ތުލުސްދޫ ފަތުރުވެރިންނަށް ހުޅުވާލައިފި

ކ. ތުލުސްދޫގެ ގެސްޓްހައުސްތައް ހުޅުވަލައި ފަތުރުވެރިނަށް މަރުހަބާ ކިޔައިފިއެވެ. ކޯވިޑް19 އަށްފަހު ތުލުސްދޫގެ ގެސްޓްހައުސް ސިނާއަތް އަލުން ފަތުރުވެރިންނަށް ހުޅުވާލާފައިވަނީ އިއްޔެއެވެ. އިއްޔެ އެރަށުގައި ބޭއްވި ހާއްސަ ރަސްމިއްޔާތުގައި އެރަށައް ޒިޔާރަތްކުރި ފުރަތަމަ ފަތުރުވެރިންގެ ގުރޫފަށް މަރުހަބާކިޔުމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމްވެސް ވަނީ ބައިވެރިވެވަޑައިގެންފައެވެ.

ގެސްޓްހައުސް ހުޅުވަން ހުއްދަ ދެނީ ރަށުފެންވަރުގައި ފުރިހަމަކުރަންޖެހޭ ކަންތައްތަކާއެކު ގެސްޓްހައުސްތަކުންވެސް ސަލާމަތާއި ރައްކާތެރިކަމުގެ ގޮތުން ފުރިހަމަ ކުރަންޖެހޭ ކަންތައް ފުރިހަމަ ކުރުމުންނެވެ.

advertisement

ތުލުސްދޫގެ 8 ގެސްޓްހައުސްއަކަށް މިހާތަނަށް ޓޫރިޒަމް މިނިސްޓްރީން ވަނީ އަލުން ހުޅުވައި ފަތުރުވެރިންނަށް ޙިދުމަތްދިނުމުގެ ހުއްދަ ދީފައެވެ.

ގެސްޓްހައުސްތައް ހުޅުވާ ރަށްރަށުގައި ފަތުރުވެރިންނާއި އާންމުން ހިމެނޭ ގޮތުން، އެންމެން މާސްކް އެޅުން ވަނީ މަޖުބޫރުކޮށްފަ އެވެ.

ގެސްޓްހައުސް ހުޅުވުމުގެ ހުއްދަ ދެނީ ރަށުފެންވަރުގައި ފުރިހަމަކުރަންޖެހޭ ކަންތައް ފުރިހަމަކޮށް، އެރަށެއްގައި ގެސްޓްހައުސް ހިންގުމުގެ ހުއްދަ ދިނުނަށް ރަށު ކައުންސިލްގެ އިއުތިރާޒު ނެތްނަމަ އެވެ. ކޮންމެ ރަށެއްގައި ވެސް ހާއްސަ ފްލޫކްލިނިކަކާއި އައިސޮލޭޝަނަށް ހާއްސަ އެނދު ބަހައްޓަން ޖެހެ އެވެ.

ތުލުސްދޫ ހިމެނޭހެން މިހާތަނަށް ރާއްޖޭގެ 16 ރަށަކަށް ވަނީ ގެސްޓްހައުސް ހިނަގުމުގެ ހުއްދަ އަލުން ދޫކޮށްފައެވެ. ޓޫރިޒަމް މިނިސްޓްރީގެ ތަފާސް ހިސާބުތަކަށް ބަލާއިރު މިވަގުތު 69 ގެސްޓްހައުސް އަކަށް ވަނީ އޮޕަރޭޓު ކުރުމުގެ ހުއްދަ ދީފައެވެ.