ބްރިޖްގެ ޓެންޑަރިންގެ މަސައްކަތް ދެތިން ދުވަހެއްގެ ތެރޭގައި ފެށޭނެ: ސަންޖޭ

މާލެ އާއި ވިލިމާލެ އަދި ގުޅިފަޅާއި ތިލަފުށި ގުޅުވައިދޭ މާލޭ ކަނެކްޓިވިޓީ ބްރިޖްގެ ޓެންޑަރިންގެ މަސައްކަތް ކުރިއަށް އޮތް ދެތިން ދުވަހުގެ ތެރޭގައި ފެށޭނެ ކަމަށް އިންޑިއާގެ ސަފީރު ސަންޖޭ ސުދީރު ވިދާޅުވެއްޖެއެވެ.

ބްރިޖް އެޅުމަށް އިންޑިއާގެ އެގްޒިމް ބޭންކުން ދޭ 400 މިލިއަން ޑޮލަރު (6.1 ބިލިއަން ރުފިޔާ)ގެ ލައިން އޮފް ކްރެޑިޓްގެ ސޮއިކުރުމުގެ ރަސްމިއްޔާތުގައި ވާހަކަ ދައްކަވަމުން ސަންޖޭ ވިދާޅުވީ ކޮންޓްރެކްޓަރުން ހޮވުމުގެ އެންމެ ފަހު ޓެންޑާ އިޝޫކުރާނީ ދިވެހި ސަރުކާރުން ކަމަށެވެ. އަދި ބްރިޖާ ގުޅޭ މަސައްކަތްތަކުގައި ދިވެހިން ކުންފުނިތައް ބައިވެރިވާނެ ކަމަށް ވެސް އޭނާ ވިދާޅުވިއެވެ.

advertisement

މި މަޝްރޫއު ކުރިއަށް ގެންދާނެ ފަރާތެއް ހޮވާނީ އިންޓަނޭޝަނަލް ބިޑިން ޕްރޮސެސްގެ ދަށުންނެވެ. ނަމަވެސް މިއީ އިންޑިއާގެ ފަންޑިންގެ ދަށުން ހިންގާ މަޝްރޫއަކަށް ވާތީ މި މަޝްރޫއަށް ބޭނުންވާ 65-75 ޕަސެންޓް ސާމާނު ގެންނަންޖެހޭނީ އިންޑިއާގެ ކުންފުނިތަކުން ކަމަށް، ވެފައިވާ އެއްބަސްވުމުގައި ޝަރުތުކޮށްފައި ވެއެވެ.

މި މަޝްރޫއަށް 500 މިލިއަން ޑޮލަރު ހޭދަވާނެ ކަމަށް ބެލެވޭ އިރު 100 މިލިއަން ޑޮލަރު ހަމަޖައްސާނީ އިންޑިއާ ސަރުކާރުގެ ހިލޭ އެހީގެ ދަށުންނެވެ. މި މަޝްރޫއުގެ ދަށުން ތިލަފުށީން ފެށިގެން މާލެއާ ދެމެދު ބްރިޖްތަކުން ގުޅާލުމުގެ އިތުރުން ބްރިޖާ ގުޅޭ މަގުތައް ތަރައްގީކުރާނެއެވެ. މި މަޝްރޫއުގެ ކޮންސަލްޓެންސީ މަސައްކަތް ހަވާލުކޮށްފައި ވަނީ “އެމްއެސް ގްރޫޕް”އާ އެވެ. މި މަޝްރޫއުގެ ދިރާސާތައް ކޮށް ނިމި ޑީޓެއިލް ރިޕޯޓަށް ދެ ސަރުކާރުން ވެސް އެޕްރޫވަލް ވަނީ ދީފައެވެ. މިއީ މި ސަރުކާރުން މިހާތަނަށް އިއުލާނުކޮށްފައިވާ އެންމެ ބޮޑު މަޝްރޫއެވެ. މީގެ އިތުރުން ވެސް މި ސަރުކާރުން ހިންގާ ގިނަ މަޝްރޫއުތަކަކަށް އިންޑިއާ ސަރުކާރުން އަންނަނީ އެހީތެރިކަން ފޯރުކޮށްދެމުންނެވެ. އަދި ބަޖެޓް ސަޕޯޓްގެ ގޮތުގައި އިންޑިއާ ސަރުކާރުގެ ގެރެންޓީއާ އެކު ސްޓޭޓް ބޭންކް އޮފް އިންޑިއާ އިން ވަނީ 250 މިލިއަން ޑޮލަރުގެ ލޯނު އެހީ ދީފައެވެ.