މިންގަނޑުތަކާ ހިލާފުވާ ނަމަ ހުއްދަ ބާތިލްކުރަންޖެހިދާނެ ކަމުގެ އިންޒާރު ދީފި

ފަތުރުވެރިންނަަށް ހިދުމަތް ދިނުމަށް ހުއްދަ ދީފައިވާ ތަންތަނުން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ކަނޑައަޅާފައިވާ ގައިޑްލައިންތަކާ ހިލާފުވާ ނަމަ ފިޔަވަޅު އަޅާނެ ކަމަށް ޓުއަރިޒަމް މިނިސްޓްރީން ބުނެފިއެވެ.

ފަތުރުވެރިންނަށް ހިދުމަތް ދޭ ތަންތަނަށް ޓުއަރިޒަމް މިނިސްޓްރީން ފޮނުވި ސާކިއުލާގައި ބުނެފައި ވަނީ ހުއްދަ ދީފައިވާ ބައެއް ތަންތަނުން އެޗްޕީއޭގެ ގައިޑްލައިންތަކާ ހިލާފުވާ ކަން ފާހަގަކުރެވިފައިވާ ކަމަށެވެ. ނަމަވެސް ހުއްދަ ދީފައި ވަނީ އެޗްޕީއޭގެ ގައިޑްލައިންތަކަށް ފުރިހަމަ އަށް އަމަލުކުރާ ގޮތަށް ކަމަށާއި އެ ކަންކަމާ ހިލާފުވާ ނަމަ ހުއްދަ ބާތިލްކުރަންޖެހިދާނެ ކަމަށް ވެސް އެ ސާކިއުލާގައި ވެއެވެ. ގިނަ ތަންތަނުން ގައިޑްލައިންތަކަށް ފުރިހަމަ އަށް ބޯލަނބާ ކަން ވެސް މިނިސްޓްރީން ވަނީ ފާހަގަކޮށްފައެވެ.

advertisement

ރިސޯޓްތަކާއި ގެސްޓް ހައުސްތަކަށް ހުއްދަ ދީފައި ވަނީ ވަކި ޝަރުތުތަކެއް ފުރިހަމަކުރާ ގޮތަށެވެ. އެ ގޮތުން މީހުން ދިރިއުޅޭ ރަށްރަށުގައި ގެސްޓް ހައުސްތަކަށް ހުއްދަ ދީފައި ވަނީ އެ ރަށެއްގައި ހުރިހާ އެންމެން މާސްކް އަޅަން މަޖުބޫރުވާ ގޮތަށެވެ. އަދި ފްލޫ ކްލިނިކާއި އައިސޮލޭޝަނަށް ހާއްސަ އެނދު ގާއިމުކޮށްފައި ހުންނަންޖެހެއެވެ.

މާލެ ސަރަހައްދު ފިޔަވައި އެހެން ސަރަހައްދުތަކުގެ ގެސްޓްހައުސްތަކަށް މިދިޔަ މަހުގެ ތެރޭގައި ވަނީ ހުއްދަ ދޭން ފަށާފައެވެ. ޓުއަރިޒަމް މިނިސްޓްރީން ބުނެފައި ވަނީ މި މަހުގެ ތެރޭގައި މާލެ ސަރަހައްދުގެ ގެސްޓްހައުސްތަކަށް ހުއްދަ ދެވޭ ވަރު ވާނެ ކަމަށެވެ.