ބޮޑެތި މައްސަލަތަކުގައި އޭސީސީ މަޒީ އަށް ރުޖޫއަ ވާންޖެހިފައި!

މިދިޔަ ސަރުކާރުން ހިންގި ބިޔަ މަޝްރޫއުތައް ފެންނަން ހުރި ކަމުގައި ވިޔަސް އެއީ ކޮރަޕްޝަންގެ ރަމްޒުތަކެއްގެ ގޮތުގައި ގިނަ ބަޔަކު ސިފަކުރެއެވެ. އޭގެ ތެރެއިން ވެސް އެންމެ ބޮޑު ތުހުމަތެއް ކުރެވޭ އެއް ބިނާއަކީ ދަރުމަވަންތަ ހޮސްޕިޓަލްއެވެ. ކުރެހުމުގައި ދެ އިމާރާތެއް ހިމެނުނު ނަމަވެސް މަޝްރޫއު ނިމުނު އިރު އެއް އިމާރާތް ވީތަނެއް ނޭނގިގެން އެތައް ބަޔަކު ސުވާލު ކުރެއެވެ. އަދި 143 މިލިއަން ޑޮލަރު (2.2 ބިލިއަން ރުފިޔާ) ހޭދަކޮށްގެން ހަދާފައި ހުރި 25 ބުރީގެ އިމާރާތާ މެދު އެތައް ސުވާލެއް އުފެދިފައި ވެއެވެ. ނަމަވެސް އޭރު ކުރެވުނު ތުހުމަތުތައް ބަލައި އެންޓި ކޮރަޕްޝަން ކޮމިޝަނުން ނިންމާފައި ވަނީ އެކަމުގައި ކޮރަޕްޝަނެއް ނެތް ކަމަށެވެ. މި ނޫން އެހެން މަޝްރޫއުތަކާ މެދު ވެސް އޭސީސީން ކުރި ތަހުގީގުތައް ނިމިފައި ވަނީ ވަރަށް “ވަނދުކޮށް” ކަމަށް ގިނަ ބަޔަކު ގަބޫލުކުރެއެވެ.

ނިމިދިޔަ ސަރުކާރުގައި މިނިވަން މުއައްސަސާތަކުން ނިންމާ މައްސަލަތަކާ މެދު ވެސް ސުވާލު އުފެދޭ އެތައް ކަމެއް ފެންމަތިވެފައި ވެއެވެ. އެ ގޮތުން މިނިވަން މުއައްސަސާތަކުގެ ވެރިންނަށް ފްލެޓާއި “ހަދިޔާތައް” ލިބެމުން ދިއުމާއި ސަރުކާރުން ބޭނުންވާ ގޮތަށް ކަންކަން ނިމުމާއި ސަރުކާރު ޕްރޮމޯޓްކުރުމުގައި މިނިވަން މުއައްސަސާތަކުގެ ވެރިން އަމަލީ ގޮތުން ބައިވެރިވެވަޑައިގެން ކެމްޕެއިން ހަރަކާތްތައް ހިންގެވިކަން މާޒީ އަށް ބަލާލުމުން ފެންނަން ހުރުމުން ކުރެވޭ ޝައްކުތައް ބޮޑެވެ. އެހެންކަމުން މިނިވަން މުއައްސަސާތަކުންނާއި ކޯޓުތަކުން ނެރުނު ހުކުމްތަކާ މެދު އާއްމުންގެ ޝަކުވާތައް ގިނައެވެ. އެފަދަ މައްސަލަތައް އަލުން ބަލުން ބެލުމަށް ގޮވާލާ އަޑުތައް ގިނައެވެ.

advertisement

މިދިޔަ ސަރުކާރުން ހިންގި ގިނަ މަޝްރޫއުތަކެއް ހަމަ ލޮލަށް ފެންނަން އެބަ ހުއްޓެވެ. ދަރުމަވަންތަ އިމާރާތާއި ބްރިޖާއި އެ ނޫން ވެސް ތަފާތު ބިނާތައް ފެންނަން އެބަހުއްޓެވެ. އިންތިހާބާ ދިމާކޮށް ވޯޓު ހޯދުމަށް ބޭނުންކުރި މައިގަނޑު ހަތިޔާރަކީ ވެސް މި ބިނާތަކެވެ. ނަމަވެސް ރިޔާސީ އިންތިހާބުގެ ނަތީޖާ އިން ފެންނަން އޮތީ އެފަދަ ބިނާތަކަށް ވުރެ ކޮރަޕްޝަން ހުއްޓުވަން ރައްޔިތުން ބޭނުންވާ ކަމެކެވެ. އިންސާނީ ހައްގުތައް މާ މުހިންމު ކަމެވެ. ނޫސްވެރިކަމާއި ހިޔާލު ފާޅުކުރުމުގެ މުހިންމުކަން ދިވެހިންނަށް މާރަނގަޅަށް ވެސް ވިސްނިފައި އޮތް ކަމެވެ. އެހެންކަމުން ކޮރަޕްޝަނަށް ތުހުމަތުކުރެވޭ މައްސަލަތަކާއި ހައްގުތައް ނިގުޅައިގަތުމަށް ކޮށްފައިވާ ކަންކަން އަލުން ބެލުމަށް ދިވެހިން އެދެއެވެ. އޭސީސީ އާއި އެ ނޫން ވެސް މިނިވަން މުއައްސަސާތަކާއި ޝަރުއީ ދާއިރާގެ ތެރެއިން ނިންމާފައިވާ މިފަދަ ބައެއް މައްސަލަތައް ބަލަން ރައްޔިތުން ތިބީ އެދި އެދިއެވެ.  

އޭސީީސީން މިހާރު ގެންދަނީ ކުރިން އެ މުއައްސަސާ އިން ނިންމާފައިވާ ބައެއް މައްސަލަތައް މުރާޖައާ ކުރަމުންނެވެ. ބައެއް މައްސަލަތައް ބަލަމުންދާ ކަމަށް މީގެ މަސްތަކެއް ކުރިން ވެސް އޭސީސީން ބުނެފައި ވެއެވެ. ނަމަވެސް މާ ބޮޑު ތަފްސީލްތަކެއް މިއަދާ ހަމައަށް ވެސް ހާމަނުކުރާތީ އޭސީސީން ދައްކާ ވާހަކައިގެ އިހްލާސްތެރިކަމާ މެދު ބައެއް ފަރާތްތަކުން ސުވާލު އުފައްދައެވެ. އެފަދަ ވާހަކައެއް މި ހަފުތާގައި ވެސް އަނެއްކާ އޭސީސީން ވަނީ ދައްކާފައެވެ. ބީލަމަކާ ނުލައި 25 ބުރީގެ އިމާރާތް އެޅުމަށް ސިންގަޕޫރުގެ ޝެންހުއާ ކޮންސްޓްރަކްޝަނާ ހަވާލުކުރި މައްސަލައަކީ ވެސް އޭގެ ތެރެއިން އެއް މައްސަލައެވެ. އެ މައްސަލަ 2017 ވަނަ އަހަރު ނިންމާފައި ވަނީ ކޮރަޕްޝަން ނެތް މައްސަލައެއްގެ ގޮތުގައެވެ. ނަމަވެސް މިހާރު މެންބަރުން ބަދަލުވެފައިވާ އިރު ދައުލަތުން ގެއްލިފައިވާ ފައިސާ ހޯދުމަށް ރައީސުލްޖުމްހޫރިއްޔާ އުފައްދަވާފައިވާ އެސެޓް ރިކަވަރީ ކޮމިޝަނުން ވެސް އެދިފައި ވަނީ މި މައްސަލަ އަލުން ބަލައިދިނުމަށް ކަމަށް އޭސީސީން ބުނެއެވެ.

ދަރުމަވަންތަ ހޮސްޕިޓަލް އެޅުމަށް ކުރި ހޭދައަކީ އެފަދަ އިމާރާތެއް އެޅުމަށް ދާނެ ހަރަދަށް ވުރެ ތިން ގުނަ ބޮޑު އަދަދެއް ކަމަށް އޭރު ވެސް ބައެއް ފަރާތްތަކުން ދިޔައީ ބުނަމުންނެވެ. ނަމަވެސް ސަރުކާރުން ބުނަމުން ދިޔައީ އެއީ ކުރު މުއްދަތެއްގައި ސަރުކާރުން ބޭނުންވާ ގޮތަށް އެކަން ކުރެވޭނެ އެންމެ ރަނގަޅު ގޮތް ކަމަށެވެ. އަނެއްކޮޅުން އެ މަޝްރޫއު ހަވާލުކުރީ ސީދާ އެކަން ކުރުމުގެ ބޭނުމުގައި މާލިއްޔަތު ގާނޫނަށް ވެސް ބަދަލުތައް ގެނެސްގެންނެވެ.

މި ނޫން ވެސް އެފަދަ އެތައް މައްސަލައެއް މިނިވަން މުއައްސަސާތަކުން އޭރު ފައިލްކޮށްފައި ވަނީ ސަރުކާރުން ބޭނުންވި ގޮތަށެވެ. ނަމަވެސް އެކަން ކުރުމަށް ގާނޫނާއި ގަވާއިދުތަކަށް ބަދަލު ގެނައުމާއި މިނިވަން މުއައްސަސާތައް އޮތް ގޮތާއި ޝަރުއީ ދާއިރާ އިން އަމަލުކުރަމުން ދިޔަ ގޮތަކީ ފެންނަން އޮތް ހަގީގަތެކެވެ. އޭރު އޮތް ސަރުކާރު ބަދަލުކުރުމަށް ގިނަ ބަޔަކު ވޯޓު ދިން އެއް ސަބަބަކީ ވެސް މާޒީ އަށް އިންސާފު ލިބުމެވެ. މަޑުން އަދު މަދުން ނަމަވެސް އެކަން ވަމުންދާކަމުގެ އިހްސާސް މިހާރު ވެސް ކުރެވެއެވެ. މާޒީ އަށް ރުޖޫއަވެ މައްސލަަތައް ބަލައި އިންސާފު ގާއިމުކުރެވުމަކީ ރައްޔިތުންގެ އުންމީދެވެ.