ޔައުގޫބް މަޖިލީހަށް ހާޒިރުވުން މަނާކުރުމުގެ އަމުރު ނެރެއެއް ނުދިން!

ރައްޔިތުންގެ މަޖިލީހުގެ ދާންދޫ ދާއިރާގެ މެންބަރު ޔައުގޫބް އަބްދުﷲގެ ގޮނޑިއާ މެދު އަމިއްލަ ފަރާތަކުން ސުޕްރީމް ކޯޓަށް ހުށަހަޅާފައިވާ މައްސަލާގައި ވަކި ގޮތެއް ކަނޑައަޅަންދެން މަޖިލީހަށް ވަޑައިގަތުން މަނާކުރުމަށް އަމުރެއް ނެރެދެވެން ނެތް ކަމަށް ސުޕްރީމް ކޯޓުން ނިންމައިފިއެވެ.

އިންސްޓިޓިއުޓް އޮފް ޗާޓާޑް އެކައުންޓެންޓްސް އޮފް ދަ މޯލްޑިވްސްގެ އިންތިޤާލީ ކައުންސިލުގެ މެންބަރުކަން ޔައުގޫބު ގަބޫލުކުރެއްވި މައްސަލައާ ގުޅިގެން އޭނާގެ ގޮނޑި ގެއްލިފައިވާ ކަމަށް ކަނޑައަޅައިދިނުމަށް ސުޕްރީމް ކޯޓަށް މައްސަލަ ހުށަހެޅުއްވީ ސިވިލް ކޯޓުގެ ކުރީގެ ގާޒީ އަދި ގާނޫނީ ވަކީލް މުހައްމަދު ހަލީމްއެވެ. އޮންލައިންކޮށް މިއަދު އޮތް އަޑުއެހުމުގައި ސުޕްރީމް ކޯޓުގައި މި މައްސަލަ ބައްލަވާ ފަނޑިޔާރުންގެ ބެންޗުން ވަނީ އެފަދަ އަމުރެއް ނެރެދެވެން ނެތް ކަމަށް ކަނޑައަޅުއްވާފައެވެ. މި މައްސަލަ ބައްލަވާ ބެންޗްގައި ތިއްބަވަނީ ފަނޑިޔާރު ހުސްނު ސުއޫދުގެ އިތުރުން ފަނޑިޔާރުން ކަމަށްވާ އައިޝާ ޝުޖޫން މުހައްމަދު، ޑރ. މުހައްމަދު އިބްރާހީމް، އަލީ ރަޝީދު އަދި ފަނޑިޔާރު މަހާޒް އަލީއެވެ.

advertisement

އެ އަމުރު ނެރެ ނުދެއްވި ސަބަބެއް ކަމަށް ފަނޑިޔާރުން ވިދާޅުވީ ވަގުތީ އަމުރެއް ނުނެރުމަކުން މައްސަލަ ހުށަހެޅި ފަރާތަށް ލިބޭނެ ގެއްލުމެއް ފެންނަން ނެތުމުން ކަމަށެވެ.

މި މައްސަލަ ސުޕްރީމް ކޯޓަށް ހުށަހަޅާފައި މި ވަނީ އިންސްޓިޓިއުޓް އޮފް ޗާޓާޑް އެކައުންޓެންޓްސް އޮފް ދަ މޯލްޑިވްސްގެ މެންބަރުކަމުގެ ފަތްކޮޅާ ވެސް ހަވާލުވެ ވަޑައިގަތް ފަހުން، އެއީ ދައުލަތުގެ ދެ ވަނަ މަގާމަކާ ހަވާލުވެވަޑައިގެންނެވީ ކަމަށް ބަލައި ގާނޫނީ ބައެއް ސުވާލުތައް ފެންމަތިކުރަން ފެށުމާ ގުޅިގެންނެވެ. އެ ސުވާލު ފެންމަތިވީ ގާނޫނު އަސާސީގެ 73 ވަނަ މާއްދާގެ (ރ)އާ ހިލާފު ކަމެއްގެ ގޮތުގައި ބައެއް ފަރާތްތަކުން އެކަން ސިފަކުރުމުންނެވެ. އެ މާއްދާގައި ބުނެފައި ވަނީ މަޖިލީހުގެ މެންބަރެއްގެ ހައިސިއްޔަތުން އަދާކުރަންޖެހޭ ވަޒީފާއެއް ފިޔަވައި ދައުލަތުގެ އެހެން ވަޒީފާއެއް މެންބަރަކު އަދާކޮށްގެން ނުވާނެ ކަމަށެވެ. ނަމަވެސް މެންބަރުކަން ގެއްލޭ ހާލަތްތައް އެ މާއްދާގެ (ނ)ގައި ކަނޑައަޅާފައިވާ އިރު އެހެން ވަޒީފާއެއް އަދާކުރުން ހިމެނިފައެއް ނުވެއެވެ. އެ އަކުރުގައި ހިމެނެނީ ސާބިތު ދަރަނި ހުކުމަކާ އެއްގޮތަށް ނުދެއްކުމާއި އެއް އަހަރަށް ވުރެ ދިގު ޖިނާއީ ހުކުމެއް އައުމާއި ފަނޑިޔާރަކަށް ވުން ކަމަށެވެ.

މި މައްސަލަ ފެންމަތިވުމާ އެކު ޔައުގޫބް ވަނީ އަމިއްލަފުޅަށް އިންސްޓިޓިއުޓް އޮފް ޗާޓާޑް އެކައުންޓެންޓްސް އޮފް ދަ މޯލްޑިވްސްގެ މެންބަރުކަމުން އިސްތިއުފާ ދެއްވާފައެވެ.

މިއީ 19 ވަނަ މަޖިލީހުގެ މެންބަރެއްގެ ގޮނޑިއާ މެދު ސުވާލު އުފައްދައި ސުޕްރީމް ކޯޓުން މައްސަލައެއް ބަލާ ފުރަތަމަ ފަހަރެވެ. ނަމަވެސް 18 ވަނަ މަޖިލީހާއި 17 ވަނަ މަޖިލީހުގައި ވެސް ބައެއް މެންބަރުންގެ ގޮނޑިއާ މެދު ސުވާލު އުފެދި ބެލި މައްސަލަތަކާ ގުޅިގެން ގޮނޑި ގެއްލިފައި ވެއެވެ. މެންބަރެއްގެ ގޮނޑިއާ މެދު ގޮތެއް ކަނޑައެޅުމުގެ އިހްތިސާސް ލިބިގެން ވަނީ ހަމައެކަނި ސުޕްރީމް ކޯޓަށެވެ.