ދައުލަތުގެ ދަރަނި 172 ބިލިއަން ރުފިޔާ، އަންނަ އަހަރު ދައްކަންޖެހޭ ވަރު ބޮޑު: ރައީސް ނަޝީދު

ދިވެހި ދައުލަތް ޒިންމާވާ ގޮތަށް ސަރުކާރާއި ސަރުކާރު ހިއްސާވާ ކުންފުނިތަކާއި ސަރުކާރުގެ ސޮވެރެން ގެރެންޓީގައި ނަގާފައިވާ ދަރަނީގެ އަދަދު 172 ބިލިއަން ރުފިޔާ އަށް އަރާ ކަމަށާއި އެ ލޯނުތަކަށް އަންނަ އަަހަރު ދައްކަންޖެހޭ މިންވަރު ބޮޑު ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެއެވެ.

ބޭރުގެ ގައުމުތަކުން ނަގާފައިވާ ލޯނުތަކާއި ދައުލަތް ޒިންމާވާ ގޮތަށް ގެރެންޓީ ދީގެން ނަގާފައިވާ ލޯނުތަކާ ގުޅޭ ގޮތުން ތައްޔާރުކުރި ރިޕޯޓާ ގޮތުން މުޅި މަޖިލީހުގެ ކޮމިޓީގައި ވާހަކަ ދައްކަވަމުން ރައީސް ނަޝީދު ވިދާޅުވީ އުނދަގޫ ވަނީ ލޯނު ނަގާ އިރު ނޫން ކަމަށާއި ބުރަ ބޮޑުވަނީ އެ އަނބުރާ ނުދެއްކޭ ހާލަތަށް ދިއުމުން ކަމަށެވެ. އަންނަ އަހަރު ލޯނުތަކަށް ދައްކަންޖެހޭ މިންވަރު އިންތިހާ އަށް ބޮޑު ކަމަށް ރައީސް ނަޝީދު ވިދާޅުވިއެވެ.

advertisement

ރައީސް ނަޝީދު ވިދާޅުވީ ބަޖެޓް ފޫބެއްދުމަށް ސްޓޭޓް ބޭންކް އޮފް އިންޑިއާ އިން މި އަހަރު ނަގާފައިވާ 250 މިލިއަން ޑޮލަރުގެ ލޯނަކީ ވަރަށް ރަނގަޅު ޑީލެއް ކަމަށެވެ. އަދި އެއަށް ވުރެ ރަނގަޅު ޑީލެއް ނުލިބޭނެ ކަމަށާއި މި ސަރުކާރު އެ ލޯނު ނެގީ އެތެރޭގެ ދަރަނީގެ ގޮތުގައި ކަމަށެވެ. އިންޑިއާ ސަރުކާރުން ގެރެންޓީ ދީގެން އެސްބީއަށް ވިއްކި ބޮންޑަކީ އަނބުރާ ދެއްކުމަށް 10 އަހަރު ދުވަސް ލިބޭ ގޮތަށް ވަރަށް ހެޔޮ އަގުގައި ނަގާފައިވާ ދަރަންޏެކެވެ.

މަޖިލީހުގެ ރިޕޯޓްގައި އެންމެ ބޮޑު ކަންބޮޑުވުމެއްގެ ގޮތުގައި ފާހަގަކޮށްފައި ވަނީ އާމްދަނީގެ ނިސްބަތުން އަނބުރާ ދައްކަންޖެހޭ އަދަދު އިންތިހާ އަށް ބޮޑުވުމެވެ. އެކަމަށް ހައްލު ހޯދުމަށް ރިޕޯޓްގައި ވަނީ ސަރުކާރަށް ގޮވާލާފައެވެ.

ދައުލަތުގެ ދަރަނި

 – ސަރުކާރުން އެހެން ފަރާތްތަކަށް ވިއްކާފައިވާ ޓީބިލް އަދި ބޮންޑު: 91.9 ބިލިއަން ރުފިޔާ

– ސަރުކާރު ހިއްސާވާ ކުންފުނިތަކަށް ދައުލަތުގެ ނަމުގައި ދޫކޮށްފައިވާ ގެރެންޓީ: 114 ގެރެންޓީއަކުން 41 ބިލިއަން ރުފިޔާ

– ދޭދޭ ގައުމުތަކުން ނަގާފައިވާ ލޯނު: 49 ލޯނަކުން ޖުމްލަ 13 ބިލިއަން ރުފިޔާ

– ބައިނަލްއަގުވާމީ ޖަމްއިއްޔާ ޖަމާއަތްތަކުން ނަގާފައިވާ ދަރަނި: 124 ލޯނަކުން 12.9 ބިލިއަން ރުފިޔާ

– އެމްއެމްއޭ އިން ނަގާފައިވާ ލޯނާއި ނަގާފައިވާ ބޮންޑާއި އަދި ޓްރެޒަރީ ބިލު: 7.4 ބިލިއަން ރުފިޔާ

– ސަރުކާރާއި ސަރުކާރު ހިއްސާވާ ކުންފުނިތަކުން ނުދައްކާ ހުރި ބިލުތައް: 5.4 ބިލިއަން ރުފިޔާ

– ސަރުކާރު ހިއްސާވާ ކުންފުނިތަކުގެ އޯވާ ޑްރާފްޓް: 78 މިލިއަން ރުފިޔާ

މީގެ އިތުރުން ގާނޫނާ ހިލާފަށް ނަގާފައިވާ އަދި މަޖިލީހަށް މައުލޫމާތު ނޭނގޭ ދެ ލޯނެއް ވެސް ރިޕޯޓްގައި ފާހަގަކޮށްފައި ވެއެވެ. އެއީ ސިނަމާނެ ބްރިޖްގެ މަޝްރޫއަށް ޗައިނާގެ އެކްސްޕޯޓް އިމްޕޯޓް ބޭންކް އޮފް ޗައިނާ އިން ނަގާފައިވާ 455 މިލިއަން ޔުއާން އާއި ސަނީ ސައިޑް ބޮންޑްގެ ނަމުގައި ބޮންޑް ހޯލްޑާސް އިން ނަގާފައިވާ 250 މިލިއަން ޑޮލަރުގެ ލޯނެކެވެ. މިއީ ކުރީގެ ސަރުކާރުން ނަގާފައިވާ ދަރަނިތަކަކަށް ވާއިރު މިއާ ބެހޭ ތަފްސީލުތައް މަޖިލީހަށް ހުށަހަޅާފައި ނުވާކަން ރިޕޯޓްގައި ވަނީ ފާހަގަކޮށްފައެވެ.

ދަރަނީގެ ރިޕޯޓާ ގުޅިގެން މިއަދުގެ މަޖިލީހުގެ ޖަލްސާގައި ހޫނު ބަހުސެއް ކުރެވުނެވެ. އެ ގޮތުން އެމްޑީޕީގެ މެންބަރުންގެ މެދުގައި ވެސް ހިޔާލު ތަފާތުވެ ވަރުގަދަ ޒުވާބެއް ހިނގާފައި ވެއެވެ. މަޖިލިސް ހޫނުވެގެން ދިޔައީ ސަރުކާރު ބަދުނާމުކުރަން މަޖިލީހުން މަސައްކަތްކުރާ ކަމަށް މަރަދޫ ދާއިރާގެ މެންބަރު އިބްރާހީމް ޝަރީފް ތުހުމަތުކުރައްވައި އަޑުގަދަކުރައްވަން ފެއްޓެވުމުންނެވެ. ޝަރީފް ވިދާޅުވީ މިފަދަ ދަތި ހާލަތެއްގައި ގައުމު އޮއްވައި ފިނޭންސް މިނިސްޓްރީން ކަންކުރާ ގޮތާ މެދު މަޖިލީހުން ސުވާލު އުފައްދައި ދަރަނި ނުދެއްކޭނެ ކަމަށް އާންމުންނާއި ބައިނަލްއަގުވާމީ ފަރާތްތަކަށް ވިސްނޭ ގޮތަށް މަސައްކަތް ކުރާ ނަމަ ގައުމުގެ އިގްތިސާދު ބޮއްސުންލައިގެން ހިނގައިދާނެ ކަމަށެވެ. ޝަރީފްގެ ވާހަކަ މަޖިލީހުގެ ރިޔާސަތު މެދުކަނޑައިލެއްވުމާ އެކު މަޖިލީހުގެ ތެރޭގައި އަޑުގަދަވެގެން ދިޔައެވެ.