މިނިވަންކަމަށް މިހާރު އަސަރުކުރަނީ ތަފާތު ގޮތަކަށް: މިނިސްޓަރު އިމްރާން

މި ޒަމާނުގައި ގައުމިއްޔަތާއި މިނިވަންކަމަށް އަސަރުކުރަނީ ކުރިން ކުރި ގޮތާ ހިލާފަށް މުޅިން ތަފާތު ގޮތަކަށް ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.

ގައުމީ ދުވަސް ފާހަގަކުރުމަށް ހއ. އުތީމުގައި ބޭއްވި ރަސްމިއްޔާތެއްގައި ވީޑިއޯ ކޮންފަރެންސް މެދުވެރިކޮށް ދެއްވި ޚިތާބުގައި މިނިސްޓަރު އިމްރާން ވިދާޅުވީ މި ޒަމާނުގައި ދީނަށާއި މިނިވަން ކަމަށާއި ގައުމިއްޔަތަށް ކުރިމަތިވާ ގޮންޖެހުންތަކާއި ނުރައްކާތައް އިހުނާ އަޅާބަލާއިރު ވަރަށް ތަފާތު ކަމަށާއި އާ ގޮންޖެހުންތަކާ ކުރިމަތިލުމަށް އާ ހިޔާލުތަކާއި އާ ވިސްނުންތަކެއް ނެރެންޖެހޭ ކަމަށެވެ.

advertisement

ކޮންމެ ހިޖުރީ އަހަރެއްގެ ރަބީއުލް އައްވަލް މަހުގެ 1 ވަނަ ދުވަސް، ބޮޑުތަކުރާނުގެ ތިން ބެއިންގެ ޖިހާދުގެ ހަނދާނުގައި ގައުމީ ދުވަހުގެ ގޮތުގައި ފާހަގަކުރާ މި ދުވަހުގެ ހާއްސަ ރަސްމިއްޔާތުގައި މިނިސްޓަރު ވިދާޅުވީ ކާބަފައިން ދޫކޮށްފައިވާ ގައުމިއްޔަތާއި އިސްލާމްދީނާއި ދިވެހި ބަހާއި، ސަގާފަތާއި، ޒަމާންވީ ތަރިކަ އަދި ދިވެހިންގެ ހަޟޯރަތަށް މިއަދު ކުރިމަތިވެފައިވާ އެންމެ ބޮޑު ޖެހުމަކީ އަދި ފޮރުވިފައިވާ ދުޝްމިނުންނަކީ މި ގައުމުގެ ދާހިލީ އިޖުތިމާއީ ބޮޑެތި މައްސަލަތައް ކަމަށެވެ.

އިމްރާން ވިދާޅުވީ އިޖުތިމާއީ މައްސަލަތައް ކަމަށްވާ މަސްތުވާތަކެތީގެ ވަބާ އާއި ކުޑަކުދިންނާއި އަންހެނުންނަށް ކުރިމަތިވަމުންދާ ޖިންސީ އަދި ގެވެށި އަނިޔާތަކާއި، އިސްލާމް ދީނަށް ފުރައްސާރަކުރުމާއި ސައްހަ އަގީދާ އޮޅުވާލައިގެން ހަރުކަށި ފިކުރުތައް ފެތުރުން ފަދަ މައްސަލަތައް މި ގައުމުގައި ގިނަ ކަމަށެވެ. އެކަންކަން ހައްލުކުރަން ދިވެހި ކޮންމެ ރައްޔިތަކު ވެސް އާ އިޖާދީ ވިސްނުންތަކެއް ކުރިއަށް ނެރެ، ސަރުކާރާ ގުޅިގެން މި މައްސަލަތައް ހައްލުކުރަން މަސައްކަތްކުރަންޖެހޭ ކަމަށް ވެސް އިމްރާން ވިދާޅުވިއެވެ. މިނިސްޓަރު ވިދާޅުވީ ތަރައްގީގެ ލަނޑުދަނޑިތައް ވެސް ހާސިލްކުރެވެން އޮތީ މި މައްސަލަތަކަށް ހައްލު ހޯދިގެން ކަމަށާއި މިއަދު އަޅުވެތިވެފައި ވަނީ ގައުމުގެ އެތެރޭގެ އިޖުތިމާއީ ވަބާތަކަށް ކަމަށެވެ.