ސެޕްޓެމްބަރ މަހު އިމްޕޯޓް އެކްސްޕޯޓުން ދައުލަތަށް ލިބުނު އާމްދަނީ 59 އިންސައްތަ ދަށްވެއްޖެ

ސެޕްޓެމްބަރުމަހު އިމްޕޯޓް އެކްސްޕޯޓުން ދައުލަތަށް ލިބުނު އާމްދަނީ 59 އިންސައްތަ ދަށްވެއްޖެއެވެ.

މިދިޔަ އަހަރުގެ ސެޕްޓެމްބަރުމަހު އިމްޕޯޓް އެކްސްޕޯޓުން ދައުލަތައް ލިބުނު އާމްދަނީ އުޅެނީ 292 މިލިއަން ރުފިޔާގައެވެ. ނަމަވެސް މިއަހަރު މި އަދަދު ވަނީ 119 މިލިއަން ރުފިޔާއަށް ދަށްވެފައެވެ. އެހެންކަމުން މިއީ 59 އިންސައްތައިގެ ދަށްވުމެކެވެ.

advertisement

އިމްޕޯޓް އެކްސްޕޯޓުން ދައުލަތައް ލިބުނު އާމްދަނީ ސެޕްޓެމްބަރ މަހު ދައްވިއިރު ރާއްޖެއަށް އެތެރެކުރި މުދަލުގެ އަދަދާއި ރާއްޖެއިން ބޭރުކުރި މުދަލުގެ އަދަދުވެސް ވަނީ ދަށްވެފައެވެ.

ކަސްޓަމްސްގެ ތަފާސް ހިސާބުތައް ދައްކާގޮތުން މިދިޔަ އަހަރުގެ ސެޕްޓެމްބަރމަހު ރާއްޖެއަށް 3.8 ބިލިއަން ރުފިޔާގެ މުދާ އިމްޕޯޓް ކޮށްފައިވާއިރު، މި އަހަރުގެ ސެޕްޓެމްބަރުމަހު މި ޢަދަދުވަނީ 1.9 ބިލިއަން ރުފިޔާ އަށް ދަށްވެފައެވެ. މިއަހަރުގެ ސެޕްޓެމްބަރ މަހު ރާއްޖެއިން އެކްސްޕޯޓްކުރި މުދަލުގެ އަދަދަކީ 199 މިލިއަން ރުފިޔާއެވެ. މިދިޔަ އަހަރު މި މުއްދަތުގައި މި އަދަދު އުޅުނީ 315 މިލިއަނުގައެވެ.

ސެޕްޓެމްބަރުމަހު ރާއްޖެއަށް އެންމެ ގިނައިން މުދާ އެތެރެކޮށްފައިވާ ގައުމުތަކަކީ ޗައިނާ، އިންޑިއާ އަދި ސިންގަޕޫރެވެ. ޗައިނާ އިން 345 މިލިއަން ރުފިޔާގެ މުދާ އެތެރެކޮށްފައިވާއިރު އިންޑިއާއިން 275 މިލިއަން އަދި ސިންގަޕޫރުން 217 މިލިއަން ރުފިޔާގެ މުދާ އެތެރެކޮށްފައިވެއެވެ. 

ސެޕްޓެމްބަރުމަހު ރާއްޖެއަށް އެންމެ ގިނައިން މުދާ އެކްސްޕޯޓު ކޮށްފައިވަނީ އިނގިރޭސިވިލާތަށާއި، ޖަރުމަންވިލާތް އަދި ފަރަންސޭސިވިލާތައްކަމަށް ކަސްޓަމްސްގެ ތަފާސްހިސާބުތަކުން ދައްކައެވެ. އިނގިރޭސިވިލާތަށް 21 އިންސައްތަ މުދާ އެކްސްޕޯޓުކޮށްފައިވާއިރު، ޖަރުމަންވިލާތަށް 19 އިންސައްތަ އަދި ފަރަންސޭސިވިލާތަށް 17 އިންސައްތަ މުދާ ވަނީ އެކްސްޕޯޓުކޮށްފައެވެ. މި ޤައުމުތަކަށް ރާއްޖެއިން އެކްސްޕޯޓުކޮށްފައިވަނީ ގަނޑުކުރި މަހުގެ ބާވަތްތަކެއްވެ.