ދަރަނި ރީސްޓްރަކްޗަރ ކުރަން ލަފާދީފި

ދައުލަތުގެ ދަރަނީގެ ކަންތައްތައް ހުރި ނެތްގޮތް ބަލައި މުޅި މަޖިލީހުގެ ކޮމިޓީން އެކުލަވައިލި ރިޕޯޓު ފާސްކޮށްފި އެވެ. ދަރަނި ރީސްޓްރަކްޗަރ ކުރަނީ އެހެން ގައުމުތަކާއި ބައިނަލްއަގުވާމީ މާލީ އިދާރާތަކުން ނަގާފައިވާ ދަރަނިތައް ފިޔަވައި ދެންހުރި ދަރަނިތަކެވެ.

މި ރިޕޯޓް ފާސްވީ ޖަލްސާގައި ބައިވެރިވެވަޑައިގެންނެވި 67 މެމްބަރުންގެ ތެރެއިން 56 މެމްބަރުންގެ ވޯޓުންނެވެ.

advertisement

ދަރަންޏާ ގުޅޭ ގޮތުން 10 ކަމެއް ކުރަން ރިޕޯޓުގައި ސަރުކާރަށް ވަނީ ލަފާދީފައިވެ އެވެ. އޭގެތެރޭގައި ލޯނުތައް ރިސްޓްރަކްޗާކުރުމާއި، ދަރަނީގެ ކަންތައް އެގޮތަށް ހަމަޖައްސަން ހާއްސަ ކޮމިޓީއެއް އުފައްދައި، އެ ކޮމިޓީ އަށް ބައިނަލްއަގުވާމީ މާލީ މާހިރުންގެ ފަންނީ ލަފާ ހޯދަން ވެސް އެ ހުށަހެޅުމުގައި ލަފާދީފައިވެ އެވެ. އަށް މަސްދުވަހުގެ ތެރޭގައި ކޮމިޓީގެ މަސައްކަތް ނިންމައި ކޮމިޓީގެ ހޯދުންތައް ރައީސްއާއި މަޖިލީހަށް ހުށަހަޅަން ވެސް ރިޕޯޓްގައި ލަފާދީފައިވެ އެވެ.

ރިޕޯޓްގައި ސަރުކާރަށް ލަފާދީފައިވާ މުހިއްމު އަނެއް ކަމަކީ އަންނަ އަހަރު ދައްކަން ޖެހޭ އެތެރޭގެ ދަރަނިތައް ރޯލް-އޯވާ ކޮށް އެދަރަނި ދެއްކުން ފަސްކުރަން ފިނޭންސް މިނިސްޓްރީއަށް އެންގުމެވެ. ދަރަނި ރިސްޓްރަކްޗާކުރުމަށް ބޭނުންވާ ގާނޫނީ ބަދަލުތައް ގެންނަން ވެސް ރިޕޯޓްގައި ލަފާދީފައި ވެއެވެ.