އައުޓްޑޯ ކުޅިވަރުތައް ކުޅުމުގެ ހުއްދަ އެޗްޕީއޭއިން ދީފި

ކޮންޓެކްޓް ސްޕޯޓްސް އާއި އައުޓްޑޯ ކުޅިވަރުތައް ކުޅުމުގެ ހުއްދަ ހެލްތް ޕްރޮޓެކްޝަން އެޖެންސީ، އެޗްޕީއޭ އިން ދީފި އެވެ.

ޑިރެކްޓަރު ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރު ސޮއިކުރައްވާ ނެރުއްވާފައިވާ އެންގުމުގައި ބުނެފައިވަނީ މިއަދުން ފެށިގެން ކޮންޓެކްޓް ސްޕޯޓްސް އާއި އައުޓްޑޯ ކުޅިވަރިތަކަށް ހުއްދަ ދީފައިވާ ކަމަށެވެ. އަދި 15 މީހުންނަށް ވުރެ ގިނަ ނުވާ ގޮތަށް ކުޅިވަރު ބަލަންދެވޭނެ ކަމަށްވެސް ވަނީ ބުނެފައެވެ. ބަލީގެ އެއްވެސް އަލާމާތެއް ހުރި ނަމަ ކުޅެން ނުދިއުމާއި، ކުޅިވަރު ބަލަންދާއިރު މާސްކް އަޅާ އެހެން ގްރޫޕް ތަކާއި ދެމެދު ތިން ފޫޓުގެ ދުރުމިން ބެހެއްޓުމަށް ވަނީ އިލްތިމާސްކޮށްފައެވެ.

advertisement

ކޯވިޑް19 އިން ރައްކާތެރިވުމަށް އެޗްޕީއޭއިން އަޅާފައިވާ ފިޔަވަޅުތަކަށް ލުއިދޭން ފަށާފައިމިވަނީ މާލެ ސަރަހައްދުގައި ކޯވިޑް19 ގެ ކޭސްތައް ފެންނަ މިންވަރު ހިފެހެއްޓިފައިވާ ދަނޑިވަޅެއްގައެވެ. އެގޮތުން ފާއިތުވެދިޔަ 24 ގަޑިއިރުގެ ތެރޭގައި ރާއްޖެއިން ކޯވިޑް19 އަށް ޕޮޒިޓިވް ވެފައިވަނީ 30 މީހުންނެވެ. މިއީ މާލެ ސަރަހައްދުން ޕޮޒިޓިވްވި 15 މީހުންނާއި، އަތޮޅުތެރެއިންނާއި ރިސޯޓްތަކުން ޕޮޒިޓިވްވި 15 މީހުންނެވެ.