ގޮތާއި ސަރުކާރުން ނުރުހޭ ހުކުމެއް ނެރުމުން ފަނޑިޔާރުންތަކެއް ކުޑަގޮޅިއަށް ލައި އެ ފަރާތްތަކުގެ މައްޗަށް ދައުވާކޮށް ޖަލު ހުކުމްތައް ކުރި ގޮތް ހަނދާންނެތޭހާ ދުވަހެއް ނުވެއެވެ. މި ހުކުމުން ފެނިގެން ދިޔައީ އިންސާފަކީ ވަކި މީހަކަށް އޮތް އެއްޗެއް ނޫން ކަމެވެ. އަދި އެއީ ހަމައެކަނި ސަރުކާރުން ބޭނުންވާ ގޮތަށް ނެރޭ ހުކުމަކުން ވެސް ވާކަމެއް ނޫން ކަމެވެ. ސުޕްރީމް ކޯޓުގެ ފަނޑިޔާރުންނަށް އައިސްފައިވާ ބަދަލަކީ ހެޔޮ ބަދަލެއްކަން މި ހުކުމުން ވެސް ސާބިތުވެއެވެ. 

ސުޕްރީމް ކޯޓުގެ ހުކުމަކީ އިންސާފުކަމަށް އިދިކޮޅު ފަރާތްތައް ވެސް ގަބޫލުކޮށްފިއެވެ. ނަމަވެސް މިހާރު ވެސް ސުޕްރީމް ކޯޓު ހިނގަނީ އެ ފަރާތްތައް ބޭނުންވާ ގޮތަށް ކަމަށް އެ ފަރާތްތަކަށް ހީވެފައި އޮތް ކަހަލައެވެ. ހުކުމް ވެސް މާނަކުރަން އެނގެނީ އެ ފަރާތްތަކަށެވެ. ނަމަވެސް އެކައުންޓެއް ނުވަތަ އެކައުންޓްތަކެއް ފްރީޒްކުރި ގޮތް ގޯސް ކަމަށް ކަނޑައެޅުމަކީ ރައީސް ޔާމީން ހުދުކާފޫރަށް ހަދައި އެމަނިކުގެ ކުށެއް ނެތްކަން ސާބިތުވީ ކަމަށް ހެދޭނެ ހުއްޖައްތެއް ނޫނެވެ. މިވަގުތާ ހަމައަށް ޝަރުއީ ދާއިރާ އިން ނެރެފައި އޮތް ހުކުމުގައި އޮތީ ރައީސް ޔާމީނަކީ ކުށްވެރިއެއް ކަމަށެވެ. ފަސް އަހަރު ދުވަހުގެ ޖަލު ހުކުމާއި ފަސް މިލިއަން ރުފިޔާގެ ޖޫރިމާ މަތީ ކޯޓަކުން ބާތިލްނުކުރާހާ ހިނދަކު އެކަން އޮންނާނީ އެހެންނެވެ. ދޫކޮށްލަން އަމުރުކުރީ އެކައުންޓްތަކެވެ. އެމަނިކުފާނުގެ ކުށެއް ނެތް ކަމަށް ކަނޑައަޅައި މިނިވަންކުރަން ސުޕްރީމް ކޯޓަކުން އަމުރެއް ނުކުރެއެވެ.