މުވައްޒަފަކަށް ޖިންސީ ފުރައްސާރަކުރި ކަމުގެ ތުހުމަތު ކުރެވުނު ސައުދުﷲ އަނެއްކާ ވެސް ގޭމްގެ އެސްޖީއަކަށް

ގެސްޓް ހައުސް އެސޯސިއޭޝަން އޮފް މޯލްޑިވްސް (ގޭމް)ގެ މުވައްޒަފަކަށް ޖިންސީ ފުރައްސާރައިގެ ތުހުމަތުކުރެވި ސަސްޕެންޑްކުރި ސައުދުﷲ އަހްމަދު ދީދީ އަނެއްކާ ވެސް އެ އެސޯސިއޭޝަންގެ ސެކްރެޓަރީ ޖެނެރަލްގެ މަގާމަށް އިންތިހާބުކޮށްފިއެވެ.

ގޭމްގެ ބޯޑުން ހުސްވެފައިވާ މަގާމުތަކަށް މެންބަރުން އިންތިހާބުކުރުމަށް މިރޭ ބޭއްވި ބައި އިލެކްޝަންގައި އެސްޖީގެ މަގާމަށް ދެ ފަރާތަކުން ވާދަކުރިއެވެ. ނަމަވެސް އިންތިހާބުވީ ސައުދުﷲއެވެ.

advertisement

ގެސްޓްހައުސް ސިނާއަތުގެ ކުރިއެރުމަށް މަސައްކަތްކުރާ ޖަމިއްޔާގެ ބައި އިލެކްޝަންގައި އެސްޖީއެއްގެ އިތުރުން ރައީސް އާއި ނާއިބު ރައީސް އަދިި ކޯޕަރޭޓް އެފެއާޒް އާއި އެކްސްކޯގެ މެންބަރުން އިންތިހާބުކޮށްފައި ވެއެވެ. ރައީސް ކަމަށް ކުރިމަތިލެއްވީ އެ ޖަމިއްޔާގެ ފައުންޑަރެއް ކަމަށްވާ އަބްދުﷲ ނަޝީދު އެކަންޏެވެ.

ގޭމްގެ ރައީސްގެ މަގާމު ހުސްވީ އެ އެސޯސިއޭޝަންގެ އަންހެން މުވައްޒަފަކަށް ސައުދުﷲ ޖިންސީ ފުރައްސާރަކުރި ކަމުގެ ޝަކުވާތަކެއް ފެންމަތިވެ އެ މައްސަލަ ބަލަން ފެށުމުން ހިންގާ ކޮމިޓީގެ ތެރެއިން ހުރަސްތަކެއް ކުރިމަތިވެ ޖުލައި މަހުގެ ތެރޭގައި އޭރު ގޭމްގެ ރައީސްގެ މަގާމުގައި ހުންނެވި މޫސާ ނާސިހް އިސްތިއުފާ ދެއްވުމުންނެވެ.

ސައުދުﷲގެ މައްސަލަ ފުލުހަށް ހުށަހެޅުމުން އެ މައްސަލަ ތަހްގީގު ވެސް ކުރިއެވެ. ނަމަވެސް މިހާރު ގޮސްފައިވާ ހިސާބެއް އެނގޭ ގޮތް ވަނީ ނުވެފައެވެ.