ސައުތު ކޮރެއާގައި ރާއްޖެ އިޝްތިހާރުކުރުމަށް ކެންޕެއިންތަކެއް ފަށައިފި

ސައުތު ކޮރެއާގައި ރާއްޖެ އިޝްތިހާރު ކުރަން އެމްއެމްޕީއާރުސީން ހާއްސަ ހަރަކާތްތަކެއް ފަށައިފި އެވެ.

ސައުތު ކޮރެއާގައި ރާއްޖެ އިޝްތިހާރުކުރުމަށް އެމްއެމްޕީއާރުސީން ތިން ހަރަކާތެއް ކުރިއަށް ގެންދާނެކަމަށް އެ ކޯޕަރޭޝަނުން ބުނެއެވެ. އޭގެ ތެރޭގައި އައުޓްޑޯ ބަސް ކެމްޕެއިންއަކާއި، “ރީ-ޑިސްކަވާ މޯލްޑިވްސް، ދަ ސަނީ ސައިޑް އޮފް ލައިފް”ގެ ނަމުގައި އޮންލައިން ޕްރޮމޯޝަނެއްގެ އިތުރުން ހަނީމޫންތަކަށް ހާއްސަ އޮންލައިން ޕްރޮމޯޝަނެއް ހިމެނެ އެވެ.

advertisement

އައުޓްޑޯ ބަސް ކެމްޕެއިން ކުރިއަށްދާނީ ތިން މަސްދުވަހުގެ މުއްދަތަކަށެވެ. މި ކެމްޕޭނުގެ ދަށުން ސައުތު ކޮރެއާގެ ގޭންގްނަމް ސަރަހައްދުގެ ފަސް ބަހެއްގައި ރާއްޖެ އިޝްތިހާރު ކުރާނެއެވެ. މި ކެމްޕޭނުގައި ބޭނުންކުރާ މެސެޖުތަކާއި ފޮޓޯތަކުން ފަތުރުވެރިންނަށް ދައްކައިދޭނީ ރާއްޖޭގެ ޖަޒީރާވަންތަކަމާއި ރައްކާތެރިކަމެވެ. މި ކެމްޕެއިނުގެ ސަބަބުން 150 މިލިއަނަށް ވުރެ ގިނަ މީހުންގެ މެދުގައި ރާއްޖެ އިޝްތިހާރު ވާނެ ކަމަށް އެމްއެމްޕީއާރުސީން ބުނެއެވެ.

އޮންލައިން ޕްރޮމޯޝަނުގެ ދަށުން ސައުތު ކޮރެއާގެ އެންމެ ބޮޑު އެއް ސާޗް އިންޖީން، ‘ނޭވާ’ ޕޯޓަލުގައި ކީވޯޑު އެޑުގެ ޒަރިއްޔާއިންނާއި ފޭސްބުކް އަދި އިންސްޓަގްރާމުގައި ރާއްޖެ އިޝްތިހާރު ކުރާނެ އެވެ. ހަނީމޫން ހޭދަކުރުމަށް ރާއްޖެ އަންނަ ފަތުރުވެރިން އިތުރުކުރުމަށް ސައުތު ކޮރެއާގެ އެންމެ މަޝްހޫރު ދެ އޭޖެންޓުން މެދުވެރިކޮށް ރާއްޖެ އިޝްތިހާރު ކުރާނެ އެވެ.

މިހުރިހައި ކެންޕެއިނެއްގެވެސް ބޭނުމަކީ ރާއްޖެ އަންނަ ފަތުރުވެރިން އިތުރުކޮށް ކޯވިޑް19 އަށްފަހު ރާއްޖޭގައި ސަލާމަތާއި ރައްކާތެރިކަމުގެ ގޮތުން އަޅާފައިވާ ފިޔަވަޅުތައް ފަތުރުވެރިންނަށް ބުނެދިނުމެވެ.