އިންޑިއާގެ އެތެރޭގެ އުދުހުންތަކެއްގައި މޯލްޑިވިއަންގެ ސީޕްލޭނާއިި ކްރޫ ބޭނުންކުރަނީ!

އިންޑިއާގެ އެތެރޭގެ އުދުހުންތަކެއް ކުރުމަށް މޯލްޑިވިއަންގެ ސީޕްލޭނަކާއި ކްރޫން މިއަދު އިންޑިއާ އަށް ހިނގައްޖެއެވެ.

އިންޑިއާ ހައި ކޮމިޝަނުން ކުރި ޓްވީޓެއްގައި ބުނެފައި ވަނީ އިންޑިއާގެ ފުރަތަމަ ސީޕްލޭން ހިދުމަތް ފެށުމަށް ތައްޔާރުވަމުން އަންނަ ކަމަށާއި އެ ހިދުމަތް ފައްޓަވައި ދެއްވާނީ ބޮޑުވަޒީރު ނަރެންދުރަ މޯދީ ކަމަށެވެ. މި ހިދުމަތް ފެށުމުގެ ގޮތުން ފުރަތަމަ ބޭނުންކުރާނީ މޯލްޑިވިއަންގެ ސީޕްލޭނެއް ކަމަށާއި ދަތުރުތައް ކުރުމަށް ހަމަޖެހިފައި ވަނީ އަހްމަދުއާބާދުގެ ސަބްރަމަތީ ރިވަފްރެންޓާއި ގުޖުރާތުގެ ނަރްމަދާ ޑިސްޓްރިކްޓްގެ ސަރަހައްދެއް ކަމަށްވާ ކެވާޑިއާގެ ސްޓެޗޫ އޮފް ޔުނިޓީ ހުންނަ ސަރަހައްދާ ދެމެދުގައި ކަމަށް ވެސް އިންޑިއާގެ ހައި ކޮމިޝަނުން ބުނެފައި ވެއެވެ.

advertisement

މޯލްޑިވިއަންގެ ސީޕްލޭނާއި އޭގެ ކްރޫން މިއަދު އަހްމަދުއާބާދަށް ގޮސްފައި ވަނީ ހދ. ކުޅުދުއްފުށިން ފުރައިގެން ކޮޗިން އަދި ގޯވާ އަށް ޖައްސާފައެވެ.

މި ދަތުރުތައް ފުރަތަމަ ކުރުމަށް ހަމަޖައްސާފައި މި ވަނީ އެ ގައުމުގެ މިނިވަންކަމުގެ ބަތޮލެއް ކަމަށްވާ ސަރުދާރު ވައްލަބާއީ ޕަޓޭލްގެ އުފަންދުވަސް ފާހަގަކުރުމުގެ ގޮތުން ބާއްވާ ހަރަކާތްތަކާ ދިމާކޮށެވެ. ސްޓެޗޫ އޮފް ޔުނިޓީއަކީ އިންޑިއާ މިނިވަންކަމުގެ ބާނީ މަހާތަމާ ގާންދީގެ އަރިހުގައި މިނިވަންކަމަށް މަސައްކަތްކުރެއްވި އަދި މިނިވަން އިންޑިއާގެ ފުރަތަމަ ޑެޕިއުޓީ ޕްރައިމް މިނިސްޓަރުކަން ކުރެއްވި އަދި ހޯމް މިނިސްޓަރުކަން ވެސް ކުރެއްވި ސަރުދާރު ޕަޓޭލްގެ ހަނދާނުގައި 2018 ވަނަ އަހަރުގެ އޮކްޓޫބަރު 31 ވަނަ ދުވަހު ބޮޑު ވަޒީރު މޯދީ އިފްތިތާހުކޮށްދެއްވި ބުދުގެ ބިނާއެކެވެ. މިއީ ދުނިޔޭގެ ވެސް އެންމެ އުސް ސްޓެޗޫއެވެ. އުސްމިނުގައި 182 މީޓަރު ހުރެއެވެ. މިތަން ހުޅުވި ފަހުން ޓުއަރިސްޓުންގެ ސަމާލުކަން ވަނީ ވަރަށް ބޮޑަށް ލިބިގެން ގޮސްފައެވެ. އެ ގޮތުން 2019 ވަނަ އަހަރުގެ ނޮވެމްބަރު މަހު އެވްރެޖްކޮށް ދުވާލެއްގެ މައްޗަށް 15،036 ޓުއަރިސްޓުން ޒިޔާރަތްކޮށްފައި ވެއެވެ. މިއީ އެމެރިކާގެ ސްޓެޗޫ އޮފް ލިބަޓީ އަށް ޒިޔާރަތްކުރާ މީހުންނަށް ވެސް އިތުރު އަދަދެކެވެ.

މި މަހުގެ 31 ވަނަ ދުވަހު ފާހަގަކުރާނީ ސަރުދާރު ޕަޓޭލްގެ 143 ވަނަ އުފަންދުވަހެވެ. މި ދުވަސް ފާހަގަކުރުމަށް ބާއްވާ ހަރަކާތްތަކުގައި ގިނަ ބަޔަކު ބައިވެރިވާ އިރު މޯލްޑިވިއަންގެ ސީޕްލޭން ބޭނުންކުރާނީ މި ފަރާތްތައް އުފުލުމުގައެވެ.

ފުރަތަމަ ދަތުރުތައް ފަށައިގަންނަ އިރު ދުވާލަކު އަށް ދަތުރު ބޭއްވުމަށް ވަނީ ހަމަޖައްސާފައެވެ. މިއިން ކޮންމެ ދަތުރެއްގައި އުފުލޭނީ 14 މީހުންނެވެ. މި ދަތުރުތައް ކުރުމަށް ހަމަޖައްސާފައި ވަނީ 4،800 އިންޑިއަން ރުޕީސް އަށް ޓިކެޓް ވިއްކައިގެން ކަމަށް ހައި ކޮމިޝަނުން ބުނެއެވެ.