ހުޅުމާލޭގެ ދެ ވަނަ ފިޔަވަހީގައި ބަސް ސްޓޮޕްތައް ހަދައިދޭނެ ފަރާތެއް ހޯދަން އިއުލާނުކޮށްފި

ހުޅުމާލޭގެ ދެ ވަނަ ފިޔަވަހީގައި ބަސް ސްޓޮޕްތައް ހަދައިދޭނެ ބަޔަކު ހޯދަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އިއުލާނުކޮށްފިއެވެ.

އެޗްޑީސީން ކުރި އިއުލާނެއްގައި ބުނެފައި ވަނީ މިހާރު ތަރައްގީކުރަމުން އަންނަ ހުޅުމާލޭ ދެ ވަނަ ފިޔަވަހީގައި ބަސް ސްޓޮޕްތައް ހެދުމުގެ މަސައްކަތަށް ޝައުގުވެރިވާ ފަރާތްތަކަށް އެ ފުރުސަތު ހުޅުވާލާފައިވާ ކަމަށާއި އަންނަ ހޯމަ ދުވަހު މައުލޫމާތު ދިނުމުގެ ބައްދަލުވުން ބޭއްވުމަށް ނިންމާފައިވާ ކަމަށެވެ. މި ބައްދަލުވުން ބޭއްވުމަށް ހަމަޖައްސާފައި ވަނީ ޒޫމް މެދުވެރިކޮށެވެ.

advertisement

މި މަސައްކަތުގެ ބިޑް ސެކިއުރިޓީއެއްގެ ގޮތުގައި ކަނޑައަޅާފައި ވަނީ 50000ރ. އެވެ. ބިޑް ހުށަހެޅުމަށް ދީފައިވާ އެންމެ ފަހު ތާރީހަކީ މި މަހުގެ 25 ވަނަ ދުވަހެވެ.

ހުޅުމާލެ ދެ ވަނަ ފިޔަވަހީގައި ބަހުގެ ހިދުމަތް ދިނުމާ ބެހޭ ގޮތުން އެޗްޑީސީން މީގެ ކުރިން ވަނީ ކަމާ ބެހޭ ފަރާތްތަކާ މަޝްވަރާ ބައްދަލުވުމެއް ބާއްވާފައެވެ. ހުޅުމާލެ ދެ ވަނަ ފިޔަވަހީގެ އިރުމަތީ ފަރާތު ގޮނޑޮދޮށާ ކައިރީގައި އަމިއްލަ ފަރާތްތަކަށް ދޫކޮށްފައިވާ ބިންތަކުގައި އިމާރާތްކޮށް ބައެއް ތަންތަނުގައި މިހާރު ވަނީ މީހުން ވަޒަންވެރިވެފައެވެ. އެ ސަރަހައްދު އާންމުންނަށް ހުޅުވާލާފައިވާ އިރު ދެ ވަނަ ފިޔަވައްސަށް އަރާ ފޭބުމަށް ހަދާފައިވާ ހަތަރު ބްރިޖްގެ ތެރެއިން އެއް ބްރިޖް ވެސް ވަނީ އާންމުންނަށް ހުޅުވާލާފައެވެ.

އިތުރު ސަރަހައްދުތައް ހުޅުވާލުމުގެ ކުރިން ބަހުގެ ހިދުމަތާއި އާންމުންނަށް ކޮންމެހެން ބޭނުންވާނެ ހިދުމަތްތަކާއި ވަސީލަތްތައް ގާއިމުކުރުމަށް އެޗްޑީސީން އަންނަނީ މަސައްކަތްތަކެއް ކުރަމުންނެވެ. އެ ގޮތުން މިސްކިތާއި ވިޔާފާރިތަކާއި ސްކޫލްތައް ފަދަ މުހިންމު ތަންތަން ގާއިމުކުރުމަށް އަންނަނީ މަސައްކަތްތަކެއް ކުރަމުންނެވެ. ހުޅުމާލޭގައި ހިޔާ މަޝްރޫއުގެ ދަށުން ތަރައްގީކުރާ ފްލެޓްތައް އަންނަ އަހަރުގެ މާޗް މަހުގެ ތެރޭގައި ހަވާލުކޮށް ނިންމުމަށް އެޗްޑީސީން އަމާޒު ހިފާފައިވާ އިރު ދައުލަތް ހިއްސާވާ ކުންފުނިތަކާއި އެޗްޑީސީން ތަރައްގީކުރާ ފްލެޓްތަކުގެ މަސައްކަތް ވެސް ހަލުވިކަމާ އެކު އަންނަނީ ކުރަމުންނެވެ. މީގެ ތެރެއިން ބައެއް ފްލެޓްތައް އަންނަ އަހަރުގެ ކުރީކޮޅު ނިމޭނެ ކަމަށް އަންދާޒާކޮށްފައި ވެއެވެ.