ކަންކަން ނިންމުމުގައި ޒުވާނުންގެ ބަސް މުހިންމު: ރައީސް ސޯލިހް

މުޖުތަމައުގެ ކަންކަން ނިންމުމުގައި ޒުވާނުންގެ ބަސް ވަރަށް މުހިންމު ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ވިދާޅުވެއްޖެއެވެ.  

ޒުވާނުންގެ ދުވަހުގެ މުނާސަބަތުގައި ޒުވާނުންނަށް ތަހުނިޔާ ފޮނުއްވައި ރައީސް ސޯލިހް ކުރެއްވި ޓްވީޓެއްގައި ވިދާޅުވީ ގައުމުގެ އާރުކާޓީއަކީ ޒުވާނުން ކަމަށެވެ. އަދި ޒުވާނުންގެ ހުނަރާއި ގާބިލްކަން އިތުރުކުރުމަށް ފުރުސަތުތައް ފަހިކޮށްދޭންޖެހޭ ކަމަށާއި މުސްތަގުބަލަށް ކަންކަން ރާވާއިރު ޒުވާނުންގެ ހިޔާލާއި ބަސް ހޯދަންޖެހޭ ކަމަށް ވެސް ރައީސް ސޯލިހް ވިދާޅުވިއެވެ. 

advertisement

ޒުވާނުންގެ ދުވަސް މިއަދު ފާހަގަކުރާ އިރު ޔޫތު މިނިސްޓްރީން ވެސް ވަނީ ހަރަކާތްތަކެއް ފަށާފައެވެ. އެ ގޮތުން ޒުވާނުންގެ ކޭމްޕެއް ފަށާފައިވާ އިރު މި ދުވަހުގެ މުނާސަބަތުގައި ޔޫތު މިނިސްޓަރު އަހްމަދު މަހްލޫފް ވީޑިއޯ މެދުވެރިކޮށް ދެއްވި ހިތާބުގައި ވިދާޅުވެފައި ވަނީ ފާއިތުވި ދުވަސްތަކުގައި ޒުވާނުންނަށް އަމާޒުކޮށްގެ ގިނަ ކަންތައްތަކެއް ކުރެވިފައިވާ ކަމަށެވެ. އެ ގޮތުން ކުޅިވަރު ކުޅޭނެ ތަންތަން ބިނާކުރުމާއި ވަޒީފާގެ ފުރުސަތު ތަނަވަސްކުރުމަށް ގިނަ މަސައްކަތްތަކެއް ސަރުކަރުން ކޮށްފައިވާ ކަމަށެވެ. މީގެ އިތުރުން މީގެ ކުރިން ދުވަހަކު ވެސް ފަހިކޮށްދީފައި ނުވާ މިންވަރަށް މި ސަރުކާރުން ޒުވާނުންނަށް މަތީ ތައުލީމުގެ ފުރުސަތުތައް ފަހިކޮށްދީފައިވާ ކަމަށް މިނިސްޓަރު ވިދާޅުވިއެވެ. އަދި ޕީއެސްއައިޕީ މަޝްރޫއުގެ ތެރެއިން 40 ވަރަކަށް ޕަސެންޓް ކުރަމުން އަންނަނީ ވެސް ޔޫތު މިނިސްޓްރީން ކަމަށް މަހްލޫފް ފާހަގަކުރެއްވިއެވެ.