މާލެ ސަރަހައްދުގައި ވެހިކަލް ދުއްވޭ ވަގުތައް ބަދަލުގެނެސްފި

މާލޭ ސަރަޙައްދުގައި ވެހިކަލް ދުއްވޭ ވަގުތާއި، ކެފޭ ހޯޓާ ރެސްޓޯރެންޓްތަކުން ޚިދުމަތްދެވޭނެ ވަގުތުތަކަށް އެޗްޕީއޭއިން ބަދަލުގެނެސްފިއެވެ.

އެޗްޕީއޭއިން މިގެނައި ބަދަލާއިއެކު މިހާރު ރޭގަނޑު 11:00 އިން ފެށިގެން ފަތިހު 4:00 އަށް އެއްގަމު އުޅަނދުފަހަރު ދުއްވުމާއި، މަގުމައްޗާއި އާންމު ތަންތަނަށް މީހުން ނުކުތުން މިއަދުން ފެށިގެން މަނާވާނެއެވެ. މި ބަދަލާއިއެކު މާލެ، ހުޅުމާލެ އަދި ވިލިމާލޭގެ ހޮޓާ، ކެފޭ، ރެސްޓްރޯރެންޓް ފަދަ ކާބޯތަކެތީގެ ޚިދުމަތްދޭ ތަންތަނުން ރޭގަނޑު 10:30 ހާއި ހަމައަށް ޚިދުމަތް ދެވޭނެއެވެ. 10:30 އިން ފަތިހު 4 ޖެހުމާއި ހަމައަށް ކެފޭ ރެސްޓޯރަންޓްތަކުން ޙިދުމަތްދިނުމަކީ މަނާކަމެއްކަމަށް އެޗްޕީއޭއިން ވަނީ ކަނޑައަޅާފައެވެ. 

ކުރިންވާގޮތުން ރޭގަނޑު 10 އިން ފަތިހު 5 އަށް މާލެ ސަރަހައްދުގައި އެއްގަމު އުޅަނދު ދުއްވުމާއި، ބޭރަށް ނިކުތުމަކީ މަނާކަމެކެވެ.
މާލޭ ސަރަޙައްދުގައި އެޗް.ޕީ.އޭއިން އަޅާފައިވާ ރައްކާތެރިކަމުގެ ފިޔަވަޅުތަކަށް ލުއިދޭން ފަށާފައި މިވަނީ ރާއްޖޭގައި ކޯވިޑް-19 އަށް ޕޮޒިޓިވްވާ މީހުންގެ ޢަދަދު ދަށްވާން ފެށުމާގުޅިގެންނެވެ. ރާއްޖޭގައި ކޯވިޑް19 ޖެހުނު މީހުންގެ ޖުމްލަ ޢަދަދު މިހާރު ވަނީ 11،000 އަށްވުރެ މައްޗަށް އަރާފައެވެ. 

advertisement