ވަކިކުރުމުގެ މައްސަލަ ތާވަލްކުރުމުން ބްރޮޑްކޮމް އިން ޒީނާ އިސްތިއުފާ ދެއްވައިފި

މޯލްޑިވްސް ބްރޯޑްކާސްޓިން ކޮމިޝަންގެ މެންބަރު ކަމުން ޒީނާ ޒާހިރު ވަކިކުރުމަށް ކޮމިޓީން ނިންމި ގޮތުގެ ރިޕޯޓް މިއަދުގެ ޖަލްސާ އަށް އެޖެންޑާ ކުރުމާ އެކު މަގާމުން އިސްތިއުފާ ދެއްވައިފިއެވެ.

ބްރޯޑްކާސްޓިން ކޮމިޝަންގެ ގާނޫނު ބުނާ ގޮތުން މެންބަރަކު އިސްތިއުފާ ދެއްވުމަށް އެދި ރައީސުލްޖުމްހޫރިއްޔާ އަށް ސިޓީއަކުން އެކަން އެންގުމުން އެ މެންބަރަކު މަގާމުން ވަކިވީއެވެ. މަޖިލީހުގެ އެޖެންޑާ ރޭގެ ވަގުތެއްގައި އާންމުކޮށްފައިވާ އިރު ޒީނާގެ އިތުބާރު ނެތް ކަމަށް މިނިވަން މުއައްސަސާތަކުގެ ކޮމިޓީން ނިންމި ގޮތުގެ ރިޕޯޓަށް ވޯޓަށް އެހުން ހިމަނާފައި ވެއެވެ.

advertisement

އިސްތިއުފާ ދެއްވުމަށް ޒީނާ ފޮނުއްވި ސިޓީގައި ވިދާޅުވެފައި ވަނީ އެ ގޮތަށް ނިންމެވީ މިނިވަން މުއައްސަސާތަކުގެ ކޮމިޓީން ނިންމި ނުންމުން އިންސާފުވެރިކަމަށް ދެކިވަޑައި ނުގަންނަވާތީ ކަމަށެވެ. ޒިނާ ވަކިކުރަން މަޖިލީހުގެ ތަޅުމަށް ފޮނުވަން ކޮމިޓީން ނިންމީ ބައްދަލުވުމުގައި ބައިވެރިވެވަޑައިގެންނެވި 9 މެންބަރުންގެ ތެރެއިން ފަސް މެންބަރަކު ވޯޓު ދެއްވައިގެންނެވެ. ކޮމިޓީން ތުހުމަތުކޮށްފައިވާ ކަންތައްތަކުގެ ތެރޭގައި ކޮމިޝަނަށް އެކަށީގެންވާ ވަގުތު ނުދިނުމާއި ރާއްޖެ ޓީވީއާ މެދު ފިޔަވަޅު އެޅުމަށް ޑިފެންސް މިނިސްޓްރީ އަށް އެންގުމަށް ސިޓީ ފޮނުވި މައްސަލަ ހިމެނެއެވެ.

މިދިޔަ ސަރުކާރުގެ ތެރޭގައި އަބުރުގެ ގާނޫނު ބޭނުންކޮށްގެން ރާއްޖެ ޓީވީ 3.7 މިލިއަން ރުފިޔާ އިން ޖޫރިމަނާކުރި މައްސަލަތަކުގައި ވެސް ޒީނާ ވަނީ ޖޫރިމަނާކުރުމަށް ތާއީދުކުރައްވާފައެވެ.

ޒީނާ އިސްތިއުފާ ދެއްވި އިރު މީގެ ކުރިން ތިއްބެވި ބައެއް އެހެން މެންބަރުންގެ މައްސަލަތައް ވެސް މަޖިލީހުގައި ތާވަލްކުރުމުން އިސްތިއުފާ ދެއްވާފައި ވެއެވެ. އޭގެ ތެރޭގައި ކޮމިޝަންގެ ރައީސަކަށް އޭރު ހުންނެވި މުހައްމަދު ޝަހީބު ވެސް ހިމެނިވަޑައިގަންނަވައެވެ.

ކުރީގެ ސަރުކާރު އޮތް އިރު ބްރޯޑްކޮމް އަށް ހޮވި މެންބަރުންގެ ތެރެއިން މިހާރު ތިއްބެވީ ޒީނާއާ އެކު 5 އޭޕްރީލް 2016ގައި ކޮމިޝަންގެ މެންބަރު ކަމަށް ވަޑައިގެންނެވި ގާނޫނީ ވަކީލް އާމިނަތު ޝަރާހަތު އިއްޒަތާއި 15 މާޗް 2018ގައި ކޮމިޝަންގެ މެންބަރު ކަމަށް ވަޑައިގެންނެވި އަމްޖަދު ވަހީދެވެ. ދެން ތިއްބެވި މެންބަރުންނަކީ މި ސަރުކާރު އައި ފަހުން ކޮމިޝަނަށް ވަޑައިގެންނެވި މެންބަރުންނެވެ. އެ ގޮތުން ކޮމިޝަންގެ ރައީސް މަރިޔަމް ވަހީދާ އާއި ނައިބު ރައީސް އަހްމަދު ގައިސް ކޮމިޝަނަށް އައްޔަންކުރެއްވީ 5 ޑިސެމްބަރު 2019ގައެވެ. އާމިނަތު އަމީނާ ކޮމިޝަނަރަކަށް އައްޔަންކުރައްވީ 14 ޖޫން 2020ގައެވެ. ޒީނާ އިސްތިއުފާ ދެއްވުމުން މިހާރު ތިއްބަވާނީ ހަ މެންބަރުންނެވެ.