ވެރިކަމުގެ ނިޒާމު ބަދަލުކުރަން އެދެން، އެކަމަކު މިއީ އެ ބަހުސްގެ ދަނޑިވަޅެއް ނޫން: މަޖިލީހުގެ ރައީސް

ރާއްޖޭގައި ވެރިކަން ކުރާ ނިޒާމު ބަރުލަމާނީ ނިޒާމަށް ބަދަލުކުރުމަށް ބޭނުންފުޅުވާ ކަމަށާއި ނަމަވެސް މިއީ އެ ވާހަކަ ދައްކަން އެންމެ ރަނގަޅު ވަގުތު ނޫން ކަމަށް ކުރީގެ ރައީސް އަދި މަޖިލީހުގެ މިހާރުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ވެރިކަންކުރާ ނިޒާމު ބަދަލުކުރުމަށް ކާށިދޫ ދާއިރާގެ މެންބަރު އަބްދުﷲ ޖާބިރު މިއަދު ހުށަހެޅުއްވި ބިލާ ގުޅިގެން އެކަމާ ބެހޭ ގޮތުން ވާހަކަ ދައްކަވަމުން ރައީސް ނަޝީދު ވިދާޅުވީ ވެރިކަމުގެ ނިޒާމުގެ އިސްލާހުކުރުމުގެ ވާހަކައަކީ އެ މަނިކުފާނު ދައްކަވާ ވާހަކަފުޅެއް ކަމަށާއި އެހެން ނަމަވެސް މިއީ އެ ބަހުސް ފަށަންވީ ވަގުތު ނޫން ކަމަށެވެ. އަދި ޖާބިރު ހުށަހަޅުއްވާފައި ވަނީ އެފަދަ އިސްލާހެއް ނޫން ކަމަށާއި ނަމަވެސް މަޖިލީހުގެ ގަވާއިދުގެ ދަށުން އެ ބިލް ވެސް އެޖެންޑާކުރަންޖެހޭ ކަމަށް އެމަނިކުފާނު ވިދާޅުވިއެވެ.

advertisement

ޖާބިރު ހުށަހެޅުއްވި ބިލުގައި ވަނީ ރާއްޖޭގެ ވެރިކަމުގެ ނިޒާމު ރައްޔިތުންގެ ފެންނަ ނުފެންނަ ވޯޓަކުން ކަނޑައަޅާފައިވީ ނަމަވެސް ގާނޫނު އަސާސީގައި އެ ގޮތަށް ބަޔާންކޮށްފައި ނެތް ކަމަށެވެ. އަދި 2008 ވަނަ އަހަރު ބޭއްވި އިންތިހާބުތަަކަށް ފަހު ރާއްޖޭގައި ވެރިކަން ކުރަމުން އަންނަނީ ބަރުލަމާނީ ނިޒާމުގެ ސިފަތަކުގެ މައްޗަށް ކަމަށާއި އެހެންކަމުން ގާނޫނު އަސާސީ އިސްލާހުކޮށްގެން ވެރިކަމުގެ ނިޒާމު ބަދަލުކުރުމަކުން ރައްޔިތުންގެ ހައްގަކަށް އުނިކަމެއް ނާންނާނެ ކަމަށް ޖާބިރުގެ ބިލުގައި ފާހަގަކުރައްވާފައި ވެއެވެ.

އާ ގާނޫނު އަސާސީ އެކުލަވައިލި އިރު ރާއްޖޭގައި ބޭއްވުމަށް ފެންނަ ނިޒާމަކާ ގުޅޭ ގޮތުން ރައްޔިތުންގެ ފެންނަ ނުފެންނަ ވޯޓެއް ނަގާފައި ވަނީ 2007 ވަނަ އަހަރު އެވެ. އެ ފަހަރު ވެސް ރައީސް ނަޝީދާއި އެމަނިކުފާނުގެ ޕާޓީން ކެމްޕެއިން ކުރެއްވީ ބަރުލަމާނީ ނިޒާމަކަށެވެ. އެ ފަހަރު ގިނަ ރައްޔިތުން ވޯޓު ދިނީ ރިޔާސީ ނިޒާމެއް ބޭއްވުމަށެވެ. ގާނޫނު އަސާސީ އެކުލަވައިލެވުނު އިރު ރިޔާސީ ނިޒާމެއް ކަމަށް ލިޔެފައި އޮތް ނަމަވެސް ބަރުލަމާނީ ނިޒާމުގެ ގިނަ ސިފަތަކެއް ގާނޫނު އަސާސީގެ ތެރޭގައި ހިމެނިގެން ދިޔައެވެ. އެ ގޮތުން ބަރުލަމާނީ ނިޒާމުގައި ހިމެނޭ އެންމެ މައިގަނޑު އެއް ސިފަކަމަށްވާ ރައްޔިތުންގެ މަޖިލީހަށް ގިނަ ބާރުތަކެއް ލިބޭ ގޮތަށް ހިމެނިފައިވާކަން ފާހަގަކޮށްލެވެއެވެ. އަދި މަޖިލީހުގެ ތައީދު ނެތި ސަރުކަރުން ހިންގަން ދަތިވާނެ ގޮތަށް ކަންކަން ބައްޓަންކުރެވިފައި ވެއެވެ.

ރައީސް ނަޝީދު ދާދި ފަހުން ވެސް ވަނީ ރާއްޖޭގެ ވެރިކަމުގެ ނިޒާމު ބަދަލުކުރަންޖެހޭ ކަމަށް ވިދާޅުވެފައެވެ. އަދި އެކި ފޯރަމްތަކުގައި އެވާހަކަފުޅު ގެންދަވަނީ ތަކުރާރުކުރައްވަމުންނެވެ. އަދި ރިޔާސީ ނިޒާމެއްގެ ދަށުން ދެން ރައީސްކަން ނުކުރައްވާނެ ކަމަށް ވެސް އެމަނިކުފާނު ވިދާޅުވެފައި ވެއެވެ. ޖާބިރު ވިދާޅުވެފައި ވަނީ ވެރިކަމުގެ ނިޒާމު ބަދަލުކުރުމަށް ބިލެއް ހުށަހެޅުއްވީ މަޖިލީހުގެ އެހެން މެންބަރުންނާ ވެސް މަޝްވަރާކުރެއްވުމަށް ފަހުގައި ކަމަށެވެ. އަދި އެ މެންބަރުންގެ ތާއީދު ލިބޭނެކަމުގެ ޔަގީންކަން އެބަ އޮތް ކަަމަށް ވެސް ޖާބިރު ވިދާޅުވެފައި ވެއެވެ.