ރާއްޖޭގެ ހުރިހާ ރަށެއްގައި ފެނާއި ނަރުދަމާ ގާއިމުކުރުމުގެ ޕްލޭން އިފްތިތާހުކޮށްފި

ރާއްޖޭގެ ހުރިހާ ރަށެއްގައި ފެނާއި ނަރުދަމާގެ ނިޒާމު ގާއިމުކުރުމުގެ ގައުމީ ޕްލޭން އިފްތިތާހުކޮށްފިއެވެ.

އެންވަރަޔަންމަންޓް މިނިސްޓްރީގައި މިއަދު ބޭއްވި ރަސްމިއްޔާތެއްގައި ގައުމީ ސްޓްރެޓެޖިކް ޕްލޭން އިފްތިތާހުކޮށްދެއްވީ އެންވަޔަރަންމަންޓް މިނިސްޓަރު ޑރ. ހުސައިން ރަޝީދެވެ.

އެންވަޔަރަންމަންޓް މިނިސްޓްރީން ބުނީ މި ޕްލޭންގައި މައިގަނޑު ހަ ސިޔާސަތެއް ހިމެނޭ ކަމަށާއި އެ ސިޔާސަތުތައް ބިނާވެފައި ވަނީ ރާއްޖޭގެ ހުރިހާ ރައްޔިތުންނަށް ރައްކާތެރި ފެނާއި ނަރުދަމާގެ ހިދުމަތް ކަށަވަރުކޮށްދިނުމާއި ތިމާވެއްޓާ ރައްޓެހި، ހަރަދު ކުޑަ ނިޒާމެއް ތަރައްގީކުރުމަށް ކަމަށެވެ. މީގެ އިތުރުން މީހުން މި ދާއިރާ އިން މީހުން ބިނާކުރުމަށާއި މީހުން ހޭލުންތެރިކުރުވުމަށާއި ވަސީލަތްތައް ރައްކާތެރިކޮށް ހިމާޔަތްކުރުމުގެ އިތުރުން ފެންބޮޑުވުން ފަދަ ކާރިސާތަކަށް ވިލުންވެރި މުޖުތަމައުއެއް ބިނާކުރުމުގެ މައްޗަށް ކަމަށް ވެސް އެ މިނިސްޓްރީން ބުންޏެވެ.

ދާދި ފަހުން މަޖިލީހުން ފާސްކުރި “ފެނާއި ނަރުދަމާގެ ގާނޫނު” ބުނާ ގޮތުން ކުރިއަށް އޮތް ފަސް އަހަރުގެ ތެރޭގައި ރާއްޖޭގެ ހުރިހާ ރަށެއްގައި ފެނާއި ނަރުދަމާ ގާއިމުކޮށް ނިންމަންޖެހެއެވެ. އަދި ތިން މަސް ދުވަހުގެ ތެރޭގައި ސްޓްރެޓެޖިކް ޕްލޭނެއް ތައްޔާރުކުރަންޖެހެއެވެ.

މިނިސްޓްރީން ބުނީ މިއީ ފެނާއި ނަރުދަމާގެ ދާއިރާގެ ލަނޑުދަނޑިތައް ހާސިލްކޮށް ދެމެހެއްޓެނިވި ގޮތެއްގައި ދާއިރާ ތަރައްގީކޮށް ކުރިއެރުވުމަށް މަސައްކަތްކުރާ ފަރާތްތަކަށް ބޭނުން ހިފޭނެ ސްޓްރެޓެޖިކް ޕްލޭނެއް ކަމަށެވެ.

މިނިސްޓަރު ވިދާޅުވީ މީހުން ދިރިއުޅޭ 42 ރަށެއްގައި މިހާރު ފެނުގެ ނިޒާމު ގާއިމުކޮށްފައިވާ އިރު 69 ރަށެއްގައި ނަރުދަމާގެ ނިޒާމު ގާއިމުކޮށްފައިވާ ކަމަށެވެ. މިހާރު ވެސް 53 ރަށެއްގައި ނަރުދަމާގެ ނިޒާމު ގާއިމުކުރުމުގެ މަސައްކަތް ކުރިއަށްދާކަން މިނިސްޓަރު ފާހަގަކުރެއްވިއެވެ.

މިނިސްޓަރު ވިދާޅުވީ ސަރުކާރުގެ އަމާޒަކީ 2023 ވަނަ އަހަރު ނިމުމުގެ ކުރިން ހުރިހާ ރަށެއްގައި ފެނާއި ނަރުދަމާގެ ނިޒާމު ގާއިމުކުރުން ކަމަށާއި ފަންޑް ލިބޭ ނަމަ އެ ކަން ކުރެވޭނެ ކަމުގެ ޔަގީންކަން އެބަ އޮތް ކަމަށެވެ.