އަމީން އިސްތިއުފާ ދެއްވަންޖެހޭ! ނޫނީ ވަކިކުރަންޖެހޭ!

ކޮވިޑް-19 އާ ގުޅިގެން ސަރުކާރުން ކުރި ހަރަދުތަކުގައި ބޮޑެތި އިހުމާލުތަކެއް ހުރިކަން އޮޑިޓް ރިޕޯޓްތަކުން މީގެ ކުރިން ވަނީ ފާހަގަކޮށްފައެވެ. އޮޑިޓަރ ޖެނެރަލްގެ އިނގިލި އެންމެ ބޮޑަށް އަމާޒުވި އެއް މުއައްސަސާއަކީ ހެލްތު މިނިސްޓްރީއެވެ. އަދި މިނިސްޓަރު އަބްދުﷲ އަމީންގެ މައްޗަށް ވެސް ތުހުމަތުތަކެއް ކުރެވިގެން ދިޔައެވެ. އެ ތުހުމަތުތަކަށް ފަހު މިނިސްޓަރު އަމީން ހުންނެވީ އައްމިލަފުޅަށް މަގާމުގެ މަސްއޫލިއްޔަތުތަކުން އެކަހެރިވެވަޑައިގެންނެވެ. އެ ނިންމެވުން ނިންމަވައި ރައީސުލްޖުމްހޫރިއްޔާ އިބްރާހީމް މުހައްމަދަށް ފޮނުއްވި ސިޓީ ފުޅުގައި އަމީން ވިދާޅުވެފައި ވަނީ ކަމާ ގުޅޭ މުއައްސަސާތަކުން ކުރާ ތަހުގީގުތައް ނިމެންދެން ނުވަތަ ރައީސް ވަކި ގޮތެއް އަންގަވަންދެން މިނިސްޓްރީގެ މަސައްކަތްތަކުން އެކަހެރިވެވަޑައިގަތުމަށް ގަސްތުކުރައްވާ ކަމަށެވެ. އޮޑިޓްގެ ޕްރިމިލިނަރީ ރިޕޯޓަށް ފަހު މިއަދު ވަނީ އޭސީސީން ކުރި ތަހުގީގު ވެސް ނިންމައި ބަޔާން ނެރެފައެވެ. ބަޔާނުގައި ބުނެފައި ވަނީ އަމީންގެ ކޮރަޕްޝަންގެ މައްސަލަތައް ތަހުގީގަށް ސާބިތުވާ ކަމަށެވެ. އަދި ދައުވާކޮށްދިނުމަށް ޕްރޮސެކިއުޓާ ޖެނެރަލްގެ އޮފީހުގައި ވަނީ އެދިފައެވެ.

އަމީން ވިދާޅުވި ވަގުތު މިހާރު ޖެހިފައިވާ ކަމަށް ބައެއް ފަރާތްތަކުން ދަނީ ބުނަމުންނެވެ. އޭސީސީއަކީ ކޮރަޕްޝަންގެ މައްސަލަތައް ތަހުގީގުކުރާ އެންމެ މައި އިދާރާއެވެ. އެ އިދާރާގެ ތަހުގީގަށް ކަމެއް ސާބިތުވުމުން ދެން އޮންނަނީ އެ މީހެއްގެ މައްޗަށް ކުށް ސާބިތުކުރުމުގެ މަރުހަލާއެވެ. އެއީ ޕީޖީން ކަނޑައަޅާ ގޮތެއްގެ މަތިން ކޯޓުތަކަށް ހުށަހަޅާއި ޝަރީއަތުގެ މަރުހަލާގައި ނިންމާ ނިންމުމެކެވެ. ނަމަވެސް އޭސީސީން ކަމެއް ސާބިތުވާކަން ފާހަގަކުރިޔަސް ބައެއް ހާލަތްތަކުގައި އެއީ ޝަރީއަތުގެ މަރުހަލާގައި ސާބިތުކުރެވޭ ކަންކަމަށް ނުވެ ދެއެވެ.

advertisement

ބެސްޓް ޕްރެކްޓިސް އަށް ބަލާއިރު ހަގީގަތުގައި އަމީން އިސްތިއުފާ ދެއްވަންޖެހޭތާ ކިތަންމެ ދުވަހެކެވެ. ޑިމޮކްރެޓިކް އަދި ތަހުޒީބީ ބައެއް މަޖުތަމައުތަކުގައި މި ވަރުގެ ހިޔާނާތުގެ މައްސަލައެއް ފެންމަތިވެއްޖެ ނަމަ އާންމު ގޮތެއްގައި އެ ވަޒީރަކު އަމިއްލަފުޅަށް އިސްތިއުފާ ދެއްވައެވެ. ރާއްޖޭގައި މިއީ ފެންނަ މަންޒަރަކަށް ނުވާތީ ކަމެއް ސާބިތުކޮށްގެން މަގާމުން ދުރުކުރުން ނޫން ގޮތެއް ނޯވެއެވެ. ނަމަވެސް މި މައްސަލާގައި އަމީން ވަނީ ރަނގަޅު އެއް މިސާލެއް ދައްކަވާފައެވެ. އެއީ މަސައްކަތުން އަމިއްލަފުޅަށް އެކަހެވެވަޑައިގެންނެވުމެވެ. މިއީ ވެސް ރާއްޖޭގައި ނުފެންނަ މަންޒަރެކެވެ.

ދެން އޮތީ އަނެއްކާ ވެސް މިސާލު ދެއްކެވުމެވެ. އޭސީސީއަކީ ކޮރަޕްޝަންގެ މައްސަލަތައް ތަހުގީގުކޮށް ދައުވާކުރަން ފޮނުވުމަށް ގާނޫނުން މަތިކޮށްފައިވާ އެންމެ އިސް އިދާރާ ކަމަށް ވެފައި އެ އިދާރާގެ ތަހުގީގަށް ކޮރަޕްޝަނެއް ސާބިތުވަކީ ވަރަށް ބޮޑު ކަމެކެވެ. ހާއްސަކޮށް އެތައް ބައެއްގެ ވެރިއެއްގެ ގޮތުގައި ހުންނެވި ވަޒީރަކާ މެދު އެފަދަ ތަހުގީގަކުން އެކި ލިބިއްޖެ ނަމަ އެ މަގާމަށް އެ ބޭފުޅެއްގެ ޝަރުތު ގެއްލުނީ ކަމުގައި ބެލޭނެ ޖާގަ އެބަ އޮތެވެ.

ވަޒީރުކަމުން އިސްތިއުފާ ދެއްވުމުގެ ރިވެތި މިސާލު އަމީން ނުދައްކަވާ ނަމަ އެކަން ގާނޫނުން މަތިކޮށްފައި އޮތް އެހެން މުއައްސަސާތަކާއި ފަރާތްތައް ވެސް އެބަ ތިއްބެވެ. އެންމެ ފުރަތަމަ އެ ޒިންމާ އޮތީ ރައީސް ސޯލިހްގެ އެވެ. އެމަނިކުފާނުގެ ވަޒީރެއްގެ މައްޗަށް ގާނޫނީ ސަހުސަކުން މައްސަލައެއް ހިންގައި، ތަހުގީގުގައި ހެކި ހުރެ، ދައުވާކުރަން ފޮނުވާ ހިސާބުން އެ ވަޒީރަކު މަގާމުން ދުރުކުރެއްވުމަކީ ރައީސްގެ މައްޗަށް އޮތް ޒިންމާއެކެވެ. އެ މަރުހަލާ ވެސް ނުހިނގައިފި ނަމަ އެ ޒިންމާ ރައްޔިތުންގެ މަޖިލީހަށް ވެސް އެބަ އޮތެވެ. ދައުލަތުގެ ވެރިން ޒިންމާދާރުކުރުވުމަކީ ގާނޫނީ ގޮތުން މަޖިލީހުގެ ޒިންމާއެކެވެ. އަދި އިތުބާރު ގެއްލޭ ފަދަ ނުވަތަ މަގާމަށް ކުފޫ ހަމަނުވާ ފަދަ ކަމެއް މެދުވެރިވެއްޖެ ނަމަ އެ ފަރާތެއް މަގާމުން ދުރުކުރުމަކީ މަޖިލީހުގެ ޒިންމާއެކެވެ.

ދެން އޮތީ މަޖިލީހަށް އެކަން ހުށަހަޅާނީ ކޮން ބައެއްތޯއެވެ. ޒިންމާގެ ތަރުތީބަށް ބަލާ ނަމަ އެންމެ އައުލާކަން ބޮޑީ ކޯލީޝަން ސަރުކާރުގައި އަމީން އަށް މަގާމު ދިނުމަށް ހުށަހެޅި ޖުމްހޫރީ ޕާޓީގެ ފަރާތުން އެކަން މަޖިލީހަށް ހުށަހެޅުމެވެ. ނަމަވެސް އެ ގޮތް ވެސް ނެތް ނަމަ ވެރިކަން ކުރާ މައި ޕާޓީގެ މެންބަރުންގެ ޒިންމާ ވެސް އެކަމުގައި އެބަ އޮތެވެ. އަދި އެވަރުން ވެސް ނުވާ ނަމަ ސަރުކާރު ޖަވާބުދާރީކުރުވުމުގެ ފުރިހަމަ ދައުރެއް އޮތް ޒިންމާދާރު އިދިކޮޅު ޕާޓީތައް ވެސް މަޖިލީހުގައި އެބަ އޮތެވެ. އިހްތިޔާރުކުރަންވީ ދާނެ މަގެކެވެ. އަމީން އިސްތިއުފާ ދެއްވާނީތޯ ނުވަތަ ދުރުކުރާނީތޯ އެވެ؟