އެމެރިކާގެ އެމްބަސީއެއް ރާއްޖޭގައި ހުޅުވާނެކަން މައިކް ޕޮންޕެއޯ އިއުލާންކުރައްވައިފި

ރާއްޖޭގައި އެމެރިކާގެ ދާއިމީ އެމްބަސީއެއް ހުޅުވުމަށް ނިންމާފައިވާކަމަށް އެ ޤައުމުގެ ސެކްރެޓަރީ އޮފް ސްޓޭޓް މައިކް ޕޮމްޕެއޯ އިޢުލާންކުރައްވައިފިއެވެ.

މައިކް ޕޮމްޕެއޯ މިކަން އިޢުލާންކުރައްވާފައި ރާއްޖެއަށް އިއްޔެ ކުރެއްވި ޒިޔާރަތުގައި ފޮރިން މިނިސްޓަރ ޢަބްދުﷲ ޝާހިދާއެކު ބޭއްވެވި މަޝްވަރާތަކަށްފަހު، ދެ ޤައުމުން ގުޅިގެން ދެއްވި ޖޮއިންޓް ސްޓޭޓްމަންޓްގައެވެ.

ޝެރެޓަން ފުލްމޫން ރިޒޯޓުގައި ދެއްވި ޖޮއިންޓް ސްޓޭޓްމަންޓްގައި ޕޮންޕެއޯ މިދާޅުވީ، ރާއްޖޭން ބައިނަލްއަޤްވާމީ މައިދާނުގައި ފާހަގަކޮށްލެވޭ ކުރިއެރުންތަކެއް ހޯދަމުންދާކަމަށެވެ. އަދި އެމެރިކާއިން ރާއްޖޭގެ ޑިމޮކްރަސީ ހަރުދަނާކޮށް ކުރިއެރުމަށް އަބަދުވެސް އެހީތެރިވެދޭނެކަމަށް ވިދާޅުވިއެވެ. އެގޮތުން ރާއްޖޭގައި އެމެރިކާގެ ދާއިމީ އެމްބަސީއެއް ޤާއިމުކުރުމަށް ނިންމާފައިވާކަމަށް މައިކް ޕޮމްޕެއޯ ވިދާޅުވިއެވެ. ރާއްޖެއާއި އެމެރިކާއާދެމެދު އޮތް އެކުވެރިކަމާއި ގުޅުމުގެ އަގު އަބަދުވެސް ވަޒަން ކުރާނެކަމަށް އޭނާ ވަނީ ވިދާޅުވެފައެވެ.

ފޮރިން މިނިސްޓަރ ޢަބްދުﷲ ޝާހިދު ވިދާޅުވީ، އެމެރިކާގެ ދާއިމީ އެމްބަސީއެއް ރާއްޖޭގައި ހުޅުވުމަށް ނިންމުމަކީ ދެ ޤައުމުގެ ގުޅުމަށް ވަރަށް ބޮޑު ބަދަހިކަމެއް އަންނާނެކަމެއްކަމަށެވެ. އަދި އެއީ އެމެރިކާގެ މިއަދުގެ ސަރުކާރުން ދިވެހިރާއްޖެއާއި ދޭތެރޭ ދެކެވަޑައިގަންނަވާގޮތް ވަރަށް ފުރިހަމައަށް އެނގިގެންދިޔަކަމެއްގެ ގޮތުގައިވެސް ފޮރިން މިނިސްޓަރ ވަނީ ސިފަކުރައްވާފައެވެ.

advertisement