ކަރަންޓީނުވުމުގައި ބޭރު މީހާ އަށް ވަކި ގޮތެއް ދިވެހިންނަށް ވަކި ގޮތެއް!

ކޮވިޑްގެ ހާލަތު ބަދަލުވަމުން އަންނަ މިންވަރަށް ބަލައި ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ގެންގުޅޭ އުސޫލްތައް ވެސް އަންނަނީ ބަދަލުކުރަމުންނެވެ. މީގެ ކުރިން ހަރުކަށި އުސޫލްތަކެއް ގެންގުޅުނު ނަމަވެސް ހާލަތު މިހާރު ވަނީ ބަދަލުވާން ފަށާފައެވެ. ބަލިމަޑުކަމުގެ ސަބަބުން ހުއްޓުން އަރާފައި އޮތް އިގްތިސާދު ހިނގައިގަތުމަށް ފުރުސަތު ދިނުމުގެ ގޮތުން ޓުއަރިސްޓް ރިސޯޓްތަކާއި ރަށްރަށުގައި ހިންގާ ގެސްޓްހައުސްތަކަށް އެޗްޕީއޭ އިން މިހާރު ވަނީ ފުރުސަތު ހުޅުވާލާފައެވެ. ވަކި ޝަރުތުތަކާ އެކު ހުޅުވާލި ނަމަވެސް އަދިވެސް ޝަކުވާތައް އެބަ ހުއްޓެވެ.

ރާއްޖެއިން ބޭރުން އަންނަ ޓުއަރިސްޓް މީހާ އަށް ހާއްސަ ހުއްދަތަކެއް ލިބިގެންދާ އިރު މާލެ އިން ރަށްރަށަށް ދަތުރުކުރާ ދިވެހިންނާ މެދު އަމަލުކުރާ ގޮތް ތަފާތުވުމުން ޝަކުވާތަކެއް ދަނީ ފެންމަތިވަމުންނެވެ. ކޮވިޑް އުޅޭ ގައުމަކުން އަންނަ ޓުއަރިސްޓް މީހާ ނެގެޓިވް ރިޕޯޓެއް ހުށަހެޅުމުން ރަށްރަށުގެ ގެސްޓްހައުސްތަކަށް ދިއުމުގެ ފުރުސަތު އެޗްޕީއޭ އިން މިހާރު ވަނީ ހުޅުވާލާފައެވެ. އަދި އެފަދަ ޓުއަރިސްޓުން 14 ދުވަހުގެ ކަރަންޓީންގެ މުއްދަތު ވެސް ހަމަކުރާކަށް ނުޖެހެއެވެ. މާސްކް އަޅައިގެން ރަށުގެ ކޮންމެ ހިސާބަކަށް ވެސް ދިއުމަކަށް ހުރަހެއް ނެތެވެ. ނަމަވެސް ދިވެހިންނަށް އެ ފުރުސަތެއް ނެތެވެ. އެކި ބޭނުންތަކުގައި މާލެ އައިސް އެނބުރި ރަށަށް ދާ ނަމަ 14 ދުވަހުގެ ކަރަންޓީނު މަޖުބޫރެވެ.

advertisement

ސޯޝަލް މީޑިއާގައި ބައެއް މީހުން ގެންދަނީ މިކަމުގެ ކަންބޮޑުވުން ފާޅުކުރަމުންނެވެ. ބޭރު ގައުމެއްގެ މީހަކަށް ވުމުން 14 ދުވަހުގެ ތެރޭގައި ކޮވިޑް ނާރަނީތޯ ވެސް ޓްވިޓާގައި މިހަކު ސުވާލު ކޮށްފައި ވެއެވެ. ޓުއަރިސްޓް މީހާ ކަރަންޓީން ވާން ނުޖެހި ހަމަ އެ މީހާއާ އެކު އެއް ލޯންޗެއްގައި އެއް ރަށަކަށް ދާ ދިވެހި މީހާ ކަރަންޓީނުވާން ޖެހުމަކީ އިންސާފެއް ނޫން ކަމަށް ބައެއް ފަރާތްތަކުން ދަނީ ބުނަމުންނެވެ.

ފާޑުކިޔާ ފަރާތްތަކުން ދެކޭ ގޮތުގައި އެ ހާލަތުގައި ދިވެހި މީހާ އަށް ވެސް ނެގެޓިވް ރިޕޯޓެއް ހުށަހެޅުމުން ކަރަންޓީނުވުމަކާ ނުލައި ރަށްރަށަށް ދަތުރުކުރުމު ފުރުސަތު ބޭރު މީހާއެކޭ އެއްފަދައިން ލިބެންޖެހޭނެއެވެ. ކަރަންޓީނު ވެވެވޭނެ ގޮތެއް ނެތުމުން ރަށަށް ނުދެވި އެތައް ބަޔަކު މާލޭގައި ތާށިވެފައި އެބަ ތިއްބެވެ. ނުވަތަ ޒަރޫރީ ބޭނުންތަކުގައި މާލެ އަންނަންޖެހި، ނަމަވެސް އެނބުރި ގޮސް ކަރަންޓީނު ވާނެ ގޮތެއް ނެތުމުން އެކަން ނުވެފައި ތިބި އެތައް ބަޔަކު އެބަ އުޅެއެވެ. ވަކި ތަނެއްގައި ކަރަންޓީނު ވާންޖެހުމުން ރަށްރަށުގައި އެއީ ފަސޭހަ ކަމަކަށް ނުވެއެވެ. އެކަން ކުރުމަށް ޖެހެނީ ކޮންމެ ވެސް ހުސް ގެއެއް ހޯދަންށެވެ. އާންމު ގޮތެއްގައި ކުއްޔަށް ދޭ ތަނެއް ހޯދަށް މަޖުބޫރުވެއެވެ. މިފަދަ އިގްތިސާދީ ގޮތުން ދަތި އަދި ގިނަ ބައެއްގެ ވަޒީފާ ގެއްލިފައިވާ މިފަދަ ދަނޑިވަޅެއްގައި ކޮންމެ ކޮންމެ މީހަކަށް އެއީ ފަސޭހަ ކަމެއް ނޫނެވެ. ދުވާލަކަށް 350ރ. ގެ ރޭޓުން ބެލިޔަސް 5،000ރ ހޭދަނުކޮށް ކަރަންޓީނު ވެވޭނެ ގޮތެއް ނެތެވެ. އަދި ގިނަ ރަށްރަށުގައި މިރޭޓް އުޅެނީ ދުވާލަކަށް 500ރ.ގެ ރޭޓުން ކަމަށް ވުމުން 7،000ރ. ހޭދަކޮށްގެން ނޫނީ ކަރަންޓީނު ވެވޭނެ ގޮތެއް ނެތެވެ. އެހެންކަމުން މިއީ ވަރަށް ގިނަ ބަޔަކަށް ކުރިމަތިވެފައިވާ ދައްޗެކެވެ.

އެޗްޕީއޭ އިން އުސޫލްތައް ކަނޑައަޅަނީ ވީހާ ވެސް ބަލި ފެތުރުން ކޮންޓްރޯލް ކުރެވޭނެ ގޮތްތަކަށް ބަލައިގެންނެވެ. ނަމަވެސް އެއް އުޅަނދެއްގައި އެއް މަންޒިލަކަށް ދާ ދެ މީހަކާ މެދު ދެ ގޮތަކަށް އަމަލުކުރެވޭ ނަމަ އޭގެ “ލޮޖިކް”އެއް ނުވިސްނެއެވެ. ޓުއަރިސްޓް މީހާ އަށް މުޅި ރަށުގައި އުޅެން ފުރުސަތު ލިބޭ އިރު ދިވެއްސަކަށް ވީތީ މަދުވެގެން 14 ދުވަހު ކަރަންޓީނުގައި ހުންނަންޖެހޭ ނަމަ އެއީ އިންސާފެއް ނޫނެވެ. ހަމަ އެގޮތަށް ރާއްޖެއިން ބޭރުން އަންނަ ޓުއަރިސްޓް މީހާ އަށް ކަރަންޓީނު ވުމަކާ ނުލައި ރަށްރަށަށް ދަތުރުކުރެވޭ އިރު ބަލި ފެތުރިފައިވާ މާލޭގައި މަޑުކުރަން އަންނަ ބިދޭސީ މީހާ ކަރަންޓީނުގައި ހުންނަންޖެހޭ ސަބަބެއް ވެސް ނުވިސްނެއެވެ. ކޮވިޑް ފެތުރިފައި ނުވާ ތަނަކަށް ނެގެޓިވް ނަތީޖާ ރިޕޯޓެއް ހުށަހަޅައިގެން ދެވޭ އިރު އެފަދަ ރިޕޯޓެއް ހުށަހަޅައިގެން، ބަލި އޮތް މާލޭގައި ކަރަންޓީނު ނުވާނެ ގޮތެއް ނެތީބާ އެވެ؟ ގޭގެ އަށް ނުވަތަ އެކި މަސައްކަތްތަކަށް ގެންނަ ބިދޭސީ މީހާ 14 ދުވަހު ވަކި ތަނެއްގައި ބެހެއްޓުމަކީ ވެސް ފަސޭހަ ކަމެއް ނޫނެވެ. އެއީ ވެސް ބޮޑު ހޭދައެކެވެ. އެހެން ކަމުން މިއީ ވެސް ވިސްނަންޖެހޭ މައްސަލައެކެވެ.