ބްރޯޑްކޮމް އިން ޒީނާ ވަކިކުރަން ކޮމިޓީން ފާސްކޮށްފި

މޯލްޑިވްސް ބްރޯޑްކާސްޓިން ކޮމިޝަންގެ މެންބަރު ޒީނާ ޒާހިރު ވަކިކުރަން މަޖިލީހުގެ ތަޅުމަށް ފޮނުވަން މިނިވަން މުއައްސަސާތަކާ ބެހޭ ކޮމިޓީން ފާސްކޮށްފިއެވެ.

ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން މި ގޮތަށް ނިންމާފައި ވަނީ ޒީނާ މިއަދު ކޮމިޝަނަށް ހާޒިރުކުރުމަށް ފަހުއެވެ. ނުވަ މެންބަރުން ތިއްބެވި މި ބައްދަލުވުމުގައި ޒީނާ ވަކިކުރަން ފަސް މެންބަރަކު ވަނީ ވޯޓު ދެއްވާފައެވެ.

advertisement

ޒީނާ ވަކިކުރަން މަޖިލީހުގެ ތަޅުމަށް ފޮނުވަން ކޮމިޓީން މިއަދު ނިންމުމުގެ ކުރިން މެންބަރުން ވަނީ ޒީނާއާ ގިނަ ސުވާލުތަކެއް ކޮށްފައެވެ. އެ ގޮތުން ރާއްޖެ ޓީވީއާ މެދު ފިޔަވަޅު އެޅުމަށް ޑިފެންސް މިނިސްޓްރީ އަށް ސިޓީ ފޮނުވުމަށް ޒީނާ ތާއިދުކުރުމާއި ހާޒިރީއާ ގުޅޭ ގިނަ ސުވާލުތަކެއް މެންބަރުން ކުރައްވާފައި ވެއެވެ.

ބްރޮޑްކޮމްގައި ތިއްބެވި މެންބަރުންގެ ތެރެއިން 19 ވަނަ މަޖިލިސް އައި ފަހުން މިހާތަނަށް ހަތަރު މެންބަރަކު ވަކިވެފައި ވެއެވެ. އޭގެ ތެރެއިން ބައެއް މެންބަރުން ވަނީ އެ ބޭފުޅުން ވަކިކުރަން ކޮމިޓީން ނިންމުމާ ގުޅިގެން އިސްތިއުފާ ދެއްވާފައެވެ.

ޒީނާ ވަކިކުރުމުގެ މައްސަލަ މަޖިލީހުގައި އޮންނަތާ ގިނަ ދުވަސްތަކެއް ވެއްޖެއެވެ. ނަމަވެސް އެކަން ނުނިމި ދިގުލައިގެން ދިޔައީ ވިހެއުމާ ގުޅިގެން ޒީނާ ޗުއްޓީގައި ހުންނެވުމާއި އޭގެ ފަހުން މަޖިލީހުގެ ގަވާއިދަށް ގެނައި ބަދަލަކާ ގުޅިގެން އަލުން މަޖިލީހުގެ ތަޅުމުގައި ނަން އިއްވައި މިނިވަން މުއައްސަސާތަކުގެ ކޮމިޓީން އެ މައްސަލަ ބަލަންޖެހުމާ ގުޅިގެންނެވެ. ޒީނާގެ ނަން މަޖިލީހުގެ ތަޅުމުގައި އިއްވާފައި ވަނީ މި އަހަރުގެ ދެ ވަނަ ދައުރުގެ ތެރޭގައި މަޖިލިސް ޗުއްޓީ އަށް ދިއުމުގެ ކުރިންނެވެ.