އެމްޑީޕީގެ ޕީޖީގެ ނިންމުމާ ދެކޮޅަށް އަމީންގެ އިތުބާރުގެ މައްސަލަ މަޖިލީހަށް ވައްދަނީ!

ހެލްތު މިނިސްޓަރު އަބްދުﷲ އަމީންގެ އިތުބާރު ނެތް ކަމަށް ހުށަހެޅުމަށް އެމްޑީޕީގެ ޕާލަޕެންޓް ގްރޫޕްގައި ނެގި ވޯޓުން ފާސް ނުވި ނަމަވެސް އެ މައްސަލަ މަޖިލީހަށް ހުށަހެޅުމަށް މެންބަރުން ސޮއިކުރައްވަން ފައްޓަވައިފިއެވެ.

ވެންޓިލޭޓަރުތަކުގެ މައްސަލާގައި މިނިސްޓަރު އަމީންގެ އިތުބާރު ނެތްކަމުގެ މައްސަލަ ހުށަހެޅުމާ މެދު ގޮތެއް ނިންމުމަށް އެމްޑީޕީގެ ޕީޖީގައި މިއަދު ބޭއްވި ބައްދަލުވުމުގައި އެ މައްސަލަ ހުށަހަޅަން ނުފެންނަ ކަމަށް 31 މެންބަރުން ވޯޓު ދެއްވިއެވެ. އަދި މައްސަލަ ހުށަހަޅަން ފެންނަ ކަމަށް 27 މެންބަރަކު ވޯޓު ދެއްވި ކަމަށް މެންބަރަކު މައުލޫމާތު ދެއްވިއެވެ.

advertisement

މަޖިލީހުގެ ގަވާއިދު ބުނާ ގޮތުން 10 މެންބަރުންގެ ސޮޔާއެކު ވަޒީރެއްގެ އިތުބާރު ނެތްކަމުގެ މައްސަލަ މަޖިލީހުގެ ތަޅުމަށް ހުށަހެޅިދާނެއެވެ.

ގަލޮޅު ދެކުނު ދާއިރާގެ މެންބަރު މީކާއިލް ނަސީމް ކްރެއްވި ޓީވީޓެއްގައި ވިދާޅުވީ “ހެލްތު މިނިސްޓަރު އަމީން ފާޅުކަން ބޮޑު ގޮތެއްގައި ވައްކަންކޮށް، ރައްޔިތުންގެ މުސާރަ ނަގައިގެން އިތުރަށް މަގާމުގައި ހުރުމަށް ނޭދޭތީ، އޭނާގެ އިތުބާރު ނެތްކަމަށް މަޖިލިސް ތަޅުމަށް ހުށައެޅުމަށް ސޮއިކޮށްފިން” ކަމަށެވެ. t

މީކާއިލް އާންމުކުރެއްވި ފޮޓޯ އިން ފެންނަ ގޮތުން އޭނާގެ އިތުރުން އަށް މެންބަރަކު ވަނީ އޭގައި ސޮއިކުރައްވާފައެވެ. އޭގެ ތެރޭގައި ހިމެނިވަޑައިގަންނަވަނީ ވިލުފުށީ ދާއިރާގެ މެންބަރު ހަސަން އަފީފާއި، މަޑަވެލި ދާއިރާގެ މެންބަރު ހުސައިން ފިރުޝާން އާއި، ގައްދޫ ދާއިރާގެ މެންބަރު އަހްމަދު ޒާހިރު، މާފަންނު މެދު ދާއިރާގެ މެންބަރު އިބްރަހީމް ރަޝީދު، ހިތަދޫ ދެކުނު މެންބަރު އިބްރަހީމް ނާޒިލް، އުނގޫފާރު ދާއިރާގެ މެންބަރު މުހައްމަދު ވަހީދު، މައްޗަންގޮޅި އުތުރު ދާއިރާގެ މެންބަރު މުހައްމަދު ރަޝީދުގެ އިތުރުން ފޮނަދޫ ދާއިރާގެ މެންބަރު މޫސާ ސިރާޖެވެ.

ރާއްޖެ އަށް ވެންޓިލޭޓަރުތައް ގެނައުމުގަ އާއި ކޮވިޑްއާ ގުޅިގެން ހެލްތު މިނިސްޓްރީން ހަރަދު ކުރުމުގައި ކޮރަޕްޝަނަށް މަގުފަހިވާ ކަންތައްތަކެއް ފެންމަތިވެފައި ވެއެވެ. އަދި އެ މައްސަލާގައި އޮޑިޓް ރިޕޯޓުގަ އާއި އޭސީސީ އާއި ފުލުހުން ގުޅިގެން ކުރި ތަހުގީގަށް ފަހު އަމީން އާއި އިތުރު ބައެއްގެ މައްޗަށް ދައުވާކޮށްދިނުމަށް އެދި ޕްރޮސެކިއުޓާ ޖެނެރަލް އޮފީހަށް މައްސަލަ ފޮނުވާފައި ވެއެވެ. ނަމަވެސް އޭޖީން މިއަދު ވަނީ އެ މައްސަލާގައި ދައުވާކުރެވޭނެ އެކަށީގެންވާ ހެކި ނެތް ކަމަށް ބުނެ މައްސަލަ އަނބުރާ ފޮނުވާލާފައެވެ.