ފަތުރުވެރިކަމަށް އާ ރަށްތަކެއް އަންނަ މަހު ހުޅުވާލަނީ!

ޓޫރިސްޓް ރިސޯޓް ތަރައްގީކުރުމަށް އަންނަ މަހުގެ ތެރޭގައި އާ ރަށްތަކެއް ބީލަމަށް ހުޅުވާލާނެ ކަމަށް އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވެއްޖެއެވެ.

އަންނަ އަހަރަށް ލަފާކުރާ ދައުލަތުގެ ބަޖެޓް ދިރާސާކުރުމަށް މަޖިލީހުން އެކުލަވައިލި ކޮމިޓީގައި ވާހަކަ ދައްކަވަމުން އިކޮނިމިކް މިނިސްޓަރު ފައްޔާޒް ވިދާޅުވީ ކޮވިޑް-19 ކުރިމަތިވި އިރު ސަރުކާރުން އައީ އާ ރަށްތަކެއް މާކެޓަށް ހުޅުވައިލުމަށް މަސައްކަތްކުރަމުން ކަމަށެވެ. އެ ގޮތުން 20 ރަށެއް ބީލަމަށް ހުޅުވާލުމަށް ރާވާފައިވާ ކަމަށެވެ. މިހާތަނަށް އެ މަސައްކަތް މަޑުޖެހިފައި އޮތީ ކޮވިޑް-19 ފަދަ ބަލިމަޑުކަމެއްގެ ތެރޭގައި ރަށްތަކަށް އެކަށީގެންވާ އަގު ނުލިބިދާނެތީ ކަމަށް ފައްޔާޒު ވިދާޅުވިއެވެ.

advertisement

އެހެން ނަމަވެސް ފައްޔާޒު ވިދާޅުވީ މިހާރު އޮތް ހާލަތަށް ބަލާއިރު ރަށްތައް މާކެޓަށް ނެރެގެން ކުރިއަށް ވުރެ ރަނގަޅު އަގެއް ލިބިދާނެ ކަމަށާއި ކުރިއަށް އޮތް މަހެއްހާ ދުވަހުގެ ތެރޭގައި އާ ރަށްތަކެއް މާކެޓަށް ހުޅުވައިލުމަށް ޓުއަރިޒަމް މިނިސްޓްރީން ތައްޔާރުވަމުން އަންނަކަން އެނގިވަޑައިގެންފައިވާ ކަަމަށެވެ.

އާ ރަށްތަކެއް މާކެޓަށް ނެރުމަށް ތައްޔާރުވަމުން އަންނަ އިރު މިހާރު ވެސް ދޫކޮށްފައިވާ ގިނަ ރަށްތަކެއް ތަރައްގީނުކުރެވި ގިނަ ދުވަސްތަކެއް ވަނީ ފާއިތުވެފައެވެ. އަދި ބައެއް ރަށްތަކުގެ މަސައްކަތްތައް ވަރަށް ހަލުވިކަމާ އެކު ކުރިއަށް އެބަދެއެވެ.