އަހަރުގެ 3 ވަނަ ކުއާޓަރުގައި ދިރާގަށް އާމްދަނީގެ ގޮތުގައި 586 މިލިއަން ރުފިޔާ ލިބިއްޖެ

މިއަހަރުގެ 3 ވަނަ ކުއާޓަރުގައި ދިރާގަށް އާމްދަނީގެ ގޮތުގައި 586 މިލިއަން ރުފިޔާ ލިބިއްޖެއެވެ. މިއީ މިއަހަރުގެ 2 ވަނަ ކުއަރޓަރުގައި ދިރާގަށް ލިބުނު އާމްދަނީއާއި އަޅާބަލާއިރު 7 އިންސައްތައިގެ އިތުރުވުމެކެވެ.

ދިރާގަށް ތިންވަނަ ކުއާޓަރުގައި ލިބުނު އާމްދަނީ އިތުރުވެފައިވާއިރު، މި މުއްދަތުގައި ކުންފުންޏަށް ލިބުނު ސާފު ފައިދާވެސް ވަނީ 22 އިންސައްތަ އިތުރުވެފައެވެ. ތިންވަނަ ކުއާޓަރުގައި ސާފު ފައިދާގެ ގޮތުގައި ދިރާގަށް ލިބިފައިވަނީ 158 މިލިއަން ރުފިޔާއެވެ.

advertisement

މިއަހަރުގެ ތިން ވަނަ ކުއާޓަރުގައި ދިރާގަށް ލިބުނު އާމްދަނީ އިތުރުވީ އިޤްތިސާދީ ހަރަކާތްތައް ތިންވަނަ ކުއާޓަރުގައި އިތުރުވުމުންކަމަށް ދިރާގުން ބުނެއެވެ. ދިރާގުން އާމްދަނީ ހޯދަނީ މައިގަނޑު 2 ދާއިރާއަކުންނެވެ. އެއީ މޯބައިލް ހިދުމަތްތަކާއި ފިކްސްޑް ލައިން އާއި ބްރޯޑް ބޭންޑް އިންޓަނެޓާއި އެންޓަޕްރައިޒް ވިޔަފާރިތައް މެދުވެރިކޮށެވެ. މީގެތެރެއިން ބޮޑު ބައެއް ހިއްސާ ކުރަނީ މޯބައިލް ޙިދުމަތްތަކުން ލިބޭ އާމްދަނީއެވެ. އަހަރުގެ ތިންވަނަ ކުއާޓަރުގައި މޮބައިލްގެ ހިދުމަތްތަކުގެ އާމްދަނީގެ ގޮތުގައި 329 މިލިއަން ރުފިޔާ ދިރާގަށް ލިބިފައިވެއެވެ. މިއަހަރުގެ ދެވަނަ ކުއަޓަރުގައި މޮބައިލް ހިދުމަތްތަކުގެ އާމްދަނީގެ ގޮތުގައި ދިރާގަށް ލިބިފައިވަނީ 318 މިލިއަން ރުފިޔާއެވެ.

ތިންވަނަ ކުއާޓަރުގައި ފިކްސްޑް ލައިން، ބްރޯޑް ބޭންޑް އިންޓަނެޓާއި އެންޓަޕްރައިޒް ވިޔަފާރިން ލިބުނު އާމްދަނީއަށްވެސް ވަނީ އިތުރުވެފައެވެ. އެގޮތުން ތިންވަނަ ކުއާޓަރުގައި ދިރާގަށް ފިކްސްޑް ލައިން، ބްރޯޑް ބޭންޑް އިންޓަނެޓާއި އެންޓަޕްރައިޒް ވިޔަފާރިތައް މެދުވެރިކޮށް 242 މިލިއަން ރުފިޔާ ލިބިފައިވެއެވެ. މިއަހަރުގެ ދެވަނަ ކުއާޓަރުގައި މިދާއިރާއިން ދިރާގަށް ލިބިފައިވަނީ 213 މިލިއަން ރުފިޔާގެ އާމްދަނީއެކެވެ.