250،000 އެމެރިކާ ޑޮލަރު އިންވެސްޓްކުރާ ބިދޭސީންނަށް ދިގުމުއްދަތުގެ ވިސާ ދެނީ

ރާއްޖޭގެ ބޭންކެއްގައި މަދުވެގެން 250،000 އެމެރިކާ ޑޮލަރު ބެހެއްޓުން، ނުވަތަ އެ އަދަދުގެ މިންވަރެއް އިންވެސްޓްކުރާ ފަރާތްތަކަށް ދިގު މުއްދަތުގެ ވިސާ ދޭން، އިމިގްރޭޝަން ގާނޫނުގައި ކަނޑައަޅަން ރައްޔިތުންގެ މަޖިލީހުގެ ގައުމީ ސަލާމަތާއި ހާރިޖީ ގުޅުންތަކުގެ ކޮމިޓީން ފާސްކޮށްފިއެވެ.

ބިލުގައި ބުނެފައިވަނީ ރާއްޖޭގެ ބޭންކެއްގައި މަދުވެގެން 250،000 އެމެރިކާ ޑޮލަރު ފަސް އަހަރުގެ މުއްދަތަށް ފިކްސްޑް ޑިޕޮސިޓް އެކައުންޓެއްގައި ބަހައްޓާ ބޭރު މީހުންނަށާއި ސަރުކާރުން ކަނޑައަޅާ ވިޔަފާރިތަކުގައި މަދުވެގެން 250،000 އެމެރިކާ ޑޮލަރު އިންވެސްޓްކޮށް ރާއްޖޭގައި ހުރުމަށް އެދޭ ބިދޭސީންނަށް އެ ހުއްދަ ދޭން ވާނެކަމަށެވެ. އެ ހާލަތް ދެމިއޮތްހާ ހިނދަކު ކޮންމެ ފަސް އަހަރަކުން އެ ހުއްދަ އާކުރަން ޖެހޭނެ ކަމަށްވެސް ބުނެފައިއެވެ.

advertisement

ދިވެހިންނާ ކައިވެނިކޮށްގެން އުޅޭ ބިދޭސީންގެ ވިސާ ކޮންމެ އަހަރަކުން އާ ކުރަން ޖެހޭ ގޮތަށް އޮތް އޮތުން ބަދަލުކޮށް، ދިވެއްސަކާ ކައިވެނިކޮށްގެން ދަރިޔަކު ލިބިފައިވާ ބިދޭސީންގެ ތެރެއިން، ވަރިވެފައިވާ ހާލަތުގައި ނުވަތަ އޭނާ ކައިވެނިކޮށްގެން އުޅުނު މީހާ ނިޔާވެފައިވާ ހާލަތުގައި، އޭނާގެ ދަރިންނާ އެކު ރާއްޖޭގައި ހުރުމަށް އެދޭ ބިދޭސީންނަށް ދެވޭ ހުއްދަ، ކޮންމެ ފަސް އަހަރަކުން އާ ކުރަން ޖެހޭ ގޮތަށް ކަނޑައަޅަން ބިލުގައި ވަނީ ހިމަނައިފައެވެ.

އިމިގެރޭޝަން ގާނޫނަށް އިސްލާހުތަކެއް ގެނައުމަށް ސަރުކާރުން ހުށަހެޅި ބިލު އެ ކޮމިޓީން ދިރާސާކޮށް އިސްލާހު ގެނައުމަށްފަހު މަޖިލީހުގެ ތަޅުމަށް ފޮނުވާފައިވާއިރު، ގާނޫނުގައި މިހާރު ކަނޑައަޅާފައިވާ ވިސާގެ އިތުރުން އާ ދެ ވިސާއެއް ތައާރަފު ކުރަން ވަނީ ހިމަނައިފައެވެ.

މިހާރު ގާނޫނުގައި އޮންނަ އަށް ވިސާއަކީ، ޓޫރިސްޓު ވިސާ، ޑިޕްލޮމެޓިކް ވިސާ، ސްޓޫޑެންޓް ވިސާ، ބިޒްނަސް ވިސާ، ޑިޕެންޑަންޓް ވިސާ، ވާކް ވިސާ، ރެސިޑެންޓް ވިސާ، އަދި ސްޕެޝަލް ވިސާ، އެވެ. އިސްލާހު ގެންނަ ބިލުން އަލަން ތައާރަފު ކުރަން ހިމަނާފައި ވަނީ މީޓިން ވިސާ އާއި ކޯޕަރޭޓް ރެޒިޑެންޓް ވިސާ އެވެ.