އޮކްޓޯބަރ 20 ވަނަ ދުވަހަކީ ޤައުމީ ތަފާސްހިސާބުގެ ދުވަސް ކަމުގައި ރައީސް ކަނޑައަޅުއްވައިފި

މި އަހަރުން ފެށިގެން ކޮންމެ އަހަރެއްގެ އޮކްޓޫބަރު މަހުގެ 20 ވަނަ ދުވަހަކީ ގައުމީ ތަފާސްހިސާބުގެ ދުވަހުގެ ގޮތުގައި ފާހަގަ ކުރެއްވުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ކަނޑައަޅުއްވައިފި އެވެ.

މިގޮތަށް ކަނޑައެޅުއްވީ ގައުމީ ތަފާސްހިސާބުގެ ދުވަސް ފާހަގަކުރެއްވުމާ ގުޅޭގޮތުން ވަޒީރުންގެ މަޖިލީހުގެ ޖަލްސާގައި މެންބަރުން މަޝްވަރާ ކުރެއްވުމަށްފަހުއެވެ.

ދުނިޔޭގެ ތަފާސްހިސާބު ދުވަހަކީ ފަސް އަހަރަކުން އެއް އަހަރު ބައިނަލްއަގްވާމީ ފެންވަރުގައި ކުލަގަދަކޮށް ފާހަގަކުރަމުން ގެންދާ ދުވަހެކެވެ. ދވެހި ސަރުކާރުން ބުނީ ރާއްޖޭގައި އެ ދުވަސް ކޮންމެ އަހަރު ފާހަގަ ކުރަން ނިންމީ ދިވެހިރާއްޖޭގައި ތަފާސްހިސާބުގެ ދާއިރާ އިތުރަށް ކުރިއަރުވާ، ތަރައްގީ ކުރުމަށް ސަރުކާރުންދޭ އަހައްމިއްޔަތުކަން ފާހަގަކޮށް ތަފާސްހިސާބުގެ އަލީގައި ކަންކަން ނިންމުމަށް ބާރުއެޅުމަށްޓަކާ އާންމު ހޭލުންތެރިކަން އިތުރުކޮށް ތަފާސްހިސާބަށް އަހުލުވެރި ޖީލެއް ބިނާކުރުމަށް މަގުފަހިކުރުމުގެ ގޮތުން ކަމަށެވެ.

މިދުވަހާއި ގުޅޭގޮތުން އ.ދ ގެ ސެކްރެޓަރީ ޖެނެރަލް ގައުމުތަކުގެ އެންމެ އިސްވެރިންނަށް ގޮވާލާފައިވަނީ މިދުވަސް ފާހަގަކުރުމުގައި ގައުމުތަކުގެ ސަރުކާރާއި، ދައުލަތުގެ ރަސްމީ ތަފާސްހިސާބު ނަގާބަލަހައްޓާ ހުރިހާ މުއައްސަސާތަކާއި، ބައިނަލްއަގްވާމީ ޖަމިއްޔާތަކާއި، މަދަނީ ޖަމިއްޔާތަކާއި މީޑިއާ، އަދި ރިސާޗަރުން ވެސް ބައިވެރިވެ، އެފަރާތްތަކަށް ކުރިމަތިވާ ގޮންޖެހުންތައް ހައްލުކުރުމުގައި ތަފާސްހިސާބުގެ ބޭނުންތެރިކަން ފާހަގަކުރުމަށެވެ.

advertisement