މެދުއިރުމަތީގައި ރާއްޖެ ޕްރޮމޯޓުކުރަން އެމްއެމްޕީއާރުސީން 2 ކެމްޕެއިނެއް ފަށައިފި

މެދުއިރުމަތީގައި ރާއްޖެ ޕްރޮމޯޓުކުރަން އެމްއެމްޕީއާރުސީން 2 ކެމްޕެއިނެއް ފަށައިފި އެވެ.

މިއީ އެމްއެމްޕީއާރުސީން ކުރިއަށްގެންދާ “ރީޑިސްކަވާ މޯލްޑިވްސް ދަ ސަނީ ސައިޑް އޮފް ލައިފް” ތީމްގެ ދަށުން ކުރިއަށްގެންދާ ކެންޕެއިންތަކެކެވެ. މި ކެންޕެއިންތައް ކުރިއަށްގެންދަނީ ޑިނާޓާ ޓްރެވަލް އަދި އެމިރޭޓްސް ވިމެންއާއެކުއެވެ.

advertisement

ޑިނާޓާއާއިއެކު ކުރިއަށްގެންދާ ޕްރޮމޯޝަން ކުރިއަށްދާނީ 2 މަސްދުވަހަށްކަމަށް އެމްއެމްޕީއާރުސީން ބުނެއެވެ. މި ކެމްޕޭނުގައި ޑިނާޓާގެ ވެބްސައިޓުގައި ރާއްޖެއަށް ހާއްސަ ޕޭޖެއްގައި ރާއްޖެ ޕްރޮމޯޓުކޮށް އިޝްތިހާރު ކުރާނެއެވެ. އަދި އީޑީއެމްއާއި ޕްރޮމޯޝަނަލް ވީޑިއޯއާއި ސޯޝަލް މީޑިއާ އިޝްތިހާރުތަކާއި ފްލަޔާސްގެ އިތުރުން ރީޓެއިލް ޕީއޮސް އާއި ތަމްރީނު ކުރުންތައް ވެސް މި ކެމްޕޭންގެ ދަށުން ކުރިއަށްގެންދާނެ އެވެ.

ދެވަނަ ކެމްޕޭން ކުރިއަށްގެންދަނީ މެދުއިރުމައްޗަށް ހާއްސަކޮށް ލިޔުންތައް ތައްޔާރު ކުރުމުގައި 40 އަހަރަށްވުރެ ދިގު މުއްދަތެއްގެ ތަޖުރިބާ ލިބިފައިވާ އެމިރޭޓްސް ވިމެންއާއެވެ. ދެ ހަފުތާގެ މުއްދަތަކަށް ކުރިއަށްގެންދާ މި ކެމްޕޭނުގައި ހިމެނޭ ލިޔުންތައް ފާހަގަކުރާނީ ޔޫއޭއީގެ ފަތުރުވެރިން ރާއްޖެއަށް ދަތުރުކުރުމުގައި އިސްކަންދޭން ޖެހޭ ކަމަށެވެ. ރާއްޖޭގެ ރީތިކަން ސިފަކޮށްދޭ މަންޒަރުތަކާއި ފަތުރުވެރިން ބޭނުންވާ ފަދަމުހިންމު ލިންކުތައް ވެސް މި ލިޔުންތަކުގައި ހިމެނެނޭ އެވެ. މި ކެންޕެއިންގެ ތެރެއިން ގާތްގަނޑަކަށް 234،000 ސޯޝަލް މީޑިއާ ފޮލޮވާސްއަށް ރާއްޖެ އިޝްތިހާރު ކުރެވޭނެ ކަމަށް އެމްއެމްޕީއާރުސީން ބުނެ އެވެ.

މި ދެ ކެމްޕޭނުގެ މަގްސަދަކީ މެދުއިރުމަތީގައި ރާއްޖެ އިތުރަށް މަގުބޫލުކޮށް، ރާއްޖެއަކީ މި ދުވަސްވަރު ވެސް ޒިޔާރަތްކުރަން ރައްކާތެރި މަންޒިލެއް ކަމުގެ ޔަގީންކަން މެދުއިރުމަތީގެ ފަތުރުވެރިންނަށް ދިނުމެވެ.