ފެންވަރު ރަނގަޅު ނަފްސާނީ ފަރުވާގެ މުހިންމުކަން ކޮވިޑްގެ ސަބަބުން އެނގިއްޖެ: ރައީސް ސޯލިހް

ފެންވަރު ރަނގަޅު ނަފްސާނީ ފަރުވާގެ މުހިންމުކަން ކޮވިޑް-19ގެ ސަބަބުން އެނގިގެން ހިނގައްޖެ ކަމަށް ރައީސް އިބްރާހީމް މުހައްމަދު ސޯލިހް ވިދާޅުވެއްޖެއެވެ.

އިއްޔެ ފާހަގަކުރި ވޯލްޑް މެންޓަލް ހެލްތު ޑޭއާ ގުޅޭ ގޮތުން ރައީސް ސޯލިހް ކުރެއްވި ޓްވީޓެއްގައި ވިދާޅުވެފައި ވަނީ ރާއްޖޭގެ އެކި ކަންކޮޅުތަކުގައި ނަފްސާނީ ފަރުވާގެ ހިދުމަތް ފުޅާކުރުމަށް ސަރުކާރުން ތައްޔާރަށް އޮތް ކަމަށާއި މި ސަރުކާރުގެ ސިއްހީ ސިޔާސަތުގެ ތެރޭގައި ވެސް ރާއްޖޭގެ އެކި ސަރަހައްދުތަކުން ނަފްސާނީ ފަރުވާ ލިބޭނެ އިންތިޒާމު ހަމަޖެއްސުން ހިމެނިފައިވާ ކަށެވެ. އެ މަނިކުފާނު ވަނީ އެ ވައުދު އަލުން އާކުރައްވާފައެވެ.

advertisement

މި ސިޔާސަތުގެ ދަށުން މިދިޔަ އަހަރުގެ ތެރޭގައި ނަފްސާނީ ބައްޔަށް ހާއްސަ މަރުކަޒެއް އައިޖީއެމްއެޗްފައި ގާއިމުކޮށްފައި ވެއެވެ. އަދި ގިނަ ބަޔަކު އެ ތަނުން ފަރުވާ ހޯދަމުން އައި ނަމަވެސް އެތަނުގެ ހިދުމަތްތައް ފުޅާކުރުމުގެ މަސައްކަތް ކޮވިޑް-19ގެ ބަލިމަޑުކަމާ ގުޅިގެން ވަނީ މަޑުޖެހިފައެވެ. އެ ގޮތުން ނަފްސާނީ ބަލިތަކަށް ހާއްސަ ވާރޑެއް ގާއިމުކުރުމުގެ މަސައްކަތް މިހާރު ވެސް އައިޖިއެމްއެޗުން އަންނަނީ ކުރަމުންނެވެ. އެ ގޮތުން އެތަނަށް ޑޮކްޓަރުންނާއި ނަރުހުން ހޯދުމުގެ މަސައްކަތް ވެސް އަންނަނީ ކުރަމުންނެވެ.

ކޮވިޑް-19ގެ ބަލިމަޑުކަމުގެ ސަބަބުން ގޭގައި ބަންދުވެފައި ތިބެން ޖެހުމުން ނަފްސާނީ ގިނަ މައްސަލަތަކެއް ރިޕޯޓްކުރެވިފައިވާ ކަމަށް މީގެ ކުރިން ކަމާ ބެހޭ ފަރާތްތަކުން ހާމަކޮށްފައި ވެއެވެ. އަދި އެފަދަ ފަރާތްތަކަށް އެހީވުމަށް ކޮވިޑް ސެންޓަރުގައި ހާއްސަ މަސައްކަތްތަކެއް ވެސް ކުރަމުން ގެންދެއެވެ. އެ ގޮތުން ކަރަންޓީނުގައި ތިބޭ ފަރާތްތަކަށް ވެސް އެހީތެރިކަން އަންނަނީ ފޯރުކޮށްދެމުންނެވެ.