އެންޓިބޮޑީ ޓެސްޓަށް އާންމުންގެ އެއްބާރުލުން ދިނުމަށް އެޗްޕީއޭއިން އެދިއްޖެ

އެންޓިބޮޑީސް ޓެސްޓްކުރާ “ސީރޯ ޕްރިވެލަންސް ސަރވޭ” ފުރިހަމަ ކުރުމުގައި އާއްމުން އެއްބާރުލުންދެއްވުމަށް އެޗް.އީ.އޯ.ސީން އެދިއްޖެއެވެ. އެންޓިބޮޑީ ޓެސްޓް ކުރިއަށްގެންދަނީ ހެލްތު ޕްރޮޓެކްޝަން އެޖެންސީ، އެޗް.ޕީ.އޭ އާއި، ދިވެހިރާއްޖޭގެ ޤައުމީ ޔުނިވަރސިޓީ ގުޅިގެންނެވެ.

އެޗް.އީ.އޯ.ސީގެ ތަރުޖަމާން ފާތުމަތު ނަޒްލާ ރަފީޤު ވިދާޅުވީ، މިސަރވޭގެ ފުރަތަމަ ބުރު ނިމި، ދެވަނަ ބުރު މިހާރު ފަށައިގެން ކުރިއަށްދާކަމަށެވެ. މިއީ މުޖުތަމަޢުގެ އެކި އުމުރުފުރާގެ މެދުގައި ކޯވިޑް-19 ފެތުރިފައިވާ މިންވަރު ދެނެގަތުމަށް ވަރަށް މުހިއްމު ސަރވޭއެއްކަމުން، ސަރވޭ ވީހާވެސް އަވަހަށް ނިންމާލުމަށް އާއްމުންގެ ބައިވެރިވުން ވަރަށް ބޮޑަށް ބޭނުންވާނެކަމަށެވެ.

advertisement

ދެވަނަ ބުރުގައި ސާމްޕަލް ނަގާނެ މީހުން ކަނޑައަޅަނީ ރެންޑަމް ސާމްޕަލްތަކުގެ ތެރެއިން ނަމެއް ނެގުމަށްފަހު އެ ފަރާތަކަށް އެސް.އެމް.އެސް ފޮނުވައިގެންނެވެ. އެހެންކަމުން އެސް.އެމް.އެސް ލިބޭ ފަރާތްތަކުން، އެކަމަށް އިޖާބަދީ، ސާމްޕަލް ނެގުމަށް އެޗްޕީއޭއިން ވަނީ އެދިފައެވެ.

ސީރޯ ޕްރިވެލަންސް ސަރވޭއަކީ، ގްރޭޓަރ މާލެ ސަރަހައްދުގެ އާބާދީގެ ތެރެއިން ކުރިން މި ބައްޔަށް ހުށައެޅިފައި ވަނީ އާބާދީގެ ކިތައް އިންސައްތަ މީހުންތޯ ދެނެގަތުމަށް ކުރިއަށްގެންދާ ސަރވޭއެކެވެ. މީގެއިތުރުން ކޯވިޑް-19 އިތުރަށް ފެތުރިގެންދާ ބާރުމިނާއި، ޕޮލިސީތަކަށް އިތުރަށް ގެންނަންޖެހޭ ބަދަލުތައް ދެނެގަތުމަށްވެސް މި ސަރވޭ އެހީތެރިވެދޭނެއެވެ.

މާލޭ ސަރަހައްދުގައި ކުރިއަށްގެންދާ ސީރޯ ޕްރިވެލަންސް ސަރވޭގައި ސާމްޕަލް ނެގޭނެ އިންތިޒާމް 4 ތަނެއްގައި ވަނީ ހަމަޖައްސާފައެވެ. އެގޮތުން މާލޭގައި ނަމަ ޤައުމީ ޔުނިވަރސިޓީގެ ފެކަލްޓީ އޮފް ހެލްތު ސައިންސަސް އަދި ފެކަލްޓީ އޮފް އެޑިއުކޭޝަނަށް ސާމްޕަލް ނެގޭނެއެވެ. އަދި ހުޅުމާލޭގައި ޖެމްސް ޕްރީސްކޫލް އަދި ވިލިމާލޭގައި ނަމަ ވިލިމާލޭ ހޮސްޕިޓަލުން ސާމްޕަލް ނެގުމުގެ ކަންކަން ކުރިއަށްދާނެއެވެ. މިތަންތަނުގައި ސާމްޕަލް ނެގުން ކުރިއަށްދާނީ ހަވީރު 4 އިން ރޭގަނޑު 7 ޖެހުމާއި ހަމައަށެވެ.