އައްޑޫ ސިޓީއާއި ފުވައްމުލައް ސިޓީ ޔުނެސްކޯގެ ބަޔޮސްފިއަރ ރިޒާވްގެ ގޮތުގައި ހިމަނައިފި

އައްޑޫ ސިޓީއާއި ފުވައްމުލައް ސިޓީއަކީ ޔުނެސްކޯގެ ބަޔޮސްފިއަރ ރިޒާވެއްގެ ގޮތުގައި ކަނޑައަޅައިފިއެވެ.

އައްޑޫ އަދި ފުވައްމުލަކު ސިޓީއަށް ބަޔޮސްފިއަރ ރިޒާވްގެ ގޮތުގައި ހިމަނާފައިވަނީ، ޔުނެސްކޯގެ މޭން އެންޑް ބަޔޮސްފިއަރ ރިޒާވުގެ އިންޓަނޭޝަނަލް ކޯޑިނޭޓިންގް ކައުންސިލުގެ 32 ވަނަ ބައްދަލުވުމުގައެވެ. މި ބައްދަލުވުން ބާއްވާފައިވަނީ އޮންލައިންކޮށްނެވެ. ބައްދަލުވުމުގައި އެންވަޔަރަމަންޓް މިނިސްޓަރ ޑރ. ހުސެއިން ރަޝީދު ހަސަންއާއި އައްޑޫ ސިޓީ އަދި ފުވައްމުލަކު ސިޓީގެ މޭޔަރުން ވަނީ ބައިވެރިވެވަޑައިގެންފައެވެ.

advertisement

މިބައްދަލުވުމުގައި ވާހަކަފުޅު ދައްކަވަމުން މިނިސްޓަރ ޑރ. ހުސެއިން ރަޝީދު ހަސަން ވިދާޅުވީ، އައްޑޫ އާއި ފުވައްމުލަކަށް މިލަޤަބު ލިބިގެން ދިއުމަކީ، މިދެ ސިޓީގެ ރައްޔިތުންގެ އިތުރުން މުޅި ރާއްޖެއަށް ތާރީޙީ ދުވަހަކަށް ވެގެންދާނެ ކަމަށެވެ. ރާއްޖެ އަކީ މުރަކަ އަތޮޅުތަކާއި ފަރުތަށް ހިމެނޭ ރަށްތައްކަން ފާހަގަކުރައްވައި މިނިސްޓަރ ވިދާޅުވީ، ރާއްޖޭގެ ހުރިހާ އެންމެވެސް ދިރިއުޅުމަށާއި، ކެއިން ބުއިމަށް މިޤުދުރަތީ މުއްސަނދި ކަމަށް ބަރޯސާވާ ކަމަށެވެ.

އައްޑޫ ސިޓީއާއި ފުވައްމުލައް ސިޓީ ބަޔޮސްފިއަރ ރިޒަރ ސަރަހައްދެއްގެ ގޮތުގައި ހިމެނުމުން ރާއްޖޭގެ 3 ސަރަހައްދެއް ބަޔޮސްފިއަރ ރިޒާވްގެ ގޮތުގައި ވަނީ ހިމެނިގެންގޮސްފައެވެ. މި 2 ސަރަހައްދުގެ އިތުރުން ދެން ހިމެނެނީ ބ. އަތޮޅު ބަޔޮސްފިއަރ ރިޒާވް ސަރަހައްދެވެ.