އެސެޓް ރިކަވަރީ ކޮމިޝަނަށް ނިހާން ހާޒިރުކޮށްފި

ކުރީގެ ސަރުކާރުން ހިންގާފައިވާ ހިޔާނާތުގެ މައްސަލަތައް ބަލައި ދައުލަތަށް ލިބެންޖެހޭ ފައިސާ ހޯދުމަށް ރައީސުލް ޖުމްހޫރިއްޔާ އިބްރާހީމް މުހައްމަދު ސޯލިހް އުފައްދަވާފައިވާ އެސެޓް ރިކަވަރީ ކޮމިޝަނަށް މަޖިލީހުގެ ކުރީގެ މެންބަރު އަހްމަދު ނިހާން ހުސައިން މަނިކު ހާޒިރުކޮށްފިއެވެ. 

ވިލިމާލެ ދާއިރާގެ މެންބަރުކަން ކުރެއްވި ނިހާން ރިޔާސީ ކޮމިޝަނަށް ހާޒިރުކޮށް ސުވާލުކޮށްފައި ވަނީ މިދިޔަ ބުރާސްފަތި ދުވަހުއެވެ. މިދިޔަ ސަރުކާރުގެ ތެރޭގައި އާމްދަނީއާ ނުބައްދަލު ދިރިއުޅުއްވުމެއް އުޅުއްވުމުން ނިހާންގެ މައްޗަށް ގިނަ ތުހުމަތަކެއް ކުރެވިފައި ވެއެވެ. އެ ގޮތުން އަގު ބޮޑެތި ގަޑިތައް ބައްލަވައިގަތުމާއި ފްލެޓާއި އަގު ބޮޑު ކަރުފަދަ ތަކެތި ބައްލަވައިގެންނެވި އިރު އެއީ މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރުސީ)ގެ ހިޔާނާތުގެ ފައިދާ ނިހާނަށް ލިބުނު ކަމަށް ތުހުމަތު ކުރެވެއެވެ. ނަމަވެސް މި ހުރިހާ ކަމަކަށް ނިހަން ވަނީ މީގެ ކުރިން ވެސް އިންކަރު ކުރައްވާފައެވެ. އަދި އަގު ބޮޑު ރޮލެކްސް ގަޑިތަކާއި ދަރިފުޅަށް ހަދިޔާކުރެއްވި ފްލެޓާއި އަގު ބޮޑު ކާރަކީ ވެސް ހަލާލު ގޮތުގައި ހޯއްދެވި ފައިސާ ކަމަށް ވިދާޅުވެފައި ވެއެވެ. ނަމަވެސް ނިހާން ކުރައްވާ މާބޮޑު ވިޔަފާރިއެއް ފެންނަން ނެތުމާއި މަޖިލީހުގެ މުސާރައިން އެ ހުރިހާ ކަމެއް ކުރެވިދާނެތޯ އެތައް ބަޔަކު ސުވާލުކުރެއެވެ.

advertisement

ވެރިކަން ބަދަލުވުމަށް ފަހު ކުރިމަތިވި ރައްޔިތުންގެ މަޖިލީހުގެ އިންތިހާބުގައި އުފަން ރަށް ތިނަދޫ ދެކުނު ދާއިރާ އަށް ކުރިމަތިލައްވައި ލިބިވަޑައިގެންނެވި ބޮޑު ނާކާމިޔާބީ އަށް ފަހު ނިހާން ވަނީ ވެރިކަންކުރާ ކޯލީޝަންގައި ހިމެނޭ ޖުމްހޫރީ ޕާޓީއާ ގުޅިވަޑައިގެންފައެވެ.

ކުރީގެ މަޖިލީހުގެ މެޖޯރިޓީ ލީޑަރުކަން ވެސް ކުރެއްވި ނިހާންގެ މައްޗަށް ކުރެވޭ ތުހުމަތާއި ހާޒިރުކުރި ސަބަބެއް އެސެޓް ރިކަވަރީ ކޮމިޝަނުން ހާމަކޮށްފައެއް ނުވެއެވެ.