އެންއައިސީގެ ރައީސް ކަމަށް ގާސިމް އައްޔަންކުރައްވައިފި

ނޭޝަނަލް އިންޓަގްރިޓީ ކޮމިޝަން (އެންއައިސީ)ގެ ރައީސް ކަމަށް އެ ކޮމިޝަނަށް ދާދި ފަހުން ރައީސުލްޖުމްހޫރިއްޔާ އައްޔަންކުރެއްވި ގާސިމް އަބްދުލްކަރީމް ހަމަޖައްސަވައިފިއެވެ.

މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރުސީ)ގެ ބޮޑު ހިޔާނާތުގެ މައްސަލަ އެންމެ ފުރަތަމަ ފެންމަތިކުރެއްވި ގާސިމް އެންއައިސީގެ މެންބަރު ކަމަށް އައްޔަންކުރެއްވީ އެ ކޮމިޝަނުގެ ހަތަރު މަގާމެއް ހުސްވުމާ ގުޅިގެންނެވެ.

advertisement

ގާސިމް އެންމެ ފަހުން ހުންނެވީ މޯލްޑިވްސް ސެންޓަ ފޯ އިސްލާމިކް ފައިނޭންސް ލިމިޓެޑް (އެމްސީއައިއެފް)ގެ ޗެއާމަންގެ މަގާމުގައެވެ. އެ މަގާމަށް އޭނާ އައްޔަންކުރެއްވީ މިދިޔަ އަހަރުގެ އޮކްޓޫބަރު މަހުގެ ތެރޭގައެވެ.

ބީއެމްއެލްގެ މުވައްޒަފެއްގެ ގޮތުގައި ހުންނަވައި ގާސިމް ވަނީ އެމްއެމްޕީއާރުސީގެ ހިޔާނާތުގެ މައްސަލަ ތިލަކުރައްވާފައެވެ. ނަމަވެސް ވިސްލް ބްލޯވިން އުސޫލާ ހިލާފަށް ބޭންކްގެ ކަސްޓަމަރެއްގެ މައުލޫމާތު ފަޅާއަރުވާލި ކަމުގެ ތުހުމަތުގައި މިދިޔަ ސަރުކާރުގެ ތެރޭގައި ގާސިމް ވަނީ އަށް މަހާއި 12 ދުވަހަށް ޖަލަށް ލާފައެވެ.