އިންޑިއާގައި ރާއްޖެ އިޝްތިހާރުކުރުމަށް ކެންޕެއިނެއް ފަށައިފި

އިންޑިއާގައި ރާއްޖެ އިޝްތިހާރު ކުރުމުގެ ގޮތުން ވީޑިއޯ ސްޓްރިމިން ޕްލެޓް ފޯމް “ވޫޓު”އާއެކު އެމްއެމްޕީއާރުސީން ކެމްޕެއިނެއް ފަށައިފިއެވެ. އެމްއެމްޕީއާރުސީން ބުނީ މި ކެމްޕެއިން ކުރިޔަށް ދާނީ ޑިސެމްބަރުމަހުގެ 3 ގެ ނިޔަލަށްކަމަށެވެ.
އެމްއެމްޕީއާރުސީން ބުނީ މި ކެންޕެއިންގެ މަގްސަދަކީ، އިންޑިޔާގައި ކުރިއަރަމުން އަންނަ ވީޑިއޯ ސްޓްރީމިން ޕްލެޓްފޯމްގައި ރާއްޖެ އިތުރަށް އިޝްތިހާރުކުރުންކަމަށެވެ. އަދި މި ޕްލެޓްފޯމް މެދުވެރިކޮށް އިންޑިއާގެ އެކި ފަރާތްތަކަށް ރާއްޖޭގެ ފަތުރުވެރިކަން އިޝްތިހާރުކޮށް މިވަގުތު ފަތުރުވެރިން ޗުއްޓީ ހޭދަކުރުމަށް އެންމެ އެކަށީގެންވާ އަދި އެންމެ ރައްކާތެރި، މަންޒިލަކީ ރާއްޖޭގެ ގޮތުގައި ދައްކައި ދިނުންކަމަށެވެ.
މިއީ ކޯވިޑް19 އަށްފަހު އެމްއެމްޕީއާރުސީން ފެށި “ރީޑިސް ކަވާ މޯލްޑިވްސް، ދަ ސަނީ ސައިޑް އޮފް ލައިފް” ތީމްގެ ދަށުން ކުރިއަށްގެންދާ ކެމްޕެއިންއެކެވެ. މި ކެމްޕެއިންގައި ވޫޓް ޕްލެޓްފޯމްގައި ރާއްޖޭގެ އިޝްތިހާރުތައް ޖަހައި ދިއްލީ، މުމްބާއި، ހައިދްރައާބާދު، ޗެންނާއި، ކޮޗިން އަދި އަހްމަދު އާބާދް ފަދަ ސިޓީތަކުގެ އޯޑިއެންސަށް ރާއްޖެ އިޝްތިހާރު ކުރާނެއެވެ.

ވޫޓް ޕްލެޓްފޯމަކީ އިންޑިޔާގައި ކުރިއަރަމުން އަންނަ އަދި މަޝްހޫރު އޯވާ ދަ ޓޮޕް (އޯ.ޓީ.ޓީ) ވީޑިއޯ އޮން ޑިމާންޑް ސްޓްރީމިން ޕްލެޓް ފޯމެކެވެ. މި ޕްލެޓްފޯމުގައި މަހަކު 15 މިލިއަން ސަބްސްކްރައިބާސް ހިމެނޭއިރު ވޫޓަކީ އިންޑިޔާގެ އެހެނިހެން އޯ.ޓީ.ޓީ ޕްލެޓް ފޯމްތަކާއި އަޅާބަލާއިރު އެންމެ މަޤުބޫލު އެއް ޕްލެޓްފޯމެވެ.

އެމްއެމްޕީއާރުސީން ދަނީ އިންޑިއާއަށް ޚާއްސަކޮށްގެން ބޮޑެތި މާކެޓިން ހަރަކާތް ތަކެއް ކުރިއަށް ގެންދަމުންނެވެ. މީގެ ތެރޭގައި އިންޑިއާގެ ވެޑިން އަދި ހަނީމޫން ސެގްމެންޓަށް ޚާއްސަ ކުރެވިގެން ކުރިޔަށްދާ ކެންޕެއިނާއި އިންޑިއާގެ ބޮޑެތި ސިޓީތަކަށް ޙާއްސަ ކޮށްގެން ކުރިއަށް ގެންދިޔަ ރޭޑިޔޯ ކެމްޕެއިނާއި އަދި ފެމެލިޔަރައިޒޭޝަން ޓްރިޕްތައް ހިމެނެއެވެ.

advertisement