އަގުހެޔޮކޮށް ދަނޑުވެރި ބާވަތްތައް ލިބެން ހުރުމުން ބަލިމަޑުކަމުން ކުރާ އަސަރު ކުޑަކޮށްދޭ: ޒަހާ

ކޮވިޑް-19 ފަދަ ބަލިމަޑުކަމެއްގެ ތެރޭގައި ވެސް އަތްފޯރާ ފަށުގައި ކާބޯތަކެތި ލިބެން ހުރުމަކީ އެފަދަ ބަލިމަޑުކަމަކުން ކުރާ އަސަރު ކުޑަކޮށްދޭ ސަބަބެއް ކަމަށް ދަނޑުވެރިކަމާ ބެހޭ ވަޒީރު ޒަހާ ވަހީދު ވިދާޅުވެއްޖެއެވެ.

ބައިނަލްއަގުވާމީ ކާބޯތަކެތީގެ ދުވަހުގެ މުނާސަބާގައި އާންމުކުރެއްވި ވީޑިއޯ މެސެޖެއްގައި ޒަހާ ވިދާޅުވީ ރައްކާތެރި އަދި ހަށިގަނޑަށް ފައިދާ ހުރި ކާބޯ ތަކެތި އަތްފޯރާ ފަށުގައި ހުރުމަކީ މިފަދަ ބަލިމަޑުކަމަކުން އަރައިގަތުމަށް ކޮންމެހެން ބޭނުންތެރި ކަމެއް ކަމަށެވެ. ހާއްސަކޮށް ފުދުންތެރިކަން ކުޑަ މުޖުތަމައުތަކުގައި ދަނޑުވެރިކަމުގެ ސަބަބުން ގިނަގުނަ ފައިދާތަކެއް ލިބިގެންދާ ކަމަށާއި ބަލިމަޑުކަމަކުން ކުރާ އަސަރު ކުޑަކޮށްދޭ ކަމަށް ވެސް މިނިސްޓަރު ވިދާޅުވިއެވެ.

advertisement

މިނިސްޓަރު ވިދާޅުވީ ކޮވިޑްގެ މި ދުވަސްވަރު ވެސް ރާއްޖޭގެ ދަނޑުވެރިން މަސައްކަތުގައި ސާބިތުވެ ތިބުމަކީ ލިބުނު ވަރަށް ބޮޑު އުފަލެއް ކަމަށާއި ދަނޑުވެރިންނާއި މަސްވެރިންނާއި ފަޅުގޮވާންކުރާ ފަރާތްތަކާއި ކާބޯތަކެތި އުފެއްދުމުގައި އެކި ގޮތްގޮތުން މަސައްކަތްކުރާ ފަރާތްތަކުގެ މަސައްކަތް މިފަދަ ދުވަހެއްގައި ފާހަގަކުރުން މުހިންމު ކަމަށެވެ.

ބައިނަލްއަގުވާމީ ކާބޯތަކެތީގެ ދުވަހުގެ މުނާސަބާގައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ވެސް ވަނީ ހިތާބެއް އާންމުކުރައްވާފައެވެ. އެ ހިތާބުގައި އެމަނިކުފާނު ވަނީ ދަނޑުވެރިކަމަށް ފަހި މާޙައުލެއް ގާއިމުކޮށްދިނުމަކީ، ސަރުކާރުން ވަރަށް ބޮޑު އިސްކަމެއް ދީގެން ތަންފީޒުކުރަމުން އަންނަ ސިޔާސަތެއް ކަމަށާއި، އެ ގޮތުން މީހުން ދިރިއުޅޭ ރަށްރަށުން ދަނޑުވެރިކަމަށް ދޫކޮށްފައިވާ ބިންތަކާއި، އަލަށް ދޫކުރާ ބިންތަކުން ކުރިއަށް އޮތް ތިން އަހަރުގެ ތެރޭގައި، އެއްވެސް ކުއްޔެއް ނުނެގުމަށް ނިންމައި، ދަނޑުވެރިކަން ފުޅާކުރުމަށް އެހީތެރިވެދިނުމުގެ ގޮތުން، އިތުރު ހަ ފަޅުރަށެއް ކުއްޔަށް ދޫކުރުމަށް ސަރުކާރުން އިޢުލާނު ކޮށްފައިވާކަން ފަހަގަކުރައްވާފައެވެ.