ރާއްޖޭގެ ގައުމީ ޕޭމަންޓް ސިސްޓަމް ގާއިމް ކުރަން ފިންލޭންޑުގެ ކުންފުންޏަކާ ހަވާލު ކޮށްފި

ރާއްޖޭގެ ގައުމީ ޕޭމަންޓް ސިސްޓަމް ގާއިމް ކުރަން، ފިންލޭންޑުގެ ކުންފުންޏަކާ ހަވާލު ކޮށްފި އެވެ.

ގައުމީ ޕޭމަންޓް ސިސްޓަމް ގާއިމް ކުރަން ހަވާލު ކޮށްފައި ވަނީ މިފަދަ މަސައްކަތް ކުރާ ފިންލޭންޑުގެ ކުންފުންޏެއްކަމަށްވާ “ޓިއޭޓޯ އެވްރީ” ގެ ސަބްސިޑަރީއެއް ކަމުގައިވާ ޓިއޭޓޯ ލެޓްވިއާ އެސްއައިއޭ އާއެވެ. މިއީ މިފަދަ މަސައްކަތްތައް ކުރުމަށް ދުނިޔޭގައި މަޝްހޫރު ކުންފުންޏެކެވެ.

advertisement

އޮންލައިންކޮށް ބޭއްވި ބައްދަލުވުމުގައި ވާހަކަދައްކަވަމުން އެމްއެމްއޭގެ ގަވަރުނަރު އަލީ ހާޝިމް ވިދާޅުވީ މިއީ ރާއްޖޭގެ މާލީ ނިޒާމު، ދުނިޔޭގައި ކުރިއަރާފައިވާ ގައުމުތަކާއި އެއް ހަމައެއްގައި ގާއިމު ކުރުމުގެ ގޮތުން އަޅާ މުހިންމު ފިޔަވަޅެއް ކަމަށެވެ. ޓިއޭޓޯއެވްރީ އާއިއެކު ކުރާ މަސައްކަތްތަކުގެ އެހީގައި، ދިވެހިންނަށް ޕޭމަންޓް ދާއިރާގައި މިހާރު ދިމާވާ ތަފާތު އެކި ގޮންޖެހުން ތަކަށް އެދެވޭ ހައްލެއް އަވަސް މުސްތަގްބަލެއްގައި ލިބިގެންދާނެ ކަމަށް ގަބޫލުކުރައްވާ ކަމަށް ވެސް ގަވަރުނަރު ވިދާޅުވި އެވެ.

ޓިއޭޓޯ ލެޓްވިއާ އެސްއައިއޭގެ ހެޑް އޮފް ޕޭމަންޓް އިލްކާ ކޮރްކިއަކޮސްކީ ވިދާޅުވީ މި ފަދަ އިންފްރާސްޓްރަކްޗާއެއްގެ ސަބަބުން ވަގުތުން ވަގުތަށް މާލީ މުއާމަލާތްތައް ހިންގުމަށް މަގުފަހި ވެގެންދާނެ ކަމަށެވެ. އަދި ފައިނޭންޝަލް އިންކްލޫޝަން އިތުރު ކުރުމުގައި ވެސް ފަސޭހަ މަގުތަކެއް ހުޅުވިގެން ދާނެ ކަމަށް އޭނާ ވިދާޅުވި އެވެ.

އެމްއެމްއޭ އިން ބުނީ ރާއްޖެއަކީ ގުދުރަތީ ގޮތުން ވަކިވަކި ރަށްތަކަކަށް ބެހިފައިވާ ގައުމަކަށްވީ ނަމަވެސް، މި ސިސްޓަމް ގާއިމް ކުރުމާއެކު ރާއްޖޭގެ ކޮންމެ ރަށެއްގައި ހުރެ އަދި ކޮންމެ ބޭންކެއްގައި އެކައުންޓް ހުޅުވާފައިވީ ނަމަވެސް ފަސޭހަ ކަމާއިއެކު، ވަގުތުން ވަގުތަށް އެކަކު އަނެކަކަށް ފައިސާ ފޮނުވުމުގެ މަގު ފަހި ވެގެންދާނެ ކަމަށެވެ. އަދި ޒަމާނީ، އީޖާދީ މާލީ ހިދުމަތްދޭ ފަރާތް ތަކަށް މި ސިސްޓަމްގެ ސަބަބުން ރައްޔިތުންނާއި ހަމައަށް އެއް ޕްލެޓްފޯމެއް މެދުވެރިކޮށް އެ ފަދަ ހިދުމަތްތައް ފޯރުކޮށްދިނުމުގެ މަގު ފަހި ވެގެންދާނެ ކަމަށެވެ.

މި ސިސްޓަމް ޤާއިމު ކުރުމުގެ މަސައްކަތް ހަވާލުކުރި ފަރާތް ކަމުގައިވާ ޓިއޭޓޯއެވްރީ އަކީ ދުނިޔޭގެ އެކިކަންކޮޅުތަކުގައި މިފަދަ ސިސްޓަމްތަކުގެ ޚިދުމަތް ފުޅާދާއިރާއެއްގައި މިހާރުވެސް ދެމުން އަންނަ ތަޖުރިބާކާރު ކުންފުންޏެކެވެ. އެގޮތުން ސްވިޑަންގައި “ސްވިޝް”ގެ ނަމުގައި މޮބައިލް ޕޭމަންޓް ސޮލިއުޝަނެއް ޤާއިމުކުރުމާއިއެކު، ފިންލެންޑުގައި ފުރަތަމަ ޤާއިމުކުރެވުނު ރިއަލް ޓައިމް މޮބައިލް ޕޭމަންޓް ޕްލެޓްފޯމްވެސް ފޯރުކޮށްދީފައިވަނީ ޓިއޭޓޯއެވްރީއިންނެވެ. މީގެ އިތުރުން، ޓިއޭޓޯއެވްރީއިން ވަނީ ކެންޔާގައިވެސް ޕެސާލިންކްގެ ނަމުގައި ރިއަލްޓައިމް މަނީ ޓްރާންސްފަރ ސޮލިއުޝަނެއް ޤާއިމުކޮށްދީފައެވެ.