އެންއައިސީ އަށް ގާސިމްއާ އެކު އިތުރު ތިން މެންބަރަކަށް ރުހުން ދީފި

މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ ވައްކަމުގެ މައްސަލަ ފަޅާއަރުވާލުމުގައި މުހިންމު ދައުރެއް އަދާކުރެއްވި ގާސިމް އަބްދުލްހަކީމް އެކު ހަތަރު ބޭފުޅަކު ނޭޝަނަލް އިންޓެގްރިޓީ ކޮމިޝަން (އެންއައިސީ) އަށް އައްޔަންކުރުމަށް ފެންނަ ކަމަށް ރައްޔިތުންގެ މަޖިލީހުން ފާސްކޮށްފިއެވެ.

ހަތަރު ބޭފުޅެއްގެ ނަން މަޖިލީހުން ފާސްކޮށްފައި މި ވަނީ އެ ކޮމިޝަންގައި ތިއްބެވި މެންބަރުން ވަކިކުރުމަށް މަޖިލީހުން ލަފާ އަރުވާފައި ވަނިކޮށް މަގާމުން އިސްތިއުފާ ދެއްވުމުންނެވެ. އެ ކޮމިޝަންގެ ރައީސް އަހްމަދު ސުލައިމާނު ވަނީ މަގާމުން ވަކިކޮށްފައެވެ.

advertisement

އެންއައިސީން ހުސްވެފައިވާ މަގާމަށް މަޖިލީހުން ރުހުން ދީފައި ވަނީ ގާސިމްގެ އިތުރުން ގ. ދޫރެސްވިލާ އާމިނަތު ޝިއުނާ އާއި މި. ފިސްތާގެ އާމިނަތު ޝާދިޔާ އަދި ޖޭއެސްސީގެ ކުރީގެ މެންބަރު ޝުއައިބް އަބްދުއްރަހުމާން އަށެވެ.

ގާސިމް އެންމެ ފަހުން ހުންނެވީ މޯލްޑިވްސް ސެންޓަ ފޯ އިސްލާމިކް ފައިނޭންސް ލިމިޓެޑް (އެމްސީއައިއެފް)ގެ ޗެއާމަންގެ މަގާމުގައެވެ. އެ މަގާމަށް އޭނާ އައްޔަންކުރެއްވީ މިދިޔަ އަހަރުގެ އޮކްޓޫބަރު މަހުގެ ތެރޭގައެވެ.

ބީއެމްއެލްގެ މުވައްޒަފެއްގެ ގޮތުގައި ހުންނަވައި ގާސިމް ވަނީ އެމްއެމްޕީއާރުސީގެ ހިޔާނާތުގެ މައްސަލަ ތިލަކުރައްވާފައެވެ. ނަމަވެސް ވިސްލް ބްލޯވިން އުސޫލާ ހިލާފަށް ބޭންކްގެ ކަސްޓަމަރެއްގެ މައުލޫމާތު ފަޅާއަރުވާލި ކަމުގެ ތުހުމަތުގައި މިދިޔަ ސަރުކާރުގެ ތެރޭގައި ގާސިމް ވަނީ އަށް މަހާއި 12 ދުވަހަށް ޖަލަށް ލާފައެވެ.