ރާއްޖެ މިއަދު މިއޮތީ ކޮންމެ ރައްޔިތެއްގެ ފަރުދީ ބައިވެރިވުމަށް ނުހަނު ބޮޑަށް ބޭނުންވެފައި: ރައީސް

ދީނީ ވާޖިބުތަކަށް ފަރުވާތެރިވާ ފަދައިން، ދުނިޔަވީ ދިރިއުޅުން ބާއްޖަވެރިކުރުމަށްޓަކައި ގަދައަޅައި މަސައްކަތްކުރުމަކީ، ނަބަވީ ސީރަތުން ލިބިދޭ އެންމެ މުހިންމު ފިލާވަޅެއް ކަމަށާއި އަޅުގަނޑުމެންގެ ރާއްޖެ  ވެސް މިއަދު މިއޮތީ، މި އަށް ވުރެ ރަނގަޅު ޙާލަތަކަށް ގެންދިޔުމަށްޓަކައި، ކޮންމެ ރައްޔިތެއްގެ ފަރުދީ ބައިވެރިވުމަށް ނުހަނު ބޮޑަށް ބޭނުންވެފައި ކަމަށް ރައީސުލް ޖުމްހޫރިއްޔާ އިބްރާހީމް މުހައްމަދު ސޯލިހް މިއަދު ވިދާޅުވެއްޖެއެވެ.

ކީރިތި ރަސޫލާ مُحَمَّدُ رَسُوْلُ اللهِ صَلَّى اللهُ عَلَيْهِ وَسَلَّمَގެ ޢީދު މީލާދުގެ މުނާސަބާގައި، ދިވެހިރައްޔިތުންނަށް ތަހުނިޔާއާ ހެޔޮއެދުންތައް އަރިސްކުރައްވައި ފޮނުއްވި ތަހުނިޔާގެ މެސެޖްގައި ރައީސް ސޯލިހް ވިދާޅުވީ އިޤްތިޞާދީ ގޮތުންނާއި އިޖުތިމާޢީ ގޮތުން، ޤައުމުގެ ޙާލަތު ރަނގަޅުކުރެވޭނީ، އިސްލާމީ ދައުލަތް ފެށިގެން އައިއިރު، އެ ދައުލަތް ބިނާކުރުމަށްޓަކައި މުސްލިމުން ދެއްކި ފަދަ، ހިތްވަރުގަދަކަމާއި މަސައްކަތްތެރިކަމުގެ ނަމޫނާއެއް އަޅުގަނޑުމެންގެ ފަރާތުން ވެސް ފެނިގެން ކަމަށެވެ. އަދި މިއަދަކީ، މުޅި އިންސާނިއްޔަތާ ބައްދަލުކުރި، އެންމެ އުފާވެރި އަދި އެންމެ ހެޔޮ މުނާސަބަތުގެ މަތިވެރި ހަނދާންތައް އައުކުރާ ދުވަސްކަން ވެސް އެމަނިކުފާނު ފާހަގަކުރެއްވިއެވެ.

advertisement

ރައީސް ވިދާޅުވީ މި މަތިވެރި މުނާސަބާ ހަނދާނަށް ގެނެސްދެނީ، އިތުރު އެކަލޭގެފާނު މެދުވެރިކުރައްވައި، اللهُ سُبْحَانَهُ وَتَعَالَى މުޅި އިންސާނިއްޔަތަށް ދެއްވެވި އެންމެ މަތިވެރި ނިޢުމަތް ކަމަށްވާ، އިސްލާމް ދީނުގެ ހިދާޔަތުން އިންސާނިއްޔަތަށް ދިރުން ލިބިގެންދިޔަ ގޮތް ކަމަށާއި ރާއްޖެ ވެސް، މުޅިން އައު ޞަފްޙާއަކުން ދިވެހި ޤައުމީ ޝަޚްޞިއްޔަތުގެ ތާރީޚު ލިޔަން ފެށީ، ދިވެހިން އެއްކައުވަންތަކަމުގެ ޢަޤީދާ ޤަބޫލުކޮށް، އިސްލާމް ދީނުގެ ހިދާޔަތު ލިބިގަތުމާއެކު ކަމަށެވެ.

ދެދުނިޔެއަށް ކައުކުރެއްވި އެންމެ މަތިވެރި ސާހިބާގެ ސީރަތުން، އަޅުގަނޑުމެންނަށް ފެންނަ އެންމެ މަތިވެރި ނަމޫނާއަކީ، މީސްތަކުންގެ މެދުގައި އޮންނަންވީ އެއްބަނޑުއެއްބަފާކަމުގެ ގުޅުމާއި، ޢަދުލު އިންޞާފަށް ލޯބިކުރުމާއި، އަނެކުންގެ ޙައްޤުތަކަށް ޙުރުމަތްތެރިކޮށް ހިތުމުގެ މާތް ސިފަ ކަމަށް ވެސް ރައީސް ސޯލިހްގެ މެސެޖްގައި ފާހަގަކުރައްވާފައި ވެއެވެ.

ހަމައެފަދައިން، އެކަކު އަނެކަކަށް އެހީތެރިވެ އުޅުމާއި، ދަތި އުނދަގޫ ޙާލަތްތަކުގައި ދީލަތިކަމާއި އޯގާތެރިކަން އިސްކުރުމުގެ ރިވެތި ސިފަތަކެއް ކަމަށާއި ވަކިން ޚާއްޞަ ގޮތެއްގައި، ޢާއިލީ ގުޅުންތައް ބަދަހިކުރުމާއި، އަނެކުންނަށް މަޢާފްކުރުމާއި ހިތްހެޔޮކަމާއެކު މުޢާމަލާތުކުރުމުގެ އަޚްލާޤީ ނަމޫނާތަކެއް ކަމަށް ވެސް އެ މަނިކުފާނުގެ މެސެޖްގައި ފާހަގަކުރައްވާފައި ވެއެވެ.

“މިއީ، އަޅުގަނޑުމެންގެ މެދުގައި އިޖުތިމާޢީ ޢަދާލަތު ޤާއިމުކޮށް، ހަމަޖެހުމާއި ޞުލްޙަ މަސަލަސްކަންމަތީ ދެމިތިބުމަށްޓަކައި، އަޅުގަނޑުމެން ކޮންމެ މީހެއްގެ ކިބައިގައި ހަރުލައްވަންޖެހޭ މުހިންމު ސިފަތަކެކެވެ. މިފަދަ މަތިވެރި ޒިކުރާއެއް އައުކުރާއިރު، އަޅުގަނޑުމެން ގަދައަޅައި މަސައްކަތް ކުރަންވީ، އިތުރު އެކަލޭގެފާނުގެ ވަސްމީރު ޒިކުރާއިން ލިބިދޭ މިފަދަ ފިލާވަޅުތަކުން، އަޅުގަނޑުމެންގެ ދުނިޔަވީ ޙަޔާތުގެ އާބާތުރަ ފިލުވައި، އެކަލޭގެފާނުގެ މަތިވެރި ރިސާލަތަށް ފުރިހަމައަށް ތަބަޢަވާ ބަޔަކަށް ވުމަށެވެ. އެކަލޭގެފާނު ދެއްކެވި މަތިވެރި ނަމޫނާތަކުން، އަޅުގަނޑުމެންގެ ދެދުނިޔޭގެ ބާއްޖަވެރިކަން ޙާޞިލުކުރުމަށްޓަކައެވެ.” ރައީސްގެ މެސެޖްގައި ވިދާޅުވެފައި ވެއެވެ.

ރައީސުލްޖުމްހޫރިއްޔާ މި މެސެޖުގައި އެމަނިކުފާނު ވަނީ، އިސްލާމީ ޤައުމުތަކުގެ ވެރިންނާ، ދުނިޔޭގެ އެކި ކަންކޮޅުތަކުގައި ދިރިއުޅޭ މުސްލިމު އަޚުންނާއި އުޚުތުންނަށް މި އުފާވެރި މުނާސަބަތުގެ ތަހުނިޔާއާ މުބާރަކްބާދީ އަރިސްކުރައްވާފައެވެ.