އެމްޑީޕީއާ ގުޅިވަޑައިގަތުމަށް އިމްރާނަށް ދައުވަތު ދެއްވައިފި

ހޯމް މިނިސްޓަރު އިމްރާން އަބްދުﷲ މަސައްކަތްތައް ބައްޓަންކުރެއްވުމުގައި އަމިއްލްފުޅު ޕާޓީ އަށް ވުރެ އެމްޑީޕީ އަށް އިސްކަން ދެއްވާކަން ފާހަގަކުރައްވައި އެ ޕާޓީއާ ގުޅިވަޑައިގަތުމަށް ދައުވަތު ދެއްވައިފިއެވެ.

މިނިސްޓަރު އިމްރާން އެމްޑީޕީއާ ގުޅިވަޑައިގަތުމަށް ދައުވަތު ދެއްވީ މިއަދު މަޖިލީހުގައި އޮތް ޖަލްސާ އަށް ވަޑައިގެންނެވުމުން މަކުނުދޫ ދާއިރާގެ މެންބަރު މުހައްމަދު ރާއީއެވެ. އިމްރާން މިއަދުގެ ޖަލްސާ އަށް ވަޑައިގެންނެވީ ނޭކުރަންދޫގައި ޖަލެއް އެޅުމުގެ މަސައްކަތް ފެށޭނެ ތާރީހެއް އޮޅުންފިލުއްވުމަށް ރާއީ ހުށަހެޅުއްވި ސުވާލަކަށް ޖަވާބު ދެއްވުމުގެ ގޮތުންނެވެ.

advertisement

ރާއީ ވިދާޅުވީ އެ މަސައްކަތް ރޭވިފައިވާ ގޮތް މިނިސްޓަރު ވަރަށް ތަފްސީލްކޮށް ވިދާޅުވެ ދެއްވި ކަމަށާއި އަމިއްލަ ނަމުގަ އާއި ދާއިރާގެ ނަމުގައި ވެސް އެންމެ ދެކެން ބޭނުން ދުވަހަކީ މިނިސްޓަރު އެމްޑީޕީ އަށް ސޮއިކުރައްވާނެ ދުވަހެއް ކަމަށެވެ.

މި ހުށަހެޅުއްވުމާ ގުޅިގެން މިނިސްޓަރު ވިދާޅުވީ ސަރުކާރުގައި ހިމެނޭ ކޯލީޝަންގެ ހުރިހާ ބައިވެރިން ވެސް މަސައްކަތްކުރަނީ އެއް އަމާޒަކަށް، އެއް ނަތީޖާއެއް ނެރުމަށް ކަމަށެވެ. އަދި މަސައްކަތްކުރައްވަނީ އެމަނިކުފާނު ނިސްބަތްވާ އަދާލަތުގެ މެނިފެސްޓޯއަކީ ވެސް ސަރުކާރުގެ މެނިފެސްޓޯ ކަމަށް ބައްލަވައިގެން ކަމަަށެވެ. އެގޮތުން އަބަދު ވެސް މަސައްކަތްކުރައްވަނީ ރައްޔިތުންނަށް އުފާ ފާގަތިކަން ހޯއްދަވައިދެއްވުމަށް ކަމަށް ވެސް މިނިސްޓަރު ވިދާޅުވިއެވެ.

މިއަދުގެ ޖަލްސާގައި ބައެއް އެހެން މައްސަލަތަކާ ބެހޭ ގޮތުން ވެސް މެންބަރުން ވަނީ މިނިސްޓަރު އިމްރާނާ ސުވާލުކުރައްވާފައެވެ. އެގޮތުން އަވަހާރަކޮށްލާފައިވާ ކުރީގެ މެންބަރު ޑރ. އަފްރާޝީމް އަލީ އާއި ވަގަށް ނަގާފައިވާ ނޫސްވެރިޔާ އަހްމަދު ރިލްވާންގެ މައްސަލައާ ބެހޭ ގޮތުން ކުރީގެ ސަރުކާރުގައި އިދިކޮޅު ފަރާތްތަކުން މެއި 1، 2015ގައި ބޭއްވި މުޒާހަރާގައި އިމްރާން ދެއްކެވި ވާހަކަފުޅުތަކާ ބެހޭ ގޮތުން ނައިފަރު ދާއިރާގެ މެންބަރު އަހްމަދު ޝިޔާމް ވަނީ ސުވާލުކުރައްވާފައެވެ. ޝިޔާމް ސުވާލުކުރެއްވީ އެ ދެ މައްސަލައާ ގޫޅިގެން އޭރުގެ ރައީސް އަބްދުﷲ ޔާމީންގެ އިސްތަށިފުޅުގައި ތުހުމަތު އެޅޭ ގޮތަށް އެ ކަރުދާސްތައް ދައްކަވައި އިމްރާން ވާހަކަފުޅު ދައްކަވާފައިވާތީ އެ ކަރުދާސްތައް މިހާރު ކޮބައިތޯއެވެ.

މިނިސްޓަރު ވިދާޅުވީ އެ ދުވަހު ފުލުހުން ހައްޔަރުކުރިއިރު އެ ކަރުދާސްތައް އަތުލި ކަމަށެވެ. އެކަން ބަލަން ތަހުގީގެއް ކުރަންޖެހޭ ކަމަށް ވެސް މިނިސްޓަރު ވިދާޅުވިއެވެ. އެ ދުވަހު އިމްރާން ހައްޔަރުކުރުމަށް ފަހު ޓެރަރިޒަމްގެ ދައުވާކޮށް 12 އަހަރު ދުވަހަށް ޖަލަށް ހުކުމް ކުރިއެވެ. ނަމަވެސް ސުޕްރީމް ކޯޓުން ފަހުން ވަނީ އެ ހުކުމް ބާތިލްކޮށްފައެވެ.